An Khuaah Ramsial

(He thil hi a tak taka, thingtlang khaw pakhata thil thleng a ni.)

Sihal hmutu pa kha dem chi a ni lova, dem thian pawh va ni suh. An tawng chuan Sihal kha Siel a ni miau, Sial tak takah an ngai atin nih kha. Ngai lo chi pawh va ni bik suh, Siel tih kha Sial tih nen a inang em lah bawk a.

Siel kha Sial tak takah an ngaih avangin, an khawtlang buai zova. Siel kha Sihal tihna a ni tih hria se zawng, buaina an pumpelh tihna a ni mai dawn si a. “Zu rui a man a, a mantu pawh a rui. Magistrate hnenah an hruai a, magistrate pawh a rui tho” an tih ang vel a ni. An chiang lo vel vek.

A dam that loh avanga a ramkal haw chuan, Sihal kawng kán a zuk hmu khangláng. Khua a thlen chuan a mi tawh hmasak ber hnenah, “Daiah Siel in kawng kán maw le” a ti mai si. Siel chu Sial angah changchawiin, a hrilh pung ta hluai a. An khawtlang buai tan ta…

Tlangau a rawn áu ta lauh lauh mai. “Tun maiah khán Sial lian takin kawng a rawn kán a, mipuite chhuak lo turin kan inhriattir a. Tin, patling awm zawng zawng Hmar lam veng tawpah kal khawm nghal vek tur a ni e”

Pasaltha zawng zawng an ramriak vek mai si. Silai khawih ngai reng reng an awm hauh lo. Silai awm zawng zawng an khawn khawm a, panga chauh a ni. Silaimu lamah an buai leh ta. Original pawh chu ring zo lovin, an siam tha. A zén an thun belh a, musep zawng zawng mupui-ah an thlak ta nghawng nghawng.

Thalai tlema phawk deuh lam deuh chuan, an khaw pachak nia an sawi chu a ke a man tir mai duh chin an awm. Airgun nêna a mit lo kah del tum pawl nên, sairawkherha perh pawp pawp tum pawl an awm bawk. A then khama um liam thak duh an awm bawk. An chiar nuah nuah a.

Pa pakhat a rawn dingchhuak a, phuahchawp baksakin hlado a rawn chham ta-

“Sechal lunglian huangtau e,

Dai vel e, valrual tho ru;

Thuam ang do kan ti,

Khua leh tui thlahual e”

an kut an béng hluah hluah a.

A chham zo ta. “Tunge Tualvungi ko ang?” Tuman an chhang lo,Tualvungi ko tur an ni lo tlat. “Tunge Sial káp ngam ang?.” Pakhat a rawn dingchhuak a, a hrenpereng a pawt mar ten tawn a. “Keiman ka káp ang.”

An ulhbun silai chu a ulhbung rap a, mupui ngei mai a thun. Silai chèngah a kutzungtang a rawlh, van lam hawiin a tin. A silai káwm chu a darah nghat ta mai lo chuan, a zakzeh ta chuih mai le.

Eh…..i tla…..hmm

Pakhat arawn ding leh a. A kekawr kawnghren atana a hman, mau hnang chu a tawn nghet sauh va. “Keiman le” A han ti chhin vel, a zei fu. Thlan loh phal chi a ni lova, thlan loh ngam pawh a ni tawh lo-an thlang ta. Kap ngam tur panga an nei ta a, a chan dan an remruat leh ta.

An hmaiah Commando takin, meihawlin an inziak rang nuau va. Ram hmangaih kawr an neih ang ang an ha theuh bawk a. An che na khawp ang. A kawng kanna-ah chuan, a huaisen zual pahnih an thu ang a. An hmuh rual rualin an kap thum zawt ang.

Hmar lam zawng chu kham chhengchhe tak a ni a, chan a ngai lovang. Chhim lamah chuan, silai pathum nên an cháng bawk ang. A theih anga tam chu kawngpuiah an awm ang a, silai a rik hmasakna lam lamah an tlan khawm vat ang. A thi lo a nih chuan, chempui nên an ti tawh mai dawn a ni. Fei an zum theuh bawk a, an that thei ngang lo a nih chuan khàmah an úm liam thak mai dawn a ni.

Pasaltha pangngai awm ta ngang lo chu an chhuah dawn tak tak chuan, an zam rilru leh deuh lawi si. Hetiang taka tlangnel chu a tha lovang e, kan nunna te kan chán palh ang tih a hlauhawm e. A hmutu pa zawt chiang leh phawt ang an ti a.

Dam lo khur bauh bauh chung chuan, patling awmkhawmna lamah chuan a kal phei ta. “A lian em, a kawlh hmel reng reng em?.” an ti a. “Lian lutup maw le, keimahni kap loh chuan Ar zawng zawng seh vek dawn” a ti ta heu mai.

Thinrim tak chuan, “Sialin Ar aseh ngai a mi?.” Mai mai a. “Siel lawm, amah chu zanah pawh û bak bak nia.” Sihal a nih chu. Aw, Singal chu keimah tawng chuan Siel lawm.

“Zuapa lungmawl Lambachia, ka kap dawn sial, Siel chu Sihal maw .” Tlangvalho phei chu thinrim tak an ni. An hawng tau sap sap a. An inpuahchahna zawng zawng a ho zova, nuihzatthlak maiah a chang zo ta a ni.

Khawtlang mipui titi ber a ni ta a. A hmutu lah a inthiam lo duh bik der lo. A khawlai kal pawh, naupang ber thlengin “Pu Siel-a a lo kal” an ti ta vek. Tihngaihna dang awm hel lo le, “aw keimah siel”. Khawtlang mipui buaina atan chuan, Sihal chu a nép deuh a ni e.

He pa hi a thilsawi hi a mak reng reng thin. Vawikhat pawh a Leipui-ah Sakhi a hmu a. “Keimah leipuiah Chakhi lo kal a, keimah hmu chiah lau lutup a. Amah chu zuanga zai a, zuana zai leh a, zaia zuang leh a” a lo ti leh tawh niawm tak a ni. A hûk a, a zuanga, a huk leh thin a tihna ve kha a nia. Mite nuihpui hat khawp thil hi a hmu thei reng reng.

Engpawh nise, a ni tur a ni zo tawh a. Nuih pui lawp lawp bak tihngaihna dang a awm lo a ni ber e. UFO, Bermuda Triangle tih vel aichuan a khaw mite titi sawi tam a ni a. Tun thleng hian, titi ngaihnawm a la ni ve reng tho a ni awm e. An khuaah chuan Lallianmawia, CFL Hmingthanga…adt. te an lar ve tan dawn chauh an ti…lol