THAMES LUIKAM ATANGIN

River Thames, khuangchawi thla eng no nghulh leh lungrun tak maia a chhun tlet sur, England lui sei ber mai chu, hmalam panin a luang bir ngut ngut a. He River Thames ngei mai hian, Richmond khaw chhuak nula Hmeltha-i ngei mai chu ui tak leh phal lo chungin Lawng leng chi khatah chuan, mi thawn haw sak a tum ruh hle.



He Richmond Tleitiri hmel duhawmna chu England pumpui hausakna ai pawha duhawm leh a mit meng paw raih mai chu van dumpawl aimaha pawl mawi a ni bawk a.A mittui chu Ganga, River Severn leh River Thames te aia hlu chungchuang a ni bawk.



South bank of the Thames river-ah chuan London Eye, Europe-a Ferris Wheel sang ber mai leh eng ut mai, kumtina mi 3.5 million chuang zet mai te mit ti tleitu chuan, chu Richmond Tleitir-i chu zahna chibai buk niawm tak hian a vir tluk tluk bawk a. He ka Richmond Tleitir-i hi Thames lui tui tle sur sur chunga lengin, Matthew Arnolda'n City of dreaming spires tia a sakhming a lo chawi Oxford chu a paltlang ang a. Reading, Henley-on-Thames a London Bridge te paltlang zelin, Windsor a bye bye ang a, Richmond leilungah nge mai chuan keimah avanga a lunglen a siksawi dawn a ni.



Richmond Chhulchhuak-i sam buang leh kir chiat mai kara mit meng leh a heh sen no tak mai chuan, thla eng no nghulh mai chu a mawina a belhchhah chiang ngei mai. Chu zan thla eng chuan duhthu sam hle mah i, London Eye te chuan thuchah hnuhnung hlanin, a ban phar meuhvin a vir tluk tluk mai bawk. Hun tam lunglen biahthu hlan hman ka ni tawh lova, Thames lui tui leh a hmanrua a inpeih ta.



Richmond leilung a rah hun chuan, Park leh Open Space nalh tak tak ten an lo hmuak ang a. A sam buang kir nalh tak hnuaia a chhing mit meng paw raih mai atanga, mittui luangliam tur chu a insum tir bawk ang. Richmond chhulchhuak Tleitir-i chu engtikah tawng leh ang i maw tia ka suangtuah lai chuan, Lawng chuan kal tumin a puanzar a khai kang ruai ruai bawk a!!



'The happiest place in which to live in United Kingdom' ti meuhva an lo sawi thin, Richmond panna Lawng lian chuan a puan zar a rum tir ta vut vut mai le. Thames luikam atanga virthli lengte chuan, Tleitir-i bahsam chu dimdawina tel hauh lovin an chhem leng pawp pawp a. A mit meng paw raih mai chu, tawrh a va han har tak em.



Lawng pu chuan kei a hmangaih chu The Last Kiss hlan tur leh lawng chhunga lut tawh turin, a rawn au lauh lauh tawh a. A ban vuanin, a heh nem leh sen no hlarh si chu duhthawh takin ka fawp nawn awn awn a. Port of London chhuahsanin, Oxford lam panin Thames luiah chuan a tawlh thla pur pur mai a. A ban phar a lan theih chhung chu ka thlir reng a.



Kar a liam ta. Thirhrui ka dawng ta nawlh mai le. Richmond Tleitir-i a nih ngei ka beisei hle naa, min va thawng teh kher em!! Kha nula, ka hmangaihna zungbun ka lo kawl tir tawh ngei mai kha a lo ni reng reng si lo. City Of Dreaming Spires-Oxford ah chuan chesualin, SOS thawn chhuak ve bawk teh mah se chhanchhuah hman an ni ta lo tih min rawn hrilh ta!



Richmond leilungah ngei mai chuan, Richmond Park luah luma zal hlen tura thlah liam fel vek a nih thu min hrilh bawk. United Kingdom-a chenna atan chuan, hmun hlimawm leh nuam ber Richmond a thlen huna, a lunglen siksawi dan tur a duanna lam tluang, City Of Dreaming Spires ah ngei mai chuan a suangtuahna a thamral hlen ta a nih chu maw le.



Inthlahna leh zahna chibai min buktu thlahlei nga zana chhawrhthla te, Thames lui tui tle sur sur te, London Eye te, a sakruang leh a heh no tak te pawh an demawm lek lek a. Khatiang taka lungrun leh thlahlel em em a min thlah liam puitu, ka thian duhawmte an ni lawi si a. Thames lui tui te hi an lo va nunrawng si em!!



Richmond Park a ka ke ka nghah ni chuan, United Kingdom a lui sei ber River Severn chu, England lui sei River Thames anga nunrawng a ni ve ang em tiin ka inzawt bang lova. Ka dam chhunga ka hriatna hnuhnung chu Richmond Tleitir-i fam rolung bulah hnutchhiahin, ka thu hnawk a...

MIZOTE LEH SEX

(A filh thei ang bera, kan thupui ka phawk pha lo a nih pawhin, ramhuai zawlin ngai ka awh tihna ni teh se)



"Video cell phone hi silai mu thun sa ang a ni a, thluak puitling lo chungin kan khal a, saruakin mahni kapkar kan kap mek a ni" - "He ram lo thleng tur kan pa Diabola ram hi panin, cell phone tumkau kengin Mizote hian phurtakin mualphona kawngpui kan zawh mek a ni" tia Pu Vanneihtluanga au thawm hian, ka thling thlengin a'n phel ve tum hrang a.



A ni lah taka, vun ngo nun dan entawn a, kan hriat chhun leh a tha lo lam sex thlah zalen Hollywood star-te ianga kan society hi thiam taka kan sawisak chuan, kan tisual chhia va ang. He nuna tuihalna thlarau ngei mai hian, Sodom a lo hrai rui tawh a. Tin heti hi a ni a, chu ruihna tenawm chuan Zoram pawh hi Sodomism ah a hruai lut tan ta!!!



Thalaite'n tlei kan duh a, kan thlang sual ta a ni. Tunlai fashion hmanga inawmtlei kan tum a, kan ti zuih a, kan ti arh a. Kan tlangvalte dawr a fual rualin, nulate kap chhak chim chin a sang nghal si a; a fual leh a chhing hian remchanna a siam pawh ni ta fa hmiang kan ti a ni lo. A fual, a fual belh zel a, a kawmawd kalvart a lan ruih tawh chuan, a chhingin a chhin belh ang a. A hnuai hak hlip thlaa, malte zum a thlen meuh chuan, theipui hnah kan hmatheh ve hun a thleng thei kan ti a ni zawk. I harh em? I harh lo a nih chuan, i thu thu le.



Hei hi le...!! Nu tam takin a ruka hak an chak, a taka an hak ngam si loh an fanute an bel a. Pub/party dress-a an fanute cheiin, khawtlhlang nun an lenpui dawklak a, an dawklak hlen ta a ni mai lawng maw? Fashion changkang inbel nia kan inhriatna phen a sex symbol/sex appeal lantir hreh lo nula te hian, a khai fual tawh phawt chu chil puta siam hi pawi an ti lo satliah a ni lo, ropui leh mawi riau ah an inngai ta zawk a ni.



A ni asin, stoking haa kawrfual laklawh tak nena khawlai kan mawi hian, kawng laka tlangvalte chil hák chuan, a sâwn zawnga hmangaihna han hlan leh cell phone video tumkau kenga hmeichhe kapkar panin kawng kan zawh tir a ni lek fang. He lei khawvel dana nung Zoram thalaite, kap chhak leh kap kar pawh zahpui thiam tawh lo kan vulh lian phah ta reng a ni.



Ven ngai kan venna hi a lo chhing uchuak ta deuh a nih pawhin, sual a pai thui lem lo ang. Mahse, mahse kan ti a nih chu...fianrialah ram ri pel pela ralthuam a chetmawi loh rual chiahin, buaina namen lo leh 'Eden huan uniform' ha-in kan awm phah fo ta a ni. Chu chuan a hrinchhuah awm chhun chu, sex video chiah a ni.



Inneihna hian sex chhuan lum loh min hlui laiin, inneih hmaa sex kan hmang lo thei lo a nih pawhin tia Kawhtebel (condoms) hman kan la nilai zan thupui te hian, sex thianghlim aimahin mahni chakna awlsawm zawka puitlinna leh thiam taka 'chi thlauh' min zirtir a ni lek fang a ni lawng maw? te kan ti a ni.



Tih tak meuhvin ka hrilh a che u...tih hluai ka tum lo. Ka han chhût ka han chhût a, sabengtung tuma la chuan lohna Messia'n Jerusalem luh nana a thlang tlat ang khan, tuma la chuan lohna hmeichhia nupui atana thlang tlat kan nih zawngin, hmeithai zinga zang zawng ang mai kan nihte pawh a rinawm ta e!! A mak hran lo...



Mizo kristiante hi Sap nun zira vanram rochun tum kan ni a, a pawina a awm lem lo. Chutih rual chuan, a nâka ka zen phawt loh chuan tia sex thlah zalen an nihna kan copy tel a nih erawh chuan, Kaisara thila kan ngaihsak ngam erawh kan mawh a ni.



Hetia kan sawi chiam chiam hian, a reh thut dawn tihna a ni chuang lo. Kan awmdan leh nih dan kan inpawm a, kan sual kan pawm a tul a ni. Liani leh Liana hian sex video an siam avangin, an sual teh hluai tihna a ni chuang lo-an pahnih phalna a nih phawt chuan. Amah erawh chu, kan release hluai ta thin hi a sual tam ta thin a ni zawk. Chutiang a nih si chuan, hetiang hian kan sermon tlip dawn teh ang...



A dik, hei hi kan pawm ngam a tul. A damna leh a dam hlenna chu NANGMAH ah khan a awm a ni tih hai lul suh. I saruak thlalak pakhat leh sex video pakhat lek khan chhungte leh i tu leh fate i rekhlum thei tih hriain, damna changtu hmasa ber lo ni la. I dam chuan chhungkua a dam ang a, chhungkua a dam chuan khawtlang a lo dam bawk ang a. Khawtlang a lo dam chuan, ram a dam dawn a lo ni.



Chutiang ti ngam leh pen ngam Mizo thalai huaisen, dam leh tlang khatah, thih leh ruam khatah ti thin hnam zingah kan zawng zel a ni...



How worst you start your life, if the ending is good it's Okay...we don't judge you by one mistake....

Kan Khua Chu...

(Mahni mawng kan inhlim dawn ta sa sa, zun leh ek ka thlahdah law law mai thei)

Kan vawkpui Rângi hur thla, ka nu ten Pa Benghmula(kan koh dan) te rama lo hla an neih kuma piang mai ka nih avangin(ka nu sawi danin), kan khaw chanchin hi ka hre bel lutuk lova. Dawt ngial ngan leh thu huihphai tak tak ka zeh tel a ngaih hmel ta viau, ka hriat ang ang leh tlem sawi ka tum dawn a ni.

Kan khua hian mite hmasawn zia leh changkan zia a hmu lo a ni bik lova, kan mâwlna leh kan sum neih lovin min la delh bet mai chauh a ni. Kan tu leh faten hnim buk bawh beta Tuhrik an la kai lai hian, khawpui lama infate chuan nula malngo bawhbet-in AIDS an la kai pheuh pheuh chauh alawm tiin kan la tilpuk thut pui mai mai a. Mahse, awh tinin kan tin pui hauh lova, kan awt bik lem love- khawnvartui hnawihin a dam ve thei si lova.

Mahse e, pawi ta ber chu hei hi a ni. Chhiat tawh ni khuain khualkhua-a kan chhungte'n thuchhe keng an hriat tlai luata, kan tah nin hlei hlui tawh hnu leh ruang phum fel a nih tawh hnua min la tahpui tha leh thin hi a ni. Kan khuaa tlawmngai pawlte chuan kan ngai neih tawh mai a, khualkhua atanga lo kal te erawh kan tihrilhhai lek lek fo reng a ni.

Vanduaithlak tak maiin, kan kamding fapa chu nat lawkna awm hauh lovin a boral thut mai a(khawpuiah sikul a lut thin). A vuina hunserhah khan a thenrualte'n, lehkhathiam awmchhun a nihna-ah hla neih sak ve ngei kan duh a. Sap hla thiam kan awm si lova, mittui tla zawih zawihin a ruang chungah ngei,"Happy birthday to you"tih hla hi kan rak pui ve ruai ruai ta a nih tak kha maw le!! A rilru nat thlakin, rúalawh chu a na ve fak fak thin ngawt mai.

A ni asin, nupui pasal in zawn chungchangah te hian kan awlsam nek a. Hmeichhe chhungte an awm thei em? A pa in a ziak bo ve pha em? Natna vei ruk a nei ang em tih velah kan buai ve lo. Thu pakhat chiah kan buaipui a, kan la sahuai thingvawn a awm a. Chu chu,"A chawn nge lian, a ektum?"tih hi. An nupa hawpkhawp an thlo chhuak thei a nih phawt chuan, khawvel chu a duhtawkin iakin chiap rawh se, a pawi thlawt lo kan ti.

Rinawmna hi kan intodelh ve na zawng tak a ni. A ngal sîn zawkte siam Tala lian pui puiin kan in kan kalh ve ngai lova, a tul pawh kan ti hek lo. Kan nulate pawhin a hnuai hak chi tel lovin, kum kha leh chen kha an lo tamtal pui ve nawk nawk tawh thin a, pawngsual kan la tawk ngai lo. Pawngsual kan tawh tam ber erawh, kan nulate an thu sual ve zeuh zeuh hi a ni mai awm e. A ho e, a na lo em mai kan ti ve tlat.

Ni e, kan hria alawm, kan hai bik lul love. In tu leh fa te'n an keartui an kam san zia, pawnfen san zia leh van san zia te. Kan Lo hla lama Nghalrual eiruk hrat ang zia zanga, eiruk hrat te in awm tihte nen lam pawh. Hei pawh hi kan hria asin, Educational Qualification leh Mark aipawh a, Political fitness a hlut zawk zia te nen lam pawh ti ta ang ila,"em em a che u"min ti hial ang.

Heti chung si hian, kan lo hetih vang a ni ang e, hmawlhte ngei maia kan hnawmhnawk kua hruk pawh kan la zak chuang hauh lova, kan la bansan thei chuang lo chu a nih hi. A thing lutuk, in zak lawm ni inti maw? Aih zak love, kan zak thertê lo. Khawpuia thalai tam zawk an nu leh pa te chawm hlawm, hnathawk peih mang si lote aia kan thinna leh kan zahna tur hi kan hre bik lo tia ân hrep kan chak ve a. Mahse, kan áng kher lovang.

Motor te hi kan hmu khat khawp mai. MLA inthlan hmasa daih tawha kan hmuh kha, kan la hmu leh ta miah lo chu a nih tak hi. Kan khuaa motor kan hmuh hnuhnun ber tum kha, kan arpui Tiali'n phir a hrin kum a ni nghe nghe a. Kan uipui Buangi pawn a khawlai fa, a vawi ngana tur a pai mek bawk.
An lo kala aurinnain thu an sawi a, kawngtha kan lai ang, in thlai tharte kan lei vek ang min ti a. Kan kut kan lo beng thlawn zing tawh a, a tak ram sakuh ser nghaha kan nghah chhungin, fanau dum nil nel leh chang fik fek pali nga vel kan lo hung thlih thliah hman ziah a, inthlan a ni leh chhawm mai thin. Dawt han sawi te hi an thiamin, an lo huai nek hlawm leh nghal a.

Tap chhak plan hi kalsana kap chhak plan (family planning) te hi kan la rawn dai pha ve a nih ngai chuan, kan tu leh fate ngûm a la khâk reng ve tawh lo mai thei asin. Kan la vanneih viau phei chuan, Choak-in chhangphut te pawh a la daibaw ve thei tho. Tunah hi chuan, tlak lam vaihlo a rû tui zawk tih bak hi kan la tuipui pha tak tak lo. Engmah min hrilhfiahin, min sawipui duh kher suh u, kan man pha leh pek lovang.

Hun a la inher danglam ve ang a, zángkhua pawh a la thingthi ve ang a, zawhte pawhin chîk hun a la nei ve chek ang. Chutih hunah chuan, Ukulele D key pachal ngei maia arkaiden zana wholesale leh retail-a, kan kutpui ur thin"Derna anka"hi kan la tin san ve tawh ang a. Loan puk ringawt hi din khaw chhuahna a ni lo tih pawh kan la rawn hre pha ve tawh ngei ang. Kan tu leh fate pawn intih ang, hriat ang leh ruih chilh ang hi an la rawn tuipuiin, an la rawn ti pha ve mahna le...

Her wedding dress

Kharpui Biak In a inhawn rualin, a inneih kawr fual var nen a In a rawn inhawng nghal a. A chhipa samzai inzam chiat leh a ke lera kezungtang chena hliahkhuhtu tur leh thuruk tam tak thup bo tur a nei a mamawh.

A diar var kual raih leh langtlang de sep sep hmaikhuh hnuaiah chuan, mihring darthlalang- a hmel a awm. Chu chu vawiina inneih kawr fual hak tir tura ka thinlung nawr lui tlat tu pakhat a ni lawi a. A man a to lua e...

A hmel ka ngaihzawn leh hmangaih piah lamah, a thinlung thunawi hriat theihna tura khawl ropui; a thinlung zawm tlat tu a a awm. Chutah chuan rangkachak thi, sêlna leh ka rila rah te an la uai ang a, mi nghaisakna hmanraw hlauhawm pawh a la ni thei bawk ang. I man a sang lua e...

Chu hmanraw ropui sir tawn tawnah chuan, a kutzungtanga zungbun ka bun tirna tur khaikhawm tu ten an hual a. Hnam tinte than lenna leh puitlinna, hmeichhiate ti hmeichhia tu; mipa te'n an neih ve loh chu a âwm bawr tawn tawnin an ding a. Chu chuan patling thankin tawh hi, min la ti naute tha leh lailawk dawn a ni. I man a to lua...

Pt, khawnge i awm?

Pt-i a ni a, a nui sèn sèn reng a. Ngo lampang, sa inphut mawi tak a ni. A nui timawi zual turin biangsum a nei a, a nuih a piangin keimah min nuih emaw ka ti thin. Min melh a, a nui sak a. Engtin nge ka lo tih thin tak kha le aw tiin ka inngaihtuah let leh pawh hian, ka hre thei tawh lo.

A nui, hmel leh ka laka a lantir thin thil tam tak a lo inphum ru tih vawiinah hian ka hrechhuak ve tan dawn chauh lek fang a. Ni chhuah atanga ni tlak thleng pawhin, a thinlung mai ni lo a hmel lang theiah khan thuruk min hrilh duh a nei tih ka lo hre hauh lo a nih kha maw le. Khang hunlai kha tukhawm dawm meuhvin ka ngaihtuah let chang hian, ka suangtuahna mitthlaah a la cham thin a nih hi.

A thuruk ril leh tha pui pui lo hmuh hmaihsak tlat thin tu kei hian, hmangaihna ka chân a ni. Min siai zeuh a, a nui sèn sèn a; ka chhanna a beisei tih engtin nge ka hriat loh theih mai le?

A hmui a seh neuh neuh lai ka hmu, a la nui hram a; a biangsum leh a hmel han inkawmngeih zia kha aw. A hmel khal mawi tak kara, min siai fo thintu a mit kha a va mawi tak em! Khatah khan chatuan daih tur rinawmna leh hmangaihna a awm ngei awm si a. Khati taka ka laka inzep thei lo leh insûm thei lo, mitmeng leh thinlung hmu thei lo tura min dawi â tlattu ka thinlung hi ka dem fo thin.

Perspective

(Zirtirtu nih hi ka tih chi a ni lo, zirtir tur ka ni zawk.Chuvangin, thil inkawlkalh deuh deuh ka sawi dawn.)

Hei hi i hre tawh a, ka lo hre tawh. Acid leh Base a in react apiangin, product ah Salt leh Water a chhuak ziah a. Acid(thûr) leh Base(khâ) kha, Neutral ah a chang tih na a ni. Chuti a nih si chuan, Party lian pahnih Congress leh MNF hi in react ta se Neutral Party awhawm tak a chhuak ang em?

Khawvel temperature sang tial tial avang ngawt a kan nulate hnuai khuh hi sang tial tial a ni lo, kan nun a sang ve tawh tawk tihna a ni. A feng chhing hi i hmu khawlo ringawt lo ang u, fual tak leh hnufual taka kan awm chhung chuan a fel lovang. An inhmeh leh hmeh loh chu thuhran nise, a hmeh te'n an inhmeh chuan a tawk, kan feng chhing te hian khawvel an thlir sang tawh tihna a ni zawk daih asin.

Hello Tomorrow

Kan thurin bu-a SAM ziaktu chuan, "Kan damchhung kumte chu kum 70 a ni a, chakna avangin kum 80 pawh a ni thei" tiin a sawi. Chuti anih si chuan, ka damchhung kum tur hmun thuma thena; hmun khat ka hmang liam ve thuai dawn tihna a ni ang.

Ho mai mai

1. Engkim mai hi ka ta nise, KA VA HAN DUHAM TAK.
2. A kal ngaiin a kal reng a muang chuang lo-HUN, TUILUANG LEH SONA.
3. Thir chu a LIN laiin chhu rawh.
4. Hlauhna hi hlauhna a ni lo, kan NGAIHTUAHNA mai mai a ni.
5. Hnarkua aia mawngkaw zau nazawng an KNOWLEDGE a zau kher lo.
6. I pa tê min ti maw? I sawi dik ka pa lian lo tlat alawm-Mahse, Vawk pawh no a neih hnuah a THRAN belh an ti.
7. I hmelchhe lo, a hmutu MIT zir a ni zawk.
8. I rethei lo, i hausak zia i HMU-IN I CHHÛT thiam lo a nih chu.
9. Zan a lo thleng mek, muang lovin bei ru- A VA SEXY VE.
10. Ka tling zo lo, ka neih zawng nen-I VA HAN KHAWNGAIHTHLAK VE.
11. Si-ar sing sang sawmsarih lak ngai mah se, ka zuam ngei ang-LA THEI MAH LA, KHAWIAH NGE I DAH CHUAN ANG?
12. Ka thlan laih zat mi an la thi lo-DAWT VEK. (ka la gangstineu ang...)

Ms-i Tan

Hmanah chuan e-

Hawilo par zai tin thiam,
Zofa leng thawi dam tu,
Aw rawl hnuntui a thlum ngei e,
Lengzawngte chiar nghianin,
Awih lai nau ang nui za e.


Awih lai nau ang nuih za lai chuan e-

A khi ramdai Ngirtling iangin,
Nau hnáwn aw rawl dai zo ta,
Thliah loh hawilopar chuai e,
Par zai reng rel tawh dawn nem maw?
Ridim khuavel hnuchhawn zo ta e.

Lunglengte lunglenna lunglen

Lunglen atchilh mi ka ni hi ka indem love. Hla phuahtu leh ziakfung chawitute suangtuahna leh hmanraw tangkai chu lunglenna hi a ni. Thu leh hla tha tak tak ruhrel dinchhuaktu pawh lunglenna tho a ni.

Zing ni chhuak engmawi êm ém ti engmawi zualtu leh lunghnur taka vanrang chhumte an kal mawp mawp lai pawha, hlu chungchuang pawh lunglenna tho a ni. Hmangaihte inkawp rem lai leh hmangaih avana inthen tawhte tana hlu chuang leh mihring min ti famkimtu pawh a lo ni e.

Chhun pachang ni sat vawl vawl lai leh zankhaw tairek chena min kalsan ngai hauh lotu a ni reng fova. An sawi Berhva leh Rengchal te ti tap a, ti kiu tu pawh lunglenna bawk a ni. Thal romei zamchiai ten tlang leh mual mawia, an bawh pawt chek timawi zualtu leh ti romei tu a la ni cheu va, mual hla kar dana kan di pawmlaite hlimthla min hmuhtirtu chu lunglenna chauh hi a ni.

Haw nghal rawh

Ka nu’n a Chingit zawrhna ngei maia nalh leh tha a tih vang ni miah lova tlawm a tih êm avanga T-Shirt Second Hand sawrkar hmasa zawk hun laia min lei, kum thum zet ka hak tawh hnu pawha ka nin theih loh nghawng zau tawh tak nêna ka han intam ap chuan ka en tlak ve fu. Hre rawh ka nu aia min hmangaihtu an awm lo.

Khawnge zanin chu ka rawra chawh chak bill ngei mai ak chungin, a zan zanah Sava(nula) perhthlak tur zawng teh ang tiin-ka kekawr hmanthiam leh chapal inkhing lo bun chungin sezawl chhuah ve rap teh ang.

Thiandang ka sawm dawn lo hrim hrim, ka hmel that uchuak vang pawh ni miah lovin zanin chu ka confi ve tlat.Thiante an tel ve chuan chance min pe thiam lovang a, kei aiin a lo duh zawk te a ni thei.

"Heti zawng hian"

A nei nung nung, a feng chhing chhing an nalh a. A nei lo lo, a feng fual fualin nuih an ti za thung. A neiten an neih belh tun tun a, a nei loten an tuar zel a. A neinung leh thiltithei ten tlawn an hlawh a, thei ve lem lote kan rap bet zel e.

Hlawh a pung a, mistiri hlawh chenin a pung a, thil man a pung bawk a. Pawisa hlutna a tlem thung a, a lei theih a tlem ta. Lak aiin pekin lukhawng a nei tih kan hria a, pek aiin laksak nun kan up hmin a. Thuneihna leh chakna in ram kal kan siam a, thuneihna kan chên a, chakna in kan thiat mek a ni.

Thuneih leh hruaitu nih inchuh reng rengin kan hun kan hmang a, college-a Student’s Union thlengin eitur leh eitheih zawngin kan meng hru ta. Duhamna leh itsikna in kan khat a, kan ngaihtuahna tenawm hmangin tual kan that a, kan uire tawh a nih hi. Hmingthatna hi sum in a lei theih loh tih hre reng chung siin, a sexy leh herh thei ang bera thla la kualin, video hial hmuh tur a tam. Damchhan hre hlek lovin damrei kan thlahlel a, tap ru chungin kan nui der niin alang.

Retheihna

Hringnunah rualpawl chákna leh ban phák nih ka duh ve si a, rethei taka zirna han chhunzawm chu a har ngiang e. Tuarna phena malsawmna an sawi kha ka hre ve bawk. Mahse e, malsawmna chang tura tawrh hi a nep hauh lo.

Van ruahtui tla zawng zawng hmuam vek tum ang zia zanga ka an phuau tawh hnua, hmui dul pir per leh há 32 zet pawng per pura hmuam ka ni tih ka inhria. Leilung zawng zawng ka rap lovang ti ang zia zanga, ke zungtang panga lek pawh parh tha tak leh vawkte pian an sawi ang maia “áwm fek, dul kiar” la nih leh ngat phei chuan; zirna bak ka tán eizawnna leh nupui hmuh ngaihna a awm lo.

Mi In hnuai man tlawm thei ang ber tawp fip fepa, chengkhat pawh kawl lova ka thut cháng kha a tam lutuk. “Chengkhat kawl lo chu lu meh kawlh” tise zawng, ka lu a káwng zing malh malh viau ta ve ang. Chhungte rinchhan ngawta awm chu a inthlahrun awm a, ring pawh ni ta réng ila – rintlak an awm chuang lo.

Hmangaih Hrangkekuali

Chutih lai chuan tlai ni tla tur a sen ruai lova, khuangruah pawh a sur hek lo. Dawt ka sawi chiam lai hian thli erawh natakin a thaw heuh heuh mai thei.

Ni e, khang hunlaia kan vawikhat inhmuhnaa ka hmangaih lutuk che i ti thei kha a mak ka ti reng a ni. Khatih lai khan hmeichhe pâwt peih leh laktlak loh i ni tih hria ila tha tur. Heti teh hrep hian min lo Fiamthu Huang bawl mai mai hi chu, i nung ve hle in ka hria.

Kan pahniha kan inkawm thin laia, sawi tur i hre lo thei lutuk kha i dangawk vangah ka ngai thei lo. Korean Serial film bak sawi tur i hre lova, a Mizoram lo thin ngawtin ka hria. Kan inchengkawl fawh apianga ka khabe hmul pathum i sehthlak tel ziah lai leh, ka bek hmul i pawh thlak tiar tiar thin laite, ui chung chunga ka zakhmul i pawt thla tel ziah bawk kha min lo deu hle niin ka hre ta. I pa theithur eiin i ha a ti tim tih ka hre chiang khawp.

Kan rûm e

Lal lungawi kum leh a lo kal nghâka nung si, nun kawkalh hringnun mawlh hi ka hua. Fak tlak chauh fakin, a awlsam chinchiah ah kan nung a. Lansarh a harna kan hnuchhawn leh si - nun kawkalh chu a ni chiang a ni.

I sunday incheina man to, i pheikhawk, puan, perfume, kawr leh adt. nêna i nun lem thup bo tuma Biak In ropui i pan lai khân, min hmu lo der a, min nuihsawh a ni lawm ni? Kan rilru a nâin hrehawm kan ti a, kan rûm a ni. I mi nuihsawh ai mahin kan nuihsawh che tih hre rawh. Keini chuan tuilai rapa nun hman ai chuan kan lum law law zawk a ni. I duhthlannain kan hliamte tuam dam turin kan lamah vawikhat pawh i lo pén ngai em ni? Fanghmir hliam tuam dam tur chuan mihring chu kan lian lutuk a, fanghmir bawk an tha. Keini ruihhlo ngaia tah hla rem a rumte hian, van Angel-te tanpuina leh puihna kan dawng dawn lova, nangmah kha i tha ber. Biak In chhûnga i thut lai khân nang leh i chhungte tân i dila, kan tân i ka i ang ve ngai si lo.

Ka fawp ve ngam ta

Ngaihzawng la nei ve ngai lo na na na chu rin aiin zei a har phian. Ka zei loh a hlei ah he thu hi ka ziah phah thei ta zawk a ni. Mahse, a pawi chai lo. Tunge piantirh ah zaithiam a zai nghal a, recording nei tawh i hre chuang em ni? Piantirh a corrupt nghal an awm chuang em ni? tiin bul tan phawt ang.

Nia, khatia han bum thluk tak ah kha chuan a nuam ve ang reng khawp. Han rim ve changa sawi tur a vang thei khawp tih loh kha chu. A bula inti neitu taka han thut chawt pawh ka chak ve tho. Mahse, min kawm tlangnel tumin min ti ti pui liam ang a, sawi tur ka hre awm si lova. Min ngaider takin ka kutah min rawn vuan chut ang a, inleng dangte leh an chhungkaw hma ah ka te tuar ang tih ka hlau bawk si. Kei misuala hi ka lo va nep tak….

Zanin chu len rei lamah ka chak dawn tho tho. Inleng dangte leh a chhungte an mut hma chu ka thu ngawi ve char char dawn hrim hrim. Vur a tlak hma chuan ka haw dawn lo a ni ringawt. Kei misuala hi khawnge ni….

Aw Hmangaihna

Aw, hmangaihna-

I natna khirh tak avangin lungngaiin i tap a, “Tihtheih kan nei ta lo” tiin Daktawr meuh pawh an beidawng a. Nunkawng bumboh leh hreawm i hmang mek em ni? Beidawng mai lo la, i rinna beidawnna káwlah liam tir lul suh. Tuar fan fan la, naktuk a lo la thleng dawn. A damdawi an hmuchhuak mai thei asin.

He khawvel lungduh inthenna ramah hian, i lungduhte i then a. Hnukchahna khawvelah hian, hmangaihte hnuk a chat fova; i hnuk pawh a la chat ang. Mahse, khatia indawm kun reng lo khán, han dakchhuak teh. Heta hi- aw hmangaihna.

KS min ti maw?

(Tu pawi ka sawi em lovang chu. Suangtuahna chhul chhuak mai a ni a, zirtir chhete erawh a nei ve e)

An Khuaah Ramsial

(He thil hi a tak taka, thingtlang khaw pakhata thil thleng a ni.)

Sihal hmutu pa kha dem chi a ni lova, dem thian pawh va ni suh. An tawng chuan Sihal kha Siel a ni miau, Sial tak takah an ngai atin nih kha. Ngai lo chi pawh va ni bik suh, Siel tih kha Sial tih nen a inang em lah bawk a.

Siel kha Sial tak takah an ngaih avangin, an khawtlang buai zova. Siel kha Sihal tihna a ni tih hria se zawng, buaina an pumpelh tihna a ni mai dawn si a. “Zu rui a man a, a mantu pawh a rui. Magistrate hnenah an hruai a, magistrate pawh a rui tho” an tih ang vel a ni. An chiang lo vel vek.

Zinkawng Rapthlak

Introduction to Zinkawng Tuboh-

Fam ta lo na na na chu, ka la dam tek tek a nih hi maw. Monu thlaha kan zin chanchin hi, ka’n hrilh mai mai teh ang che. Kan monu thlah ka thihpui thelh nia le, ka thihni a thleng lo chauh kha a ni si a.

Remchanna avang zawkin, hmeichhe khaw lamah “Tiam dun e” an ti ta mai kha a ni a. Mipa zawk khawlamah an hawng lo thei si lo, kan thlah ta poh a nih kha. Keia pui roh, engmah ka nih loh teh vei nen; i lo kal ve ngei tur a ni an ti tlat si a.

Bike lei ka ngen ve a

 Chhungte’n min hauh vaih chuan, chaw ngheiin fanghmir kawng bo nilenga thlir peih; luhlul tawpkhawk kha ka ni ve a. Bike lei ka’n ngen tak tak mai chu, pui niap niap tak a ni.

Newton’s 3rd law of motion kha ka vawng ve tlat a, “To every action, there is an equal and opposite re-action” tih te hi. Min tih dan equal leh opposite zelin ka’n che tak tak mai chu, an buai teh a sin. Science min laktir kher a nih kha, ka thil thiamte ka nitin nunah ka apply mai loh nakah.

Ka lo ruih em vang a lo ni

Mizo hla hlui tha tak tak heng- Lalrintluanga Varte-Ka nghei dawn chuang lo, Lalbiakzauva-Zuapa a rui e, Lalkima Zote-Ka lo ruih em vang a lo ni, leh a dangte hi up bo mai atan chuan a pamhmai ka ti deuh.

Ngaihtuahna tam tak min neih tir a, a hla thu thlir pahin; ka rilrua thil awmte han pawt khawm dawn teh ang. Lei em ka chawi em lovang chu maw.

Ka bialnu German Chhanchhuahi

Thutak ka pai loh thu leh ziah tur ka hriat loh thu bawk a, bul tan a ngai leh ta. Miten A tirhkohte tluk zeta chanchintha an phuh zut zut lai a, thu sep sel të të ka lo bê pui chiam thin erawh ka inthlahrung a. Mahse, a pawi lo sik sik em mai; mi thutak pai lo leh hrelo ve te.

Uangpui chang suh i, kawmthlang pitar zangkul lam tawh pawh hmutai lek lek thin hian; online dating velah chuan tlukloh rim leh agarbati rim te pawh ka nam ther ther ta ve ang. Ka hmelthat vang leh hmui hawlhkalh kual thiam vang pawh va ni suh. Hmelchhiat leh tawngkam thiamloh avanga Tax chawi tur chu ni ila, chhungte an hek ve tawh khawp ang.Aw, hello..

Nupui ka neih hun chuan

A hautak lo leh insen tul lova insen ka tum lo, inneih nghehna a ni lo tih ka chiang khawp mai. He thu ka ziah avanga ar chuk tui lo khawpa min chuk pherh diai diai duh an awm ta ve ang. Min khengbet duh an awm mahna le, ka sam zuah sei thin lai ngat phei chu nise.

1. Inneih card changkang ka sem ring duh suh, ka sem dawn lo hrim hrim. Ka sem a nih pawhin, Typewriter ngatin ka chhu ang.
2. Ka thiantur chhiar telin, thian panga bak ka sawm dawn lo. A tul lo.
3. Hmeichhe lam pawhin panga bak a sawm tur a ni lo. A bak chu a chenpui tak tak te an ni mai.
4. Biak In hawn buai a tul lo. Kawmthlang Balhla huan kan nei alawm, dawhkan pakhat leh khuangte kan keng ang a; a tawk khawp. Kan thiante leh chhungte chu Balhla hnahah an thu sawp niai mai dawn a ni.

Hei le foreign!

Keia kara Chepahakhata, khawilai foreign Airport vela kan tum thu ka ziah ring suh. “Rih dil tlawh thu” tia dah ka tum zet a, Mizoram dil lian leh hmingthang man chawia Burma rama en a ngaih tlat si avang zawka, “Hei le foreign” tia dah mai ka ni.

Mahni sum seng miah lova “Ram fan thu” ka ziak a nih lem loh chuan, a pawi lo; la na vak duh suh. Chubakah, foreign a ni ve tho alawm, MLTP Act an hre ve tlat lova. Ka zawt chuang lo nain, a nih ka ring thla ngawt.

Kan Bus a len deuh leh kawng a chhiat deuh avangin, kawng hnai zawk lamah kan kal thei lova. Seling lam atangin Champhai kan pan thla a, kan bul tanna atang chuan; km 400 vel a ni ang. Tlungvel Quary vel kan tlan lai ka hre reng, kan motor kha Bus nge, Truck nge ni a; mau rap in tih hriat hran har khawpin vaivut in min bawh. Khu tiap tiap tak a ni.

Ropui takin he Vawk In hi ka hawng e

(Kumthar Chibai phawt u le)
Old stone Age hnungkhirhin, Computer Age ah min tlat tir a. Computer hmanga Rawra chhut kan thiam hman tep a, Mengrei Generation ah min siam dër a. Change Generation-ah min hnuk lut leh a, Mengrei generation te zing taka thawha insawizawi ai chuan; a zawi saa thawh nuam ti vek kan la ni tih ka tum.

….Ang
Nikumah ni 365, kum inah ni 366…Eng thil nge thleng ang?
1. Sex Video leak a awm leh ang.
2. Vai pathian kan be tawh lo ang.
3. Zaithiam aiin zai thei kan tam leh ang.
4. Kum a thar a, kan nun a thar leh chuang lo ang.
5. Facebook kan atchilh a, kan in Sazu leh Zawhte thlengin Account kan hawng ang.

Thlaler Chungu Zaipawl

(He thuziak hi Baptist Boarding School-a thawk mekte leh thawktawhte, zirlaite leh lo zir tawhte tânka hlan e)

Kum tam a liam tawh hnu hian ka lung min len thar tlat. Kan zinni thlaler ramro-ah khan Visa a pawimawh lova, passport atul hek lo. A tirah Bus in kankal a, a hnuah Jeep in kan kal leh a. Sakawr hman ngaihna a awm leh a, a tawpah pipu in kan uai lut hram ti ila dawt tlem ka sawi tihna a ni dawn si a.

Ramthim sikula ka luh lai a ni a, thlaler ramthima rawngbawl tura tih kan la ni cheu. Rawngbawla ka chhuah hmasak ber a ni nghe nghe. Kan ngaihtuah vang vanga, zaipawl anga kal tha ber niin kan hre ta a.Mahni hla pawh sak thiam apui neih loh nak alaia, hnamdang hla kan han zir mauh mai kha chu rin aiin nal a har.

Nuthlawi zûn

Bawng tar pawhin luang no tho a duh an ti a, kei luang no hian; nuthlawi pawh zuk duh ve tho a. A pawi reng reng lo. Ih ih, lenlaia ruallo hi a sawi rem theih an ti alawm. Sawi rem thei ngut ang maw? Khawnge thlawi law law chhai hi, a fair zawk an tih tho kha.

Len ve ngei ka duh thin. Ka len loh chuan, ka hnimhnai thei lovanga, engtikah mah blanket hnuaiah kan hui ha pap pap lovang. Mahse, han leng ve ngawt pawh nita reng reng ila, artui min lo chhum duh chauh emaw a nih ngai chuan; tlangvala hi nula inah Artui a khel ruak ruak ang tih a hlauhawm ve tho.

Thianpa James Bond

A nunah entawn tur leh ei tlaka nun mawi a awm lem lo. Fak tlak a awm hek lova, chawimawi tlak pawh ni hek suh. Mahse, a thianpa ka nihna changchawiin ka ziak ve hrim hrim dawn.

Kan zawt lem lova, kan zawt peih hek lo. Ka hming chu a bul atanga a atawp thlengin, zep ruk leh zep then awm miah lovin James Bond a ti miau. Tun thlengin kan la pawm chiah lo nain, thianpa James Bond ti bakin kan ko ngam chai lo.