Nuthlawi zûn

Bawng tar pawhin luang no tho a duh an ti a, kei luang no hian; nuthlawi pawh zuk duh ve tho a. A pawi reng reng lo. Ih ih, lenlaia ruallo hi a sawi rem theih an ti alawm. Sawi rem thei ngut ang maw? Khawnge thlawi law law chhai hi, a fair zawk an tih tho kha.

Len ve ngei ka duh thin. Ka len loh chuan, ka hnimhnai thei lovanga, engtikah mah blanket hnuaiah kan hui ha pap pap lovang. Mahse, han leng ve ngawt pawh nita reng reng ila, artui min lo chhum duh chauh emaw a nih ngai chuan; tlangvala hi nula inah Artui a khel ruak ruak ang tih a hlauhawm ve tho.
District khata “zak thei lo ber” ni lem lo mah suh i, ka “zak lo thei” ve fu. Zankhat chu ka’n lut ve rawih, a daizau deuh tawh a ni mahna; ka bulah a rawn intung nghal chat. Chheiraw, a fapa in a phallo nasa, “a nu bulah tumah thut ka phallo” a ti a; kan inkarah plastic chair a dah ta vun mai. Hmm..a nu deh chu sawi loh, plastic chair a chet vaih chuan; eeehh a ni mai.

Tlangval nula rim intih ve nak alaiin, vuun tih a ngai ta. A motor lem a la chhuak a, “A Pu (aw a Pu) min nawr rawh” a ti ta riap mai. Chhuatah ka thu sawp niai, kan innawr ta poh va; “v..u..u..n”. I v..u..n sei lo em mai, sei deuhvin v..u..u..u..n ti rawh. Hmui phe hlawp hlawp khawpin, v..u..u..u..n…

A nu tihlawm tum nak alaia, a fapa tihlawm hmasak a ngai a. Chutah, water pistol in kan han indo leh, lenglo chung chunga an thutphah hnuaia lu rawlh a ngai thul. Min kah apianga thih der a la ngai zui a, tlangval pumpa nula inah ka let hawl hawl mai.

A nu bulah a thu venvawn ang a, an fridge phen atanga “Pum” tia kah a ngai a. A nu malah a let tawp ang a, a thi der vel ang. Ka tih hun a thleng ve ta, a nu ke tlawh ränin min kap dur ang. Thih der ve a ngai si, tlukna lam tur vang duh tak a ni; vaaang tak.

Thih dera a nu malpui chunga han tluk der a chakawm hle rualin, rem lo chung chunga; a sir zawnga thih der a ngai a. A zankhatna chu Indo leh v..u..n in ka hun ka hmangral. Luh thuk ka’n tum vei nen, a buai zo vek. Len leh hun chu, ka fing tawh khawp ang.

Zankhat ka’n rial dek deka, hmuh ka chak em em lawi a. “Mi dang an lo leng ang a.” Hmm..leng pawh nise, indo an zir ve phawt a ngai tho ang. Nilo, nilo…naupang thlem lungawi thiam bik riau ang a… Inngaihzawn hma hauhvin, thikthu a’n chhe nghal deuh ngawt a.

An in lam ka pan leh ta ruak ruak a. Khai aw..zanin chu ka duhthu ka hrilh rualin, ka fawp khawp ang. Ka lut dek deka, a nursery rhyme zawngin infiam a ngai leh ta. Hei ham..pawlhnih ka zirlaia “Arpa hla” ka’n sa ngawt pek, rhyme dang thiam hek lo i. Ka hre ta. Ka len leh hun chuan, nursery rhyme ka vawng teuh ang…

“Tlanga lal lal herhâwtah” te ka sa, “Leilung mawi leh thangvansangah” te ka phuahchawp. “Siksihling bawm bawm” te nen lam tihmut ka tum a, a mu duh chuang silo. Zan dar 9 pelh hnuah pawh, kan pahnihin “Sakuh ui lut, ui lutah” kan ti dun zak zak. Nula chu ka rim ve tho…

A mu duh chuang silo. Awm-hmun-chhut of mind ngah mi ngang ka nihna ka chhawr tangkai ta. “Baa baa black sheep remix” te “London bridge is falli’n down remix” te ka’n phuahchawp hnuhnawh a. Remix hrang hrang ka siam, a mu ve chhawm mai a. Lenghnar ar a khuang leh der tawh a, fawh ka tum teh reng nen…

Ka len dawn apiangin, kei tlangval pumpa hian nursery rhyme ka’n zir thar leh thut a; ka tunu Nursery Rhyme Book a bo ta fo. Thlawihmeltha-i ka rim dawn apiangin inenlawk hmasak a ngai ziah a, ka inenlawk hmasak loh vaih chuan; ka fail leh tho tho ang.

Len tlut tlut takah chuan, indo, motor lem chùan, rhyme te ka thiam nasa tawh mai a. Vawikhat hnih han thih der a, rhyme pakhat hnih ka sak tawh chuan; a mu ve ta mai zel a. An kawmchhak dawra ka bat ngam zan phei chuan, thuawih tak a ni tawh a. Thlawi lam chhai tur chuan, nauawm thiam a ngai a nih hi ka ti ta a.

Chengkawl fawh (ka sitail) ka tum apiangin, Khaini a lo hnawh hman ziah a. Insum theihloh fawh laklawh chang chuan, lu hai ram rama infawh chang a tam. A hnute kawnghren pel pelin zen dawn mah ila, Khaini bur ka thamchhuak nawlh nawlh ang tih a rintheih. A hnuailam pawh han tuaihnum viau dawn ila…eh ehemz helam chu sawi lovang, a tuidul tlat. Lo sawi pawh ni ta reng reng ila, Sahdah “RUM” nuai ngat a paipawn thu bak sawi tur ka hrechuang law’ng.

Nau awih mut a han tum a, “Eating sugar no pa pa” a tih vel lai a; “Nia, nia” ti a ka buk nghut nghut vel lai ka ngaihtuah a. Tunhnuah hian ka lo va changkang tawh tak em!! Nuthlawi zûna uai chu, indothiamna te, rhyme thiamna te leh nauawm thiamna te a ni hawt e