12 May 2012

Hello Tomorrow

Kan thurin bu-a SAM ziaktu chuan, "Kan damchhung kumte chu kum 70 a ni a, chakna avangin kum 80 pawh a ni thei" tiin a sawi. Chuti anih si chuan, ka damchhung kum tur hmun thuma thena; hmun khat ka hmang liam ve thuai dawn tihna a ni ang.

Ka hringnun hi naktukah pawh ka chhiar liam mai thei a. He ka hring damchhung hi ka thlirkir hun a thleng a nih pawhin, ka thuziak ho të të te erawh chuan cham zai an la rel mahna. Chuvangin, nakin hun atan ka nupui, tu leh fate'n an lo thlirkir ve duh mahna (ka la nei ve te a nih takin) tiin, ka ir-âwm thai tial hi a tam thei ang ber hnutchhiah ve ka duh a ni.

Dam kum 70-80 mi ruatsak hi thu ho të të thai hnawkin, ka hringnun hi ka la ziak liam dawn a ang. "Eng nge ka ziah ang?" tiin ka kawlawm leh laisuih ka chuktuah a. Ka ziah tum loh deuhvin, a hnuaia inziak buai nuaih khu a nunna thaw pai hauh si lovin; ka dinchhuak ta a nih chu maw le.

He hringnun chân hlau reng renga inbengbel thin hi a thim zawnga thlir chuan, a lungchhiatthlak chang a tam thin. Mahse, lei hringnun a ni miau si a, kan duh emaw duh lo emaw kan vanglai nun hian; hmanlai hunah min la hnukliam tho tho dawn a nih si hi maw le.

I vanglai hun i hmang tha emaw, tha lo emaw, a nuam emaw, nuam lo emaw, hmanlai hunah an la hnuk liam dawn che a. I vanglai leh that lai hun i la chhui kir ang a, lungtileng mai an la chang ang. Tlanchhiatsan tum mah la, a la umpha tho tho dawn che a; tlansan theih a ni chuang lovang.

Ni e, kan duh loh leh phal loh chungin kan mawina vun hi a la chuar ang. I záng a kul rualin, i ngaihtuahna a kul ve tan mai ang a. Ke pahnih mai a tawk tawh lo, ke pathum i mamawh dawn a. Chutih huna i buan hneh loh chu, i muan laia muang leh chawl ve ngai lo hun leh tuiluang a ni tih i hre tawh ang.

Naupang chhia ngaihtuahna nei lova tal muat muat ang khan, i la tal leh ngei ang. Mawi lo ti chung chung siin, i lu-ah kelsam a la to ang a; i phal lo chung chungin i ha an la tla zo ang. Chutih hunah chuan e, buhhawp bawkin a la hrai puar leh ang che.

A ni asin-i khawhmuh a la fiah lo tial tial ang a, i beng hriatna te an la chuai deuh deuh ang. Vawiina i hmel leh i vun hi, i hmel leh i vunah pawh i ruat tawh loh hial hun a la thleng dawn a; i awih lo rum rum ang a. Hei hi i la hmachhawn dawn a, ka la hmachhawn ang.

Thumb generation hian forefinger generation ah a la tir liam ang che. Cell phone, remote control..adt kutzungpui ngei maia hmet zut zut thin khan; i forefinger i la chhawr rim zawk dawn a ni. I awih em? Chik rawh, i hrethiam mai ang.

I mi hriatreng theihna an la tla hniam tel dawn a nih chu maw le. Em em a i ti em ni? I chenpuite chu i la hre reng thei mahna, i hmuh zen zen loh i chhungte chu, "Tunge i nih?" i la ti chuai raih fo tawh ang. I tu leh fate ngei paw'n, "A pi hi, a pu hi- i lo tar ve tak tak tawh a nih hi" an la ti dawn che zu nia.

I phunchiar sawt em em bawk ang. I naupan chhiat a intan tha leh ang a, tu leh fate i la hlimpui thar leh dawn zu nia le. Mut thlahlel ve tak thin kha, mut pawh i mut theih meuh loh hun a la rawn thleng ang. Nagmahin i phun i phun ang a, nitin thlanmual i hnaih tial tial dawn hi a lo ni.

Ni a liam ang a, kar a liam ang a; thla leh kum an liam ang. Thlan khur lam i pan hret hret tih in hria ang che. I mamawh leh duh em em thin powder leh perfume te i tan awmzia an nei pha tawh lovang a, rimchhia maiah an la chang dawn a, êk pawh mahnia thiar thei tawh lo thlenga i la dam phei chuan, nangma hrin fanu,fapa leh tu te ngei pawh in an ten ang che a. I duh loh deuh hunah, i zun leh ek i la cheh ang. Chutah zet chuan i chhungte tan hnawksak mai mai i lo ni tawh dawn.

Ni a rei i tih em em rualin, zan rei i ti em em tho ang. Dam leh hrisel taka khawvel i chhuahsan ring suh, damdawi chakna ringin i mit i khap ang a; damdawi chakna ringin i thaw tawp i chhiar thleng ang.

Hei chauh hi ka sawi tum a la ni lo deuh deuh. Nâ i la tih em em tur pakhat chu, i nupui/pasalin a dampui reng lo tur che hi a ni. A tute emaw zawk zawk hnuk hi, hnukchahna khawvelah hian a la chat dawn sin. Engah nge hmangaihte hnuk hi Khuanu'n a tih chah rual mai loh iin i la tap dawn tih hre lova i awm ka ring love.

Chakna avangin kum 80 pawh a ni thei...a reina chu thawhrimna leh lngngaihna mai a ni" tia min lo hrilhlawkna hi a dikin; i la tem dawn hauh va. Ka la tem dawn chauh hi a lo ni reng alawm le.

4 comments:

  1. Ka chhiar thuak thuak rih a, a thain rilru ngaihtuahna i hruai thui khawp mai. Zanah uluk zawkin ka lo chhiar leh ang.

    ReplyDelete
  2. Khai, tar thlenga dam tur chuan vaneihna te, malsawmna te, hriselna te, damreina te neih a ngaih asin. I han sawi takah chuan, kei pawh hi ka haihawt sawt ve ta khawp mai. Ka vunin chuar lam a pan a, ka luah kelsam a to tam tial tial a, ka tha zuai a, tunhma angin ka zuan a zang ta lo. Ni leh darkar a liam a, kum a vei zung zung a, upat lam kan pan tial tial zel chu anih hi. Mihring dam chen tura Bible in a sawi zatve ka pel daih tawh. Mahse upa ah ka la inngai chuang reng reng lo, taksa tar mahse, rilru a tar tak tak thei lo ve.....

    ReplyDelete
  3. Test... comment chu a bo a mi?

    ReplyDelete