24 June 2012

Pt, khawnge i awm?


Pt-i a ni a, a nui sèn sèn reng a. Ngo lampang, sa inphut mawi tak a ni. A nui timawi zual turin biangsum a nei a, a nuih a piangin keimah min nuih emaw ka ti thin. Min melh a, a nui sak a. Engtin nge ka lo tih thin tak kha le aw tiin ka inngaihtuah let leh pawh hian, ka hre thei tawh lo.


A nui, hmel leh ka laka a lantir thin thil tam tak a lo inphum ru tih vawiinah hian ka hrechhuak ve tan dawn chauh lek fang a. Ni chhuah atanga ni tlak thleng pawhin, a thinlung mai ni lo a hmel lang theiah khan thuruk min hrilh duh a nei tih ka lo hre hauh lo a nih kha maw le. Khang hunlai kha tukhawm dawm meuhvin ka ngaihtuah let chang hian, ka suangtuahna mitthlaah a la cham thin a nih hi.

A thuruk ril leh tha pui pui lo hmuh hmaihsak tlat thin tu kei hian, hmangaihna ka chân a ni. Min siai zeuh a, a nui sèn sèn a; ka chhanna a beisei tih engtin nge ka hriat loh theih mai le?

A hmui a seh neuh neuh lai ka hmu, a la nui hram a; a biangsum leh a hmel han inkawmngeih zia kha aw. A hmel khal mawi tak kara, min siai fo thintu a mit kha a va mawi tak em! Khatah khan chatuan daih tur rinawmna leh hmangaihna a awm ngei awm si a. Khati taka ka laka inzep thei lo leh insûm thei lo, mitmeng leh thinlung hmu thei lo tura min dawi â tlattu ka thinlung hi ka dem fo thin.


Class room khata thu kan ni ngei alawm. A hnung ber thutphah kil sira ka thu pawh, hnunglam rawn leh hawia min ngaihsak tlat thintu Pt-i thinlung kha a lo va baihvai thin dawn tak em!! Ni e, ka hmu chiang alawm. Min siai a, min nuih, ka laka a awmdan zawng zawng pawh. Mahse, mahse...chhanna a dawng ngai si lo. A lo va beidawng ru thin awm mang e aw.

Period a over a, dar a ri bawl. A hmui seh niap niapin a rawn leh hawi a, class room ka chhuahsan hun tur a nghak ang. Ka bulah inthlahrungtakin a lo ding ang a, ka darah a rawn vuan chat ang."Lr, vawiin i damsam lo em ni? Chhunah tiffin ei dun ila..."Aw, ni e. Nia kan ei dun dawn nia.

Class room-ah ngawi rengin kan inzui lut a. Ka thutna ka pan a, a thutna a pan. Dar 12 rik hun a nghakhlel tih hairual a ni lo, ka lam a lo hawi awl lova. Engah nge min ngaihsak em em? Min thlir, a thuruk a tilang tam narawh e. Ka kianga awm a thlahlel tih ka hre thei, mahse ngati nge ka lo ât tlat si kha le. Khang hun laia a thinlung kha Calendar anga phochhuah mai a va han chak thin awm em ve aw tiin ka suangtuah let a.

Tiffin kan ei dun ngei a. A mit la sawn hlek lovin ka mit a en a, a nuiin ka hria. Ka thinlung chhunga eng emaw chu mi dil a ni, mahse a va mak em ve aw. Ngati nge tawngkama min hrilh mai loh Pt? He thinlung hian i thuruk a hrethiam thei lo a nih hi...

Nilaini a ni a. Ka mitthla hian a la theihngilh hlek lo. Kha ni khan, T-shirt sen a ha a. Kekawr bul khup thleng vel a ha bawk a, converse var hlak a rawn bun. A sam a tawn kawh vah a, a va han mawi em ve aw. A mit a len ruai a, zawn a nei a ni.

Keimaha class rooma ka thu chu, mi rawn pan nalh a. Ka bula thut min dil a, a lo thu. Sawi tum leh sawi duh a nei, mahse kei mimawl hian a hrethiam leh pek chuang lovang. A thaw halh a, a kut a nuai a; a nui leh ringawt thin. A bag a zen rawk rawk a, Munch a rawn phawrh a."Nei rawh, i duh em?"Aw, ka lawm e.

A kutah vuan a, ka laka a awmdan chu eng vang nge tih leh lawmthu hrilh a; ka ngainat thu tal hrilh tur ka ni asin. Chu mai a ni em ni?"Sawi duh i nei em ni?"tia zawt tur ka ni bawk asin maw le.

Advance Christmas kan sikul kawt zau taka kan hman lai khan, he thil hi a thleng. Advance Krismas kan hman hma ni daih tawh khan, ka bula thut min lo dil tawh a. Eitur a lo ken teuh tur thu min hrilhlawk bawk. Ni a sat êm avangin lehkha khawng lukhum anga siam kan khum var dun hle tih ka la hria a. Krismas Card exchange a awm dawn a, ka Card ngei dawn a chak thu min hrilh tu kha amah ngei a ni. Nisat avanga a biang tai sen hlar kha, ka hmu lo a ni lo asin maw le.

Ih maw...A kianga ka thut laiin, ka din kan zawk lai chuan ka thutna Chair thiante'n; fiamthuin min lo pawhsawn sak hi a lo ni. Ka han thu leh tur chu, leiah ka inbin thu thak a nih kha. Ka va han zak tak em ve aw...Han thinrim mai chi a ni si lo. Pt-i kha a nuihza tih ka hria, a hmel ah a lang alawm. Mahse, a nui lo.

Ka tho tuah tuah a."I kekawr leh kawr a paw vek, ka lo tihfai sak ang che."A beng fai thuak thuak a. A hanky chu tui ti huh hlekin, mi hruksak thuak thuak bawk tih ka la hria.

Kum a tawp chhawm mai si a. Mi duh thu hrilh turin tawngkam a hmang ngam si lo, kei suihlungmawla lah hian a hrethiam der si lo. Ni e, aw ka hria. Tunah chiah hian ka harh chhuak ta.

Ih maw Pt, kan sikul hlui kha ka va tlawh a. Kan sikul leh class room hlui te kha an lo la awm asin. Mahse, nangmah ang kha an awm tawh lo. Ribbon sen thing zara i khai kha, a lo la inkhai a; mak tiin ka en reng a. Mahse, a hluiin a dal tawh lutuk...

Min ngaidam rawh aw Pt. Engah nge tawngkama min duhthu kha i sawi mai loh? Engah nge i thuruk chu ka hriat phaka i au chhuah mai loh le? I thuruk te kha ka hrethiam ve lo tih i hre awm si a. Mahse...keima thiam loh vek a ni.

Tunah hian min la duh reng ang em? Ka puitling ve tawh asin. Hmu che ila, i kutah ka vuan ang a. Min duh em? tiin ka zawt bawl ang che, engpawh i chhanna nise ka pawm vek ang. I biang ka chul ang a, i hmuia ka fawh hial che ka ring a ni. Tunah khawnge i awm tak PT?

Kan tukverah chuan ka dak vawng vawng a, Pt-i hmel ang tak ka zuk...

4 comments:

  1. Vawikhat inhmuhna atanga rawn piang chhuak hmangaihna hi chu a awm takna a, thian inkawm nelna leh inkawm ngeihna atanga rawn piang chhuak Hmangaihna hi chu a duhawmin a hlu bik a, a tlovin a nghet bik nge ngein thinin ka ring thin. Thil hi a mak a ni, min duh ngawih ngawihtu te, kan duh ngawih ngawihte, kan duhzia, kan hmangaihzia, kan innel zia, kan inhuat loh zia a taka kan lan chhuahtir hnuah meuh pawh, zahzumna emaw, hriatthiam lohna vang emaw, hmangaihna mit a del tlat chang hi a awm ve chawk a nia. Mak tak a ni mak tak. Pt-i chuan star dang pawh a nei mahna, zawng chhuak rawh, i inchhir hauh lovang. Hmanah a hmangaih che anih chuan, tunah pawh a ruktein a la hmangaih em em ang che.......

    I ziak ngaihnawmi ngaihtuaha a tithui vawng vawng hle mai.

    ReplyDelete
  2. Hahaha. Sir, he thil hi a mak ngawt mai. A hmel hi hmuh leh ka chak ngawt a ni.

    ReplyDelete
  3. Ka comment ve tawh ngei khan ka hria a, phone atang a va lut lo si em!!

    Sawi teuh tawh a lo luh si loh hian inspiration thar dawn a har, ti hian sawi tawh mai ang i ziak ngaihnawm lutuk e.

    ReplyDelete
  4. @Rp, i comment spam ah pawh a awm lo.
    Nia, i sawi dik khawp mai. Blog tam taka ka kawmen a bo ve fo mai, inspiration hmuh a har duh.

    ReplyDelete