Haw nghal rawh

Ka nu’n a Chingit zawrhna ngei maia nalh leh tha a tih vang ni miah lova tlawm a tih êm avanga T-Shirt Second Hand sawrkar hmasa zawk hun laia min lei, kum thum zet ka hak tawh hnu pawha ka nin theih loh nghawng zau tawh tak nêna ka han intam ap chuan ka en tlak ve fu. Hre rawh ka nu aia min hmangaihtu an awm lo.

Khawnge zanin chu ka rawra chawh chak bill ngei mai ak chungin, a zan zanah Sava(nula) perhthlak tur zawng teh ang tiin-ka kekawr hmanthiam leh chapal inkhing lo bun chungin sezawl chhuah ve rap teh ang.

Thiandang ka sawm dawn lo hrim hrim, ka hmel that uchuak vang pawh ni miah lovin zanin chu ka confi ve tlat.Thiante an tel ve chuan chance min pe thiam lovang a, kei aiin a lo duh zawk te a ni thei.

Israel ram atang ngei maia an chah chhuah, thing kawngkhar tha mi chu ka han kik ri karh karh a. Doorbell han khawih chiau na ka hmu tlat lo. Ka thinzia alang a, ka inchhuih lut lek lek a; ka him hram. Inchhuih lut ila chuan ka kuhva ah lai kha ka zawrh ang a, ka haw daih ang.

Ka T-Shirt nghawng zau ve tawh tak chu ka han zut thuak thuak a, ka thu thum dawt a. Chhun lama hnathawh hah deuh nên thingpuihang ngen mai ka nap a, mahse ka vawikhat lennd a ni a- polite hun a ni. Ka thutna sirah chuan a lo thu thuai a, a ke tin chu an phe sep sep ni ber hian ka hria. A mit meng chu romei ang maiin an paw chêk a, a nui mawi tak bulah kha chuan Rose par meuh pawh an chuai rawk rawk ngei ang le.

Sa hmeh khat ta ngang ngang chu thildang aiin ka chawhmeh min zawt se ka ti rilru van van a. Min zawt se chuan, intithei leh muang fan raihin Vawksa ka ti mawm hmuk ang a. Kuhva (Mizo Mouthfresh) ka hmawm zui chhak ang a, min ngaisang dawn lutuk tlat. Chhuan tur dang nei tlat lo hek i, ka chhuan tur neih zawng chu Arpa sual huai leh ka pa fapa ka nihna chauh a ni.

“Vawin lam eng nge i tih?” mi han ti luam a, hna ka thawh thu ka sawi a. Tlangval engmah thawk peih lo aichuan, thawh hreh nei lo hi ka ngaisang a ti vei tuk a. Ka huangtau hman viau naa, eng thli nge rawn tleh ta mai le. Kawngkhar a rawn ri karh karh a.

E khai, he tlangval chu a kekawr a zuih tha a, a pheikhawk a lawk that rualin a lu a buk tha khawp. A kawr rawn hak pawh second hand a ni lo tih a chiang a, thil eng emaw rim a rawn nam ther ther bawk a. A helmet a rawn pawm lut rup a, dawhkanah a rawn nghat ri chawrh a. “A thinrim em ni, min thik chiang- ka hnek chawrh nang a” ka ti rilru hman a.

Amah chauhva a rawn luh danah khan, kohhran lam atanga tawngtaina rawn hmanpui tur a ni lo tih a chiang reng. A lays bur lian rawn khai luh pawh kha, pa ber atan a rawn ken a ni lo tih ka hria. Ni dawn tak, a bialpa a ni chiang mai. Mahse, ka zam ther te lo, a hmel kha ka khawngaihthlak ka tih zawng tak.

A thil rawn ken kha a hmang tangkaiin, a hmang thiam tlat a. Paih mai teh tih chi a ni si lo. Biangtaii khan a han hawng rap a, an ei ta siam siam a. “Thianpa rawn ban ve rawh” an ti tak na a, min huphurh ru tih ka hre ve tlat. “Ka lawm e, ka duh lo mai” ka ti ve tlat a. Ka rilru te te chuan Lays te chu a thur thur nên ka ti rilru ran ran a, a thur lova a tui tih ka hre ve kur tho.
Eng emaw tak inpawhna riau an nei tlat, an ti ti tui phian leh nghal a. Kaladan Multi Modal Transport Project- te an sawi ka ti, min rel chiang. A helmet ka melh ran ran a, chhut chawrh ka chak rum rum a. Insual pawh ni ta reng reng ila, keia tlangval pumpa rawra chawh chak hi min ter pha lo aih aih khawp ang. Insuknawrah pawh ka cho zek zek, lei si lo van si loin ka dah dawn hrim hrim. Pawnah ka sawp nek dawn che tiin ka inhrosa ru chiam a, a sawt chuang si lo.

Biangtaii rilru ka hmin hman dawn tlat lo. A nu rilru tal ka hmin hman tur a ni. Ka ti ti pui ve tan ta a, kan sawi duh zawng a inang phian leh nghal. A nu zawk hi ngaizawng ta daih ila, mahse uire ka ni dawn si. An pa khan min vaw hlum duh hial emaw kha a ni bawk ang a, chapal inkhinglo bun chung pawh hian khawvel hi nuam ka la ti ve tlat. Suangtuah loh tur ka’n suangtuah mai mai chu le. Mahse, a fuh dawn e.

A nu pawh hmin hman ta lo chuan, “Tikhan lo inkawm rawh u” tih leh thawh a rual a. Min mutsan ta daih mai. Aw, a nu tal kha lo hmin hman ila chuan, mu chungin a result ka nghak mai tur. Ka pi lo tho leh teh tih mai ka duh rum rum a, a awm ang lo em mai ka ti si. Saw pa lu buk vang vek saw a ni, ka pet tawk nang a.

Thingpui a lum a, thingpuihang in theuh theuh a in tui bik tlat. Ka ringhlel a, a rukin chini a telh sak chiang. A thingpui no ah a mawng thlenga kut zungchala han zen tâwk mai a, liah lup ka chak zek zek. Nge ka ding hluai ang a, an dawhkan ke ka pal lui vak ang a ka bawh bur zawk dawn?

A in zo chu a ding hluai a, a haw dawn chu niin. Mi rawn melh a, ka melh tha duh bik hauh lo- induh tlat ang. Pawn thleng a va thlah a, an inthlah rei ang reng phian. An tukverh parhdaa a thla lan danah chuan, an inchengkawl fawh chiang, fawp leh lo,fawp leh si. Ka thin a za zek zek a, an varandaa electric wire ka pawt thla lawk ang a, ka shock hrep nang a. A rawn lut hman khanglang.

Ka bulah a rawn thu a, “Tunge i hming?” Ka pa’n Beisei min ti tlat a…Ka sawi zo hman lo. “Chu min beisei tihna em ni?” Ka thaw a uih miah lo, kuhva ka lo hmuam hman tlat. Ka nui sak a, a kut ka vuan a. Mumang ramah ka cheng hman tep, pangang khawih ang maiin a kut a thing thla vut a. “Haw nghal rawh” Min la nel vak lo a ni ang, min la nel chawp ve mai ang.