Ka bialnu German Chhanchhuahi

Thutak ka pai loh thu leh ziah tur ka hriat loh thu bawk a, bul tan a ngai leh ta. Miten A tirhkohte tluk zeta chanchintha an phuh zut zut lai a, thu sep sel të të ka lo bê pui chiam thin erawh ka inthlahrung a. Mahse, a pawi lo sik sik em mai; mi thutak pai lo leh hrelo ve te.

Uangpui chang suh i, kawmthlang pitar zangkul lam tawh pawh hmutai lek lek thin hian; online dating velah chuan tlukloh rim leh agarbati rim te pawh ka nam ther ther ta ve ang. Ka hmelthat vang leh hmui hawlhkalh kual thiam vang pawh va ni suh. Hmelchhiat leh tawngkam thiamloh avanga Tax chawi tur chu ni ila, chhungte an hek ve tawh khawp ang.Aw, hello..

“I la tho na nge?”

La tho nang..

“Ngati why?”

Nizan mi ka Chat leh a..

Hetiang hi ka ni zantin fo. Hei mai hi a ni lo, fb, sms, e-mail leh ibibo thlengin ka vilkual thin. Kei Rinawma hian, rinawmna chu a tlachham i ti ve em? Ka thian bik Chhanchhuahi hian a chhanchhuak ngut ang em le? Hei erawh ka chiang a, i chiang. Rinawma hian rinawmna a tlachham a, Chhanchhuahi hian mi a chhanchhuah ring duh suh.

Nia, kha zan ber kher kha, a fuh thlawt alawm. Inhmuh kan rel ta rup asin le. A vai film rem rem khawp ang.

A insawi danah a pian a nalh em avang leh a hmelthat em avangin, hetiang hian a inchei ang. Pawnfen censor part lang lek leka chhing a feng ang. Boot rawng sang a bun ang a, T-shirt a ha bawk ang a. A awmah “Good girl gone bad” tih chuang ngei a ha ang. A bag-ah make up khat tunin a thun ang a, inti office kal tawkin a lo kal dawn a ni.

Kei ve thung hi, kekawr zuih mai ka duhtawk lovang. Skin tight ka ha duh hial ang. T-shirt ngei ka ha ve tur a ni a, “BaD bOy” tih a chuang vah tur a ni. Ka perfume hman ka thlak hial a tul ang…AXE (Even an angels will fall) ngei kha. Ka sam chu, i hrethiam vek…Emo.

Kawthalo damkawr ka nih avangin, ka fimkhur a ngai; in ah ka lo vawih lawk vek ang. Ka tihtur i hre tawh mai em? “Ngei Ngei” tlangah, kei Rinawma hian rinawmtakin ka lo nghak ang a. Chhanchhuahi min chhanchhuak turin a rawn kal mai dawn a ni. Music..tren tren.

Pythagoras theorem ah ka buai lo. Sin, cos, tan..hmangin building san lam, tehkher ngai lovin ka chawkchhuak thiam. Chess ah, an chet dana zirin; chet thum lekah pawh mi ka check hlum thiam. Awm awl mai mai a, chaw ei tawrh pawh ka ka buai lo. Ka sawihmaih thelh, ka inchhuanna ber chhungte bumah pawh ka PhD.

Mahse, hei erawh har ka ti a; ka thiam lo a ni. Vawikhat inhmuhnaa “I love you” han tih puam tûlh hi.

A lo thlen rual rualin ka thingthi rap ang a, Sahdah ka dil mai thei. Eng nge ka sawi ang? “Hi, hamara bharat” Aaa..a thing. A nih leh “Eating betlenut, no pa pa” A naupang chhia. Ka hria, “I nalh tawps, ka zo lo” Aw, hei hi a tha. E, eng nge i thawhthin min ti daih se. A pawi lo, a ti lovang.

Mahse, mahse..engtin nge ka thingthit ang? Ka khup leh lam ka phah hniam ang a, lehlam a kangsang deuh tur a ni. Hei hi a tha, a hmel a lo inhmeh vak lo te a nih vaih chuan; sam bu lawp lawpin ka tlansan ang. I samah lo tham ta se? Aih, tham lovang. A tham hman ring suh. A tham hman lo ang.

A lo thleng ta. “I nalh tawps, ka zo lo” ka lo ti dawn a ni. A re, a re..ka hmingthanpui hmelchhiat a khum nia. A sam a tui ek, a châwn chu duhawm piah lama duhawm a ni (i châwn en kher suh). A sam chu a rawn boys cut nge, horse cut nge, satel cut pawh ka hrenek love.

Ka thianpa thu min thawn chiang em em mai hian ka hrechhuak. “Nupui/pasal i zawnin, hmelah zawng suh an tih che chuan; hnek pawp rawh. Hmeltha hmelthat chhung chu a rei lo a ni thei. Mahse e, hmelchhia hmelchhiat chhung chu rei tak a ni r…ei tak” tih hi.

A hmelchhe hranpa lo. A hmel a inhmeh lo mai mai alawm. “Hetiang teh hrepa hmel inhmeh lo te chu, fb a a profile picture kha; an kawmthlang nula a ni chiang” ka ti rilru. Ka lo tawng chhuak zawk em mawn le. Eih ah..hmm!! Ka mitsulh a, arsi a de chuai…mangtha.

Thianpa thuthawn bawk a lo lang leh. “I vanneih zia hi i hria em? I lo chhuahna kha inches khat chuan thlang hlek se, ek tum i ni mai dawn si a” tih hi. Ek tum ka nilo tih ka inhre thut, thawh ka tum. Ka kawngah min lo thut bet chu niin, hmeichhe insawisaktir kher chu a nâ ka ti.

Ingki ingki pawngki a duhthlan tur pathum ka nei-

Pakhatna- Min ngaidam rawh ka tih chuan, min thut lovang.

Pahnihna- Hmeichhia thuhnuaia kun chu a nâ ka ti ka tih chuan, arsi ka hmu leh ang.

Pathumna- Ka hmangaih che ka tih chuan, ka fawp thei ang.

Intipa takin pahnihna ka’n thlang fuh pek. Arsi mai nilo, chhohreivung leh zangkhua te nen lam ka hmu..second coming.

Ka chhip samah min tham kang, lei ka si lova; van pawh ka si hek lo…ka rin aiin ka fit. A ho e, ka rilrua awm a hre chuang lo em mai. Eh, eh, a duhtawk mai lo. Min thlah dawp a, ka ke a hit sawk..German ral lian.

Vai film chu nise, inchhawng sang deuh atangin a lo zuangthla ang a. A san dan en chuan, a ke ulh ngei dawna a lan laiin; vaivut a khu sut chauh ang. Chutah, ka pum velah min hnek sawk sawk ang. A hmuhnawm dawn chauh emaw tih laiin, khawilai ramngaw velah kan zai leh daih awm si a; ka ti rilru. Mahse, mahse…

A nâ ka ti, ka zep lo. Phuba ka la khawp ang. Facebook, earbook emaw nosebook pawh nise; ka chat tawh lovang. Sms, jms emaw fms pawh ka thawn tawh lo hrim hrim ang. Chumai ni suh, e-mail emaw utawkmail pawh ka mail tawh hek lovang. A mah avangin, zanrei tak tak ka meng ziah lehnghal.

Ka huntha tam tak ka khawhral a, tul lovin zan rei tak tak ka men phah fo; rin aiin an lo hmelchhe duh zek lehnghal. Mahni chhiat phei chuan, a buaithlak. Fa hmelchhe fe fe kan nei ang a, nu leh pa min chawimawi dawn lo em mai. Chuvangin, sms leh fb chhass tih vel ka nei tawh ngai lovang. Ka sim hmak…

Ka chhip sama min tham te, arsi ka hmu te kha chu a pawi lo. Ka ngaidam thei. Mahse e, a mawngtamin mi uan khum kha chu; ka theihnghilh har tawh khawp ang. Hei hi i lo hrilh dawn nia.”Ka sakruang rawl chu dam mah se, ka kawnga i thut bet chu a dam thei lo”

Patling hi ka tlawm mai dawn lo rengs, “Min la cho em?” ka la ti fan e.