12 February 2015

Layla, ka rillung Bawihte

EN TEH, ka lunglen kur bîk vangin he’ng thu hi ka sawi a ngai ta...

Hman hmana kan inhriat tan tirh khan kum tam ka tahpui tur i ni tih leh, tuna ka thutnaah hian thuin heng thu hi ka sawi ang tih ka lo ring pha ngai hauh lo va. Kha hun khan tun hun hi min hruai thleng ang tih i ring ngai lo ang bawkin ka ring ngai bik si lo. Hun te hian hlutna an nei ve a ni tih kan hriat hma hauh atang tawh khan khawiah nge min hruai thlen dawn tih lam phei chu kan dâwn pha mawlh lo a nih kha.

Kum sawmhnih lai liam taah khan naupang kum sarih mi vel awrh kan ni a. Naupang chhe hriatin kan hria a, naupang tawngin kan tawng a, eng dang dâwn lovin kan hlim a. Ka nu leh pate chu i nu leh pa ang mai an ni a, i nu leh pate pawh ka nu leh pate ang mai an ni thin a, kan room chhûnga khum hnuai chêp tak kha kan khawvel a ni reng thin. Naupang chhe kawmin kan inkâwm a, inkâwm ngun hle e ti lo chuan kan intihthiam loh châng leh kan intihtah pêr pûr châng kha a tam narawh e. Chu chuan rei a daih thei chuang lo va, kan room chhûnga khawvel chu a zîm hle nain kan hlimna erawh a tam lawi si. Layla, ka bawihte, khang hun liam tawh koh kir theih si loh kha ka suangtuah lêt thin a, tun ang hian ka ngai ngawih ngawih che ang em tih ka la suangtuah fo thin.

Chhia leh tha kan hriat ve hnu leh nula leh tlangval kan nih thleng pawh khan kan inthian thatna kha a bo thei chuang lo va. Fing kan intih ve hle hnu pawh khan i tel lova ka khawhar tluk zetin i khua a har ve thin tih min hrilh kha ka la hre reng thin. Thil pakhat ka la hriat reng chu, ka piancham min lawmsak dan kha a ni. I nu’n roh leh duat em ema, a enkawl thin rose pakhat chauh pâr kha kut thi phunga thliakin min rawlrûk ve ngei a nih kha. A hlutna tak hrethiamin a awmzia tak hre pha kher lo mah ila ka hlut a. Zak tak si leh lâwm taka lain ka kawl tha reng a. Tun hnuah hian a hlutna hrethiam ve tan dawn chauhvin ka inhre ta. En teh, kha pangpar kha ka dahna ka lo hai a, kum tam a liam hnu hian i lehkhabu ngainat em em karah khan a lo la inzep asin.

Layla, ka duat, kan naupan chhiatna leh kan nulat tlangvalnate kalsana kan inthian thatna thlenga awmze nei lo taka hun kan inlen botîr hnuah nupa nihna thleng thlenga kan nun kan hman tak dan hi mak ka la ti reng thin. Kan naupan zual lai leh kan la ât em thin laia kan khawvel tho kha nupa kan nih tak hnu pawh khan kan khawvel tho a la ni zel a. Kan tah nuih dunna te, kan duhthusam kan duanna hmun te, kan nakin hun tur intanna te an la ni reng tho kha mak tiin kan phun sep sep thin a nih kha tiraw?

I hlim tluk zeta hlimin ka hmangaih tluk zet chein min hmangaih tih ka hria a. Ka thisen ngei ka fa chu paia i dul chu chûl thinin kan duhthusam mai mai pawh kha kan hlimpui tâwk an tling zo va. Eng ang mi nge mi hrinsak anga he khawvel hian eng nge a pêk ve ang a, he khawvêl tân hian eng nge a hnutchhiah ang tih suangtuah ringawtin hun kha kan chhiar liam ve tak tak a. Kan duhthusam khan khawiah nge min hruai thlen dawn tih kan thlir mêk laiin tuna ngawi renga ka thutna bâk hi min hnutchhiah tur i nei ta si lo.

Ka fa chu mi hrinsak ngei a. Evi hnena Lalpa’n ânchhia a lo lawh tawhna, ‘hrehawm takin fa i hring tawh ang’ a tih chu i tawrh a tul ve a, hrehawm taka hringin mual min liamsan phah a, pialral siang min lo lawisan ta a ni. Hrehawm tia i thlan a luan ngiai ngiai lai khan ka kutah nghet taka hmerin kan naupan lai atang tawha kan khawvel tho kha i la sawi bâng chuang lo va, chutah chuan awm leh i châk thu i sawi asin. I tehna leh ka tehna ber suangtuahna khawvelah hetiang hi kan duang chhin lo va, hunin hetah hian min lo hruai thleng reng si.

Mite chunga thleng ang tho mah ni
se, kan chungah a lo thlen meuh chuan tawrh dan thiam a har a. Thihna kan chunga lo thleng thin hi a tuar tam apiang hian an tuar thiam lo mai a lo ni. Tawrh tama tawrh thiam chi a ni hauh lo va, a tawrh dan zir theih pawh a ni hek lo. I fanu min hrinsak ngei leh kei ka inngaihtuah a, lungchhe van kaia tapin, ‘Bawihte...kan tuarah vanpui a lo chim e’ kan tih hawm hawm tâk hi. Layla, ka Bawihmamte hmangaihte tel lovin hmangaihtu thinlung a kim thei si lo. Ni e, hmangaihte tel lovin hmangaihtu thinlung a kim thei mawlh lo a ni.I fanu hi han en teh. Zanlai a lo la ni ang a, engmah hre lem lova invai viat viatin a nu hnute tui châkin a lo thangharh ang a, a la tap ang. Kei, a pa hian hmangaih hle tho mah ila, eng hnute tuiin nge ka hrai puar tâk ang le? Thenawm khawvengte hriat loh leh nang a nu, lei daia kan zalh tawh hnu hriat loh hian zan eng zât nge ka tahpuia ka menpui tâk ang? Ka dâwn a tawi a, ka lung a chhe thar leh thin. Nipui laia vûr tla leh buh seng laia ruahsur a inhmeh lo ang hian chawngzawng thlâwk leh vamur lêng lai ang maiin mu leh mal neih a har thin khawp ang le.

Mite chuan hmangaihin, ka hmangaihna aia tam pawhin min hmangaih kêp thei dâwn mah se, nang a nu hmangaihna erawh a tluk pha ngai dawn chuang em ni? Nakinah a lo sei len hunin, he khawvel hian eng nge a pêk ang tih dâwn lék lovin a mâwina ringawt ûmin a tal pâwl ve em em ringawt thei a. Hmangaihna khamkhawp lo a la inti ang. A hringtu ber a nu zawnga a la insawh tau nghawng nghawng turte hi thlir har ka tih i ring lo vem ni?Chutih hunah chuan nang leh kei hi min la dem ang a, ‘engati nge kei kher?’ tiin âwm a la chûm ve ang. He'ng hi kan pafa chan tur leh duh thlan tur dang awm chuang lo a ni. Kan mumangah chang se, mumang chu kan thawhsan ang hian thawhsan kan duh ngei ang. Layla, ka Bawihte, kan mumang erawh a ni mawlh si lo.

Thinlungin âr bo a zawng tak meuh meuh a, kan duhthusam chu kan duh dana thil her remtu a ni thei ngai dawn chuang si lo. Kan mangang au thãwm leh lungngaihna thlantui luang chuan min pawt chau zo leh si thin. Tinkim kan dâwn a, hmatiang kan thlîr a, kan tah mittui far hian min hnem thei chuang si lo. A hlim nui hmêl hian min titap a; a tap thãwm hian mittui bawk a surtir bawk thin. Keimah leh keimah ka la indem loh nan ni êng awm lohna hmunah pawh ni se a tân ni êngah ka tang mai ang a. Beiseina chauh ringa kan nun hun a lo la thleng a nih pawhin a tân beiseina ka ni mai ang.

Mahse e Layla, ka bawihte, nipui a lo thàw ang a, a hnuah furpui te'n min nuai chhunzawm ang. Fur ruahtui hâka kan nun kan hman zawh hnuah thlasik khaw vâwt te'n min nuai chhunzawm zel ang a. Kumpui tam a her liam ang a, mahse, a her tan dawn chauh angin ka hre ngei ang le. Chutah chuan, i fanu hi a zun leh êk avangin a lo thangharh thin dawn chauh a, nu leh pa nih erawh ka fawmkem thei mai ang a. Mahse, a nu pangtilum dapa a tah hun leh kâwl a lo ên dawna a nu hnute tui châk tuihal dangchâra a tap thin tur erawh nâ ka lo tihpui lâwk thin. Nu leh pa nih fawmkem tel vek a va’n har tawh dawn em! Tui taka a muhil pawh chu a thaw nge thaw lo tiin a bianga fâwp chung zelin ka ngaithla reng fo bawk ang. Khumlaizawla kan pafa tualchai hun chhûng tur hi lungngaia chal dawm kun meuhvin ka suangtuah neuh neuh a, tawrh a har ka ti ve thin ngawt ang le.

Lei mihringte ngaih danah chuan harsa angin a lang a ni thei. Hei hian ka inhnem mai a tul tawh a ni. Chawngzawng meuh pawh hawisan ngai lotu Lalpa’n min la enkawlin a la ngaihtuah dawn a ni tih hi. Ka phurh zawh loh phur tur hian Lalpa’n min duan ka ring thei chuang lo va, chawngzawng meuh pawh Lalpa’n a ensan ngai si lo. Layla, ka hmangaih, thlamuang takin lo châwl la, a rûkin vawi tam tak tah ngai dawn mah se, ka taksa pawhin tuar dawn mah se — Lalpa’n min la enkawlsak ang.

Layla, ka rillung Bawihte, i thi lo, kan thinlung hian a hria. Nikin ni-ah tawtawrâwt hnuhnung a rîk hunah kan intâwk leh ang a; he khawvel natna leh thihna rapthlak takte'n min then phâk leh tawh ngai dawn si lo. He thû chauh hian chhûng leh khat, then leh rualte, ka fanu leh kei hi kan inhnem thin a. Kan ngaih a ngam thar leh chauh thin.

I Thessalonika 4: 16–17 ‘Lalpa ngei chu au thâwm nên, vantirhkoh chungnung ber aw nên, Pathian tawtawrâwt ri nên, van atangin a lo chhuk dawn si a. Tin, Krista-a thi tawhte chu an tho hmasa ang a; chumi hnuah chuan keini nunga lo la awm rengate hi boruakah Lalpa hmuak turin anmahni rualin chhûm zingahte khian lâk chhohvin kan awm ang; chuti chuan kumkhuain Lalpa hnenah kan awm tawh ang.’

A lo seilena rual a pâwl thiam ve hunah chuan fam tawhte famrolungmualah mittui a la rawn surtir thar ve dawn chauh a. Kumpuisûl tam liam thin mah se, kan tawrh hi a nêp thei chuangin ka ring mawlh lo. He khawvel hrehawm chhuahsana pialral siang min lawisan cham a lo thlen apiangin rose pâr sen ngei mai ang kha ka la rawn dahtir thin ang a; chutah chuan i hmêl tak hre hmanin i hmangaihna chhe tê tal tem hman lo mah se, ‘Ka Nu, Ka Hmangaih Che’ ka lo tihtir thin dawn nia.

No comments:

Post a Comment