Thlaler Chungu Zaipawl

(He thuziak hi Baptist Boarding School-a thawk mekte leh thawktawhte, zirlaite leh lo zir tawhte tânka hlan e)

Kum tam a liam tawh hnu hian ka lung min len thar tlat. Kan zinni thlaler ramro-ah khan Visa a pawimawh lova, passport atul hek lo. A tirah Bus in kankal a, a hnuah Jeep in kan kal leh a. Sakawr hman ngaihna a awm leh a, a tawpah pipu in kan uai lut hram ti ila dawt tlem ka sawi tihna a ni dawn si a.

Ramthim sikula ka luh lai a ni a, thlaler ramthima rawngbawl tura tih kan la ni cheu. Rawngbawla ka chhuah hmasak ber a ni nghe nghe. Kan ngaihtuah vang vanga, zaipawl anga kal tha ber niin kan hre ta a.Mahni hla pawh sak thiam apui neih loh nak alaia, hnamdang hla kan han zir mauh mai kha chu rin aiin nal a har.

Kha Hostel-ah khan Mizo awmchhun kan ni miauva, kan Conductor khan bass inthiam ang in bass ang a timauh mai si. Zaipawl sawmthum chuangah khana thum chi a sa pathum chiah kan ni. A rikin kan ri chuah chuah a ni ber a, kar khat awrh kan zira. Ramthimah vek rawngbawlna nei turin kanliam a tul ta.

Kan chhuah dawn chuan kan phur ve viau. Sakawr tak ngial pawh a lut thei tlat si lo, ke ngata kal a tul a. Kan kal lo thei si lo. Mahni mut bu leh thawmhnaw te nen kan chhuak ta. A chhangchhiat theih khawp mai.

A tirah a mela mel eng emaw zat chho zawng hlirin kan chho ngat ngat a.Kan chho hla tawh viau nia ka hriat pawhin a sawt lo kher mai. Mut bu put a ngai a, tui pai a ngai bawk a, thlantuiin min bual zawr hnuang a. In post nalh a har ngiang mai.

Thui tak kan kal hnu khan kan tlu palh ang tih a hlauhawm khawp, kan ha hmai kan chan loh vek pawhin a bul atanga tan that a ngai dawn tih a lang reng.

Hah thlansa phula beng ngawng ram rama kan chhoh hnuah, an khaw thenawm kan thleng ta hlawl a. Chuta tang chuan achhuk zawng hlira kan kal a tul dawn thung a ni. Tluk palh a hlauhawm cheu va. “Keuh” a awm chuan, duh aia hmain kan thiante kan lum thlen khalh ang tih a chiang reng.

Kan chhuk thla boh boh, chau leh hah takin kan thleng ta rawih a. Ka lum lut em lo kha vannei ka la inti reng. Vangvat leh Thosi khawilai emaw atanga minrawn zawmtu te nen lam kan thleng, kan kim tha e. Thlen thlak hnu chuan, thil ka ngaihtuah a, thlaler chu a va ni tak em. Thlaler chungu zaipawl nih kan phu hliah hliah. Hla a rawn lang a-

“Thlaler ramro kal tlang turin,

Hreawm tam tak a awm.”

tih pulpit atanga sawi dum dum aichuan, a taka tem meuh chuan a lo hreawmin a chiang a lo ni.

Mikhual an sem. Naupang pakhatin ka thlenin tur lamah chuan min chhawm phei a. Mau rap in mai mai mah nise, nawm ve hmel deuh kan pelh nual tawh hnu chuan, a hnukhawi ber Inah chuan min dah ta rap a. A tlan let leh nal nal.

“Ka pi ka lo thleng dawn a.”A ngawi vang vang a, a bu nghut a. A phal chiang, ka invawm lut ta a nih kha.

A tukah chuan hla kan han rem dawn ta a. Pulpit hmaah chuan kan intung tatham hlawm. An pulpit chu thingtha mia siam a ni lo, dap malkalha tah a ni. Zaipawl sawmthum teh meuh mai zinga, a thum chisa pathum chauh han awm chu kei leh kei lovin ka zám lek lek. A then a pangngai asa, a then a sang deuh-aw chungu zaipawl kan ni miauva, a rual lo lo a nalh. Kan inbuatsaih lo kan ti duh bik lo.

Music chikim kan nei lo. Khuangte leh khuangpui a ri thei ngawr ngawr a, a bak zawng chu Thereng hram a ni ang. Kan han zai ta cheng a, a rikin kan ri chuah chuah a. A thenin a changkhatna an sak tawp tep laiin, a thunawn thenkhatin an ti tan mek a. A thum thei ang bera Bass kan duh si, mit kalh tawng tawngin aw kan ti thum lui. Mit kalh vek dawn leh zun chhuak tuau khawp a kan zai hnu chuan, a tawp ve chhawm mai.

Mahse maw, kha kan rawngbawlna chhete kha Pathianin malsawmna a vur asin. Kristian la ni ngai reng reng lo ten Pathian an hmuh phah ta.

Chawlhni tlai la la chuan mi pathum zet ten Baptisma an chang a. Kan phaktawk, theihna leh theihtawka rawngbawlna Lalpa duhzawng a lo ni.

An zinga hmeichhe pakhat phei chu Kristian a nih avang chuan, a chhungten an lo vaw hrep a. Zan inkhawmnaah chuan zak leh zak lovin a lo dingchhuak a, Pathian a hmuh tawh thu leh phatsanthei a nih tawh loh thu a sawi a. A mittui a luang a, ava mawi tak em.

“Mei leh tuilianin min hual vel, mahse min dal zo lo” tia tui êm êm a pulpit hmaalam zawi zawi, a hnu thla hnih hnua da leh mai tur ang chi hmel a pu lova. A thawmhnaw berhte leh a ke char rip rep nena, thiam leh thiam lova mi tlemte hmaa Lalpa a mualpho puina kha Lalpa’n mawi a va han ti dawn rua. Thlaler chungu zaipawl malsawmna Lalpa’na vur tih reng kan hai mawlh lo.

Kan bu zawla thlamuang taka kan thut lai hian, Pathian la hre lo tam tak anawm e. “Tunge ka tan kal ang?” Lalpa’n a ti a ni. A taka hmu leh tem phak hannih meuh chuan, Ngurthangvela’n, “Buh seng tur an tam si, an boral dawn” tia Lalpa a fakna hi a lo mawi zual thin.

An ekin changkang lo taka an vawk vulhte kan ek khum ang tih hlau reng renga, ek chhuak bawk si ipchawih chawih lam kan thlu love. Ke zungpui bengzeh chawi khawpa han damloh te kha, a nuam zawk kan ti hek lo. An tui bottle tha ber leh adang awm chuang lo “Kuti” tui inthiam miah lova, chaw ei laia awm huh thlup leh chaw thlenga tling luau khawp a han in leihbuak te kha a nuam pawh kan ti hauh love.

An tawng hre vek ni awm taka an tawng zuah zuah laia, lo buk ve satliah mai mai pawh a nuam kan ti zawk a. “In lo kalna a hla si a, ar kan talh ang che u” an ti chiang nia kan rin zawn vang vang laia, an han talh chat te kha a lo hlu zual zawk a ni.

Kham lo taka ni thum kan cham hnu chuan, vangvat leh thosi te nen kan inzui haw leh diah diah dawn tihhre rengin- kan haw leh ta a ni.