Nupui ka neih hun chuan

A hautak lo leh insen tul lova insen ka tum lo, inneih nghehna a ni lo tih ka chiang khawp mai. He thu ka ziah avanga ar chuk tui lo khawpa min chuk pherh diai diai duh an awm ta ve ang. Min khengbet duh an awm mahna le, ka sam zuah sei thin lai ngat phei chu nise.

1. Inneih card changkang ka sem ring duh suh, ka sem dawn lo hrim hrim. Ka sem a nih pawhin, Typewriter ngatin ka chhu ang.
2. Ka thiantur chhiar telin, thian panga bak ka sawm dawn lo. A tul lo.
3. Hmeichhe lam pawhin panga bak a sawm tur a ni lo. A bak chu a chenpui tak tak te an ni mai.
4. Biak In hawn buai a tul lo. Kawmthlang Balhla huan kan nei alawm, dawhkan pakhat leh khuangte kan keng ang a; a tawk khawp. Kan thiante leh chhungte chu Balhla hnahah an thu sawp niai mai dawn a ni.

5. Coat leh mo kawr fual kan mamawh kher lovang. A tullo ka tih zawng tak. Mo kawrfual ngat phei chu vawikhat bak a ha dawn lo tih ka hria. Sunday dress a tawk khawp ka ring.
6. Rangkachak zungbunah ka insen vak duh ring hek suh. Zungbun aia hlu “Thinlung Zungbun” ka bun tir mai ang.
7. Hriatpuitu ka mamawh tam lova, Pastor, kan thiante leh chhungte a tawk. Miin kan innei tih an hriat ve kher a ngai lo, fa pakhat kan neih hunah chuan hre mah se, a pawi lo.
8. Thla kan la dawn lo. Video phei chu a ngai therte lo. Thlalak chu “uak”, video chu “thui” a ni mai. Nikon Camera,Thlakon leh arsikon lamah ka buai lo. Nokia phone in duh leh vawikhat kan hmet ri chhuai ang.
9. Ei leh in lamah ka buai peih ring duh suh. Thingpuisen thlum leh Ba në a tawk viau ang. Ei leh in lama min lawmpui duh chuan, thingpuisen chu kan ui lo ve khanglang. I inzawhah i haw nghal thei ang.
10. Car changkang takin khawpui in fang dawn lawm ni i ti maw? A teuh lo. A tul ka ti lova, ka nei hek lo. Ka hawh buai hek lovang. Duhleh thiante thlah pahin, ke ngatin (a va mawi ve “ke ngatin”) kan kal ang.
11. Steel almira leh dunlop tih vel a chhawm dawn na nge? A sawi pawh sawi suh, underwear hakthlak pakhat a rawn chhawm chuan a tawk. I ngawi hmak thei.
12. Kohhrana i thalai pui ten present te an pe ve duh ngei awm si che a? A ngai lem love, ka hausak pui lawih dawn te a nih loh chuan. An duh leh min lawmpui an duh a nih hrim te chuan, “I nupui chu a hmeltha khawp mai” an tih der luam ka phal hram ang.
13. Ka nu leh pate chu ti lutukin an mawl lem lo. An fanu thar chu duh leh arsa kg 1 chu leisak ve se, an inseng lutuk lem lovang.
14. Zanah erawh kan insengso ve mahna. Ka sawi tam a ngai lo, i mu hmak thei.

Thil tul lovah insen ka tum lova, ka chhungte an buai lovang a; a chhungte an buai hek lovang. Khing zawng zawng khi inneih nghehna a nilo tih ka chian em vang zawk a ni. I zak dawn lawm ni i ti zauh in ka hria. Ka zak thlawt lova, ka inchhuang zawk.