30 January 2013

TEARDROPS IN MY EYES

Dai kil karah, tu khaw kha-in ka ui ka ar min tih lohna hmun turah khawsa ila; ka thaw a tawp ruala riltama thaw tawp va nghal mai tur fanau kawl bawk ila-nilo-kan ngaihtuah zawng ringawt pawhin, em em a kan ti nghal ang. Mahse...

John Denver te lunglentu West Verginia Country Road lamtluang lam kan zawh lo, miin min hrilh kher lo mah se Bawng kawng ang mai a ni tih kan hai lo. Chaw thing a ni tih hriat fahran chu thlengah a khawrh chhuak vek a, a dang beisei leh chu beidawnna a ni. Intiat chiahin a phel a, a leh lam zawk chu a nau hnenah a pe a. An chawhmeh chu hmarcha sen, chi tel lova rawt a ni a, purun chu ei chi a ni em tih pawh hre lo ang maiin an ei thlan hliam hliam a. Thu rawh u pawh an ti chuang lem lo, kan pheikhawk leh vawthlep bun ang ang chu kan thut bet far a.

Mama, khawnge i nu? Pindanah a mu...Kan phei nghal dual a. Lukham uk khak tawh leh a kut chu lukham chungin a lo mu rum hlat hlat a. Ka pi, i tho thei ang em? Kaih thawh kan tum a. Aih, ka tho thei ang. Hreh leh chau taka a thawh triam triam kan rin laiin, hlim takin a tho a, a thu var a. Ka pi, in chhungkaw chanchin kan lo hria a-kan tawngtai ang che a...Ni lo, keimah ka lo tawngtai zawk ang e!!

A khuh-hip natna avang chuan a khuh kherh kherh a, a tawngtai zo chu Chibai a sem a. Ka chau em mai, ti khan lo thu phawt ula ka'n mu zal leh lawk ang e-a tih lai tak chuan-Ngai teh, ngaiin kan tap lenkawl a khum riai e. A fate pahnih chuan engdang dawn lovin an lo la nui tliar tliar a. A thawk a buai a, a thaw tha hlei tho lova, kan ko chiam a. A harh thei ta reng reng lo. A marphu kan zawng a, kan hmu ta si lo, kan dawm hlum chu a ni ta reng mai.

Mama, Mami...i nu a awm ta lo? A dam lo khuh kherh kherh pawh an thlamuan puia an la hlim teh reng nen, namen lovin an tap dun hawm hawm a. Kan in en a, sawi tur a vang kher mai. A nu ruang chungah ngei chuan, bawkkhup meuh meuh in an tap dun a; an theih ang angin a nu chu lo kir leh turin an ngen a. Ko ei tur reng a awm tawh si lo. A nu ruang puan vara tuam chu thlirin, inkaikuah dun rialin an thlir liam ta. An in khawhar takah an let leh ang a, engtin nge chaw an ei tak ang? Awmlai lunglian lo hrang e, luaithi an nul bang dawn nem maw!!‎

Unau pahnihte chu hnuchham awmna an pan a tul ta. Pa ber khawlohna avanga nu leh fate tawrhna leh tahna tam tawh lutuk hi, tawngtai ringawtin kan ching fel thei ta lo a ni. Hnuchham in pana an kal liam lai chu kan thlir reng a...


14 January 2013

HMANGAIH ESTHER-I KHA



Duhtak Es...


Hriat loh chhingkhual min chan dawn tak si chuan, hliampui tuar ang maia ka rumna erawh min chhiar sak ka phut tlat ang che. Hmangaihnaa lo hmingtha tawhte sakhming chawiin, thi leh tawh ngai lo tur hmangaihna i mi rawlhruk ngei kha phawrh ka tum ta a ni. Nang ngaih vanga ka thinlung natna leh ka mittui hnam zawng zawngte hi, ka hmangaihna che avang zawka chhuak an nih erawh chuan, a vaiin i nei dawn nia. Mahse, hei erawh min hriat sak la, ka hmangaihna che hi thlan thlengin ka chhawm zel ang.


Tah pui leh sawi pui tur che a va tam em!! He hringnun hi Calendar ang maia tar chhuah theih han ni teh reng se, a chiangin a felfai nge awm si a. Ka sawi loh leh ka phawrh chhuah loh tam zawk hi Duhtak, a mawi mawi leh rilru ti na tu an ni asin. Vana lalnu chhawrhthlapui leh vana ram ropui kalsantu khian mi hriatpui se, chuai ve tawh ngai lo tur hmangaihna erawh tahna leh nun kawng kham leh suar mai an lo chang fo thin. En teh Duhtak, kha Oak thing upa ve tawh tak hnuaiah khan lo va kal ta la, hmangaihna ka hlan kha ka sut leh ta e tiin i lo va hrilh dawn nia. Kha Oak thing hnuaiah nge khan kan inhmangaihna bul chu a intan anih kha. Chutih hunah chuan, leng dang tang bela, a lam i hawi ta a nih ngai pawhin ka dem phak lovang che a, ka dem ngai hek lovang che.


Ngaihdam theih loh khawpa sual leh hmangaihna vawrtawp hi a awm a nih ngai chuan, hmangaihna vawrtawp neitu he ka thinlung hi, thinlung nep leh tawmkai lo berah chhiar la, i duhtawkin i lo nghaisa dawn nia. Mahse duhtak, chutiang chu a lo awm lo a nih erawh chuan nghaisak, sawisak leh dem hlawh kumkhua tawh tur he ka thinlung hi i lo ngaidam hram dawn nia. A chhan chu e Duhtak, i tel lova chhun ni a rei tluk zetin, zan khaw thiang te'n reh ri an hril a, nang ngaia tah ruai a awl fo thin.


Kan vangkhawpui chhuahsan a, sir ka sawn lai khan fiah lo ruai hian ka lo hmu che a. Ka theihna zawng zawng sawmkhawma ka ban vei chu i hmuh theihah ka pho chhuak zo ta ngang lo a nih kha. He ka thinlung hlata i thinlung chu run rem tir i tum mek laia, i chibai hnuhnung leh i anka nem kam khat ka lo phut luiah i ngai a nih zawk erawh chuan, a fiah zawh poh leh a hrehawm ang tih erawh ka hai phal ring duh suh ang che. Chuai mai tur parmawi chu ti vul leh turin, ka theihna zawng pawh i kiangah ngei khan mittui nen ka ngen nawn awn awn tawh che a, reilo te atan mai an ni si a nih kha.

I thinlung rama hmun pakhat khawizu leh hnute tui luanna ram it a, lo inbenbel ka tumna kha sual anih erawh ka ring phal chuang lova. I mi ngaihdamna aw-ka erawh derna anka mai an lo ni e. Hunin a her liam pui thin ni, thla leh kumte chu ralin lo thar zel thin mahse, KA HMANGAIH CHE tia i tawngkam chhuak erawh hrilh nawn ang maiin an lo thar leh thin ang. Chu hun chu thlahlel ngam leh suangtuah ngam lo khawpa ka nat hun erawh ka huphurhin, a na ka ti thin ngawt ang le.


Lam ang leta ka lo kir leh hun chuan i nuihna hmun leh hmelte erawh an dai zo tawh ngei ang a, thlan thlenga ka chhawm tur hmangaihna erawh vuakthitlin hnu ang maia naah an lo chang tawh bawk ang. Chu hun lo thleng tur chu duh lo hle mah ila, an lo la thleng ngei dawn si a...In run sang kaia biahtuh di hlan che pawh a rem tawh lovang a, mahse ka suangtuahna leh duhaisam te chu i kiangah awmin, an zui zel fo ang che. Ih e duhtak, chu hun chu a lo thlenga biangah chhingmittui an lo luang a nih pawhin, min dem mai bik suh ang che aw. Nang ngaia ka tah avang hian he khawvel hian min dem a nih pawhin, a pawi ka ti hlawl lo.


Vana arsi-te leh a lenrualte an en zawh poh leh nang ngaih a zual a, thla chu eng mah se ka tan chuan fiah lo ruaia eng ang mai an ni a. Han thlir ve la, siar hmingthang Chawngmawii leh Hrangchhuana te pawn hrehawm tiin, an hmel an thup chawih chawih khi. Keia rilru hliam leh lungngaihna chu tuar zo lovin, leilung leh vana thilsiamte pawh an rum tawh a nih khi. He thuziak hi i lo chhiar ve hun chuan, kei chu chau leh khawhar, lungleng reng rengin chhun ni leh zan khua ka lo chhiar liam thin tawh ngei ang a. Mihring hmel pawh tluk zo lo khawpa dawldang leh rawih hmel pu-in, thlehnem laikhum chu ka lo bel thin ang.


He khawvel ral mai turah hian, i hmangaihna chu pumbilh tumin ka hmanhlel a; ka hlawhchham ta si a. Neih tuma ka beih i thinlung chu ka ban pha ta si lo. An liam a, an chuai zo a; mumang mai an chang zo ta si. Tah hla rema lungchhir a sawt tawh lova, ka tih sualah hrem ka phu tih erawh ka hai bik lo asin!! Vul leh tawh ngai lo tura, liam turin ka phal lo che a; beiseina chuan ka thlir reng thin ang che tih hi ka tah hla mai an ni ta e.


A tawp ber atan chuan, ka duhsakna sang ber ka hlan che a. Kei aia hmangaihtu leh hmangaih chu tawngin fanau maltluan chu chawi la, kir leh tawh ngai lo tura i hnawlhnu thinlung hi erawh nghilh zai i lo rel tawh dawn nia. He lei dana ka hringnun tawmkai lo hi chhiar liama, lunglenna avanga pialral ka lo kai ta a nih ngai chuan, pialral kawngkhar mawiah chuan nghakhlel takin ka lo thlir nitin thin ang che. Chu ramah chuan dawt thute hlimnaah changin, tahnate an nui a. Mualphonate pawh hmangaihnaah changin, itsik leh elrelna zawngte pawh malsawmnaah an chang tawh ang. Damlai hringnun hnuchhawna chu ram i lo thlen ve hun chuan, kan fawhna biangno-ah te chuan fawp lehin; pialral khawk ram ram khawpin kan nui dun ang a. Dawt leh khawvel dawt thu ten min then leh phak tawh ngai lovang.

Here am I crying silently,

Hoping and waiting for the hopeless;

When you'll hug me one more time,

Kissing and laughing each other;

But now, they are gone.






I hmangaih thin...