Perspective

(Zirtirtu nih hi ka tih chi a ni lo, zirtir tur ka ni zawk.Chuvangin, thil inkawlkalh deuh deuh ka sawi dawn.)

Hei hi i hre tawh a, ka lo hre tawh. Acid leh Base a in react apiangin, product ah Salt leh Water a chhuak ziah a. Acid(thûr) leh Base(khâ) kha, Neutral ah a chang tih na a ni. Chuti a nih si chuan, Party lian pahnih Congress leh MNF hi in react ta se Neutral Party awhawm tak a chhuak ang em?

Khawvel temperature sang tial tial avang ngawt a kan nulate hnuai khuh hi sang tial tial a ni lo, kan nun a sang ve tawh tawk tihna a ni. A feng chhing hi i hmu khawlo ringawt lo ang u, fual tak leh hnufual taka kan awm chhung chuan a fel lovang. An inhmeh leh hmeh loh chu thuhran nise, a hmeh te'n an inhmeh chuan a tawk, kan feng chhing te hian khawvel an thlir sang tawh tihna a ni zawk daih asin.

Mahse, hei hi han ngaihtuah teh. Mi hmuha chhing nalh leh khal mawi tak hian, fianrialah a chhin belh ani emaw a position a duhtui loh rual chiah hian, buaina a thleng thin zawk hi a lo ni. Khawlaia chhing satliah hian, sex video a hring lova; fianriala feng fual ten an fen chhin avanga buaina kan tawh hnem zia te hi i ngaihtuah hlauh ngai em le?

Hlauhna hi hlauhna a ni lo, kan ngaihtuahna mai a ni. Chutiang chiah chuan, kan thlirna hian, min hmuhtir leh duh dan a tidang lam mai a ni. Kan mawina hriamhrei thawmhnaw style hian, ramthimah kan position min duh uluk tir lo a nih erawh chuan, kan mawh a ni a.

NLUP hi miretheite min dawmkan nan leh rahbi min tuksak an tumna a ni a, Mobile Phone leh TV lei nan anga i thlir tlat chuan; HIV+ i ni daih ang. Zu amaha che thei lo hi, MLTP Act nghawngkawl hian reh hlum kher tum suh. Reh hlum tumtu mihring rilru i hneh hma chuan, a to leh tui ngaiin a la to-tui tho tho ang. 

Sex hian indopui rapthlak tak a chawk tho thei ania. Chutiang a nih theih phei chuan, ram leh hnam thlir dan hrang hrang avang hian, ram leh hnam hi an inhmelma-in, laipuiin a kua a chhuahsan phah thei. Thlirna tlang leh ram kan hriat a pawimawh. Kohhran kal phung reng reng, khawvel taka i thlir chuan; i khawvel-kohhran nghal ang. Mimawl nihna a ni. I harh em?

Martin Luther King Jr. sukthlek dangdaitak chuan,"Black is strong, black is beautiful" tiin a ral rel tir a. Midumte vun a lo ngo ta a ni tih tunlai khawvel hian a hmuh hmaih ka ring lo. Mingo thufing pakhat chuan, "Let the ordinary people do ordinary things" a ti a. Mi pangngai chin nia inhria chuan, thil pangngaitakin thlir rawh se. Vantlang chung lampang nia inhria phei chuan, strategy leh perspective chungnung nei bawk rawh se a tihna daih a lo ni. Bye heart tlak a ni.

Mahni nunna, keimahni kut ngeia kan han chhat te hi i ngaihtuah ngai em? Eng buaina nge kan tawh a, eng harsatna nge kan lo hmachhawn tawh tih zo zai te. Heng an mahnia nunna thlah zalen mai ta te hi mi dawihzep an ni. An nuna harsatna paltlang ngam lo khawpin an dawihzep a, hrui invalh hi an lo awrh thin mai zawk a ni e.

Mahse, hei hi han chhiar ve thung teh. Chatuan hawlh lem lo ni a kan ngaih kan Pu Chhura qoute ropui tak, "A sen reng reng chu hlauh tur"tih hi i chik em? Hetih hunlai hian, current an neih a rinawm loh va, hetiang qoute ropuitak a chhamchhuak mai thei hi a mak asin."Danger signal are made red" tiin Science in a lo Attested thlap zuk nia. Ral rel leh thlirna ropuitak a va han ni chiang teh reng em!!

Ka sawi tum tak chu hei hi a ni. Pathian hian vision, intelligence leh strategy ropui tak hmangin min vur a, thilnung dang zawng ai pawhin kan ropui reng a ni. I hlu a ni tih inhre rawh, saihlum hrual nawk nawk; vawih thawk khum atanga nung i ni lo. I pianni leh thihni thlenga lo duang lawktu hian, rawng chi tam tak thliar second rei lote chhunga thliar thei turin mit a pe che a. Thlum, thur, kha, sa, vawt adt. hre zung zung thei nghal tura duan i ni bawk a.

Chumai a la duhtawk lova, ramsate chunga thunei tura hmanraw pawimawh rilru leh suangtuah theihna a pe bawk che. Heng hi thilnung dang reng rengin an nei lo tih hria ang che. I hlu a ni. Chuvangin, i rilru leh suangtuahna dik tak hmanga thlir dan ropui leh danglam put leh zirtirtu nih hi, i tih makmawh a ni e.