Retheihna

Hringnunah rualpawl chákna leh ban phák nih ka duh ve si a, rethei taka zirna han chhunzawm chu a har ngiang e. Tuarna phena malsawmna an sawi kha ka hre ve bawk. Mahse e, malsawmna chang tura tawrh hi a nep hauh lo.

Van ruahtui tla zawng zawng hmuam vek tum ang zia zanga ka an phuau tawh hnua, hmui dul pir per leh há 32 zet pawng per pura hmuam ka ni tih ka inhria. Leilung zawng zawng ka rap lovang ti ang zia zanga, ke zungtang panga lek pawh parh tha tak leh vawkte pian an sawi ang maia “áwm fek, dul kiar” la nih leh ngat phei chuan; zirna bak ka tán eizawnna leh nupui hmuh ngaihna a awm lo.

Mi In hnuai man tlawm thei ang ber tawp fip fepa, chengkhat pawh kawl lova ka thut cháng kha a tam lutuk. “Chengkhat kawl lo chu lu meh kawlh” tise zawng, ka lu a káwng zing malh malh viau ta ve ang. Chhungte rinchhan ngawta awm chu a inthlahrun awm a, ring pawh ni ta réng ila – rintlak an awm chuang lo.

Thiante aichuan ka hmeltha a, ka mit a paw chák a. Ka neih ang biangsum an nei ve lova. Chhungte rintur ka nei alawm tia inchhuanna tur neih ve lem si loh chuan, rethei taka ka zir a ngai tlat si. Chu a chhapah High sikul kal lai atang tawh rengin, “bang mai rawh” tih kha tawngkam tha ka dawn awmchhun a ni a. Ka inchawm tel a ngai miau si.

Nikhat inhlawh a, nikhat class kal a tul fova. Nikhat inhlawh tuar lovin, karkhat ka’n damtha lova. Karkhat dam loh tawh chuan chengkhat man damdawi a awm tawh si lo, thlakhat zet ka rin tur damdawi lei nân ka hman a tul fo.

Chawhmeh a to leh zel bawk nên. Chawhmeh neih loh tawpkhawkah Chaw Hmet ringawtin puar a tul a, a tawpa tui lem khawlh a ni tawp. Inneitute leh thenawmte lah chuan, chaw eiah sawm ang an ti ngai chuang lem lova. Chubakah, an chawhmeh rim ringawt kawpuar pui chang atam – chu zawng chu.

“Thenawmpa chaw i ei tawh em?” Aw, ei tawh e. “I va ei hmá ve, lo ei rawh ka ti ang ka ti ania.” Ka ei hma daih atang tawh khan, ka chaw bel lo chawi phei daih tawh tur alawm ti rilru ránin, ka aw ka séng thlàwn. Mi rawn ko leh a nih ngai chuan, “Ei nang aw” ka ti tlat tawh ang.

“Thenawmpa.” Phur takin Aw, eng nge nita?. Ei tawh em?” a ti thlarawk a. Chaw eiah min sawm dawn chiang, thenawmpa aia polite an awm lo ti rilru ran ranin, “Ei náng.”
“Va ei har ve, kan ei der tawh asin” ati leh daih si. Aw, bei nge sei run dung- ka hre nek love.

Chawlhni zingah pawr fapin ka’n tho chhuak a. Nimin lamah Sa ka lo lei lova aw ti tur pawhin, ka lu an mét kawng lo chauh kha a ni si a. Chawhmeh dahna-ah Bawkbawn vuai niau niau pathum an lo let bal anga, hei ngei hi a nih hi Ar sa chu. Thak leng lawng leh tui tam fein chhum an nâp a. Puar lo chung chungin, puar awm taka irhfiak pawp pawp a ngai fo thin.

Bawng thin chu a fry a tui, vawksa chu Antam thlak a tui a. Sangha chu a hang a tui tih zawng zawng kha zir chiah lo mah ila, ka hriat ka ring. Chutih laiin, thla tawp in luah man pek a ngai leh dawn emaw kha a ni tawh ang.

Ka pumpui luahtu tur pawh neih zawh loh nak alai a, in luah man a la ngai zui ang. Thla a ral ve chhen pawh engmah lovin ka thinrim phah fova, in-rulpuiludin ngar ngar pawha ngaihtuah chhuah a har thin. Chhungte chah ngawt loh chu tihngaihna dang a awm loh chang a awm. Mahse e, Rs 1000/- min thawn chuan thawn tam an inti leh khawp ang a, ka graduate thlenga ring turah min ngai leh tawp ang.

Engtin tin emaw ka pe tlak thei leh hram ang a, mit pawng hlat khawpin ka en tlawk tlawk ang a. Ka pek hunin lak let leh tum ni awm takin, kan inpawt-kan inpawt ang(nui suh). Thla thar a mi tur chu suangtuah duh suh, ka thi hman tawh mai thei a. A nih loh vek pawhin, in neitute ka invuak tir hrep tawh mai ang. Rilru a hah a, rizai ung khik khek hnuaiah, “Hui ha” pap pap a awl thin.

College kal a ngai a, inchei a la ngai ta deuh deuh. Ka ei chhiat chu thu hran, a thup bo mai theih. Incheina neih chhiat erawh thup chi a ni lo.

Duhthlan tur ka nei lova, duhthlan tur a awm hek lo. Hei hi chu a chhe em mai tiin ka hnawl zel a nih chuan, saruaka kal a ni mai. Pheikhawk ve thung hi. Ka Converse upa tawh tak, a ke phah pawp fup tawh kha ka bel tir tuk ang. Converse kephah bel hmasa ber ka ni mai thei a, a pa khawp ang. Pheikhawk siamtu pa a nui tut tut a, hmuh lo der mawlh kha a hreawm. Ka nui duh lo reng reng a, a siam zo ve mai.

Mi faten Thawhtanah – Converse, Thawhlehah – Supra, Nilaiah – Super Star, Ningaah – Timbaland leh Zirtawpah – Chapal nalh zet an phu leh siau siau dawn tih ka hre reng. An kawr leh kekawr a thar nitin bawk ang. Kei hi eng tin nge ni ang le?

Kei ve thung chu e-Thawhtanah – Converse kephah bel, Thawhlehah – Converse kephah bel bawk, Nilaiah – Converse kephah thlawn lek lek, Ningaah – Mawza nen chauh, Zirtawpah chuan ke lawngin ka kal tawh mai ang. Kekawr chu ka buai lo, kup tet hrep hrup an uar. Khup tet uar hmaa tet tawh ka nei ve alawm.
Kawr maw? A ngai hlir ka ha ang a. A changin a
hma a hnungah, a changin a hnung a hmaah
an thle tawn zak zak ang. Tah a va chhuak ve…

Nikhat chu thian ten Canteen-ah min hnuk lut lui. Dawhkan pakhat kan kil dawn emaw tih nak alaiin, a hran theuhah an thu darh diak. Chhuah leh nghal mai ka tum a, ka zak deuh tawh si. Ka indap a, cheng nga thir tlang ka lo ak. Nula a lo kal nal nal a, “Eng nge ni ang le?.” Thingpui sen hang no khat leh zo chhang kan ngat le. A phei leh nal nal a.

Ka pawisa neih khan a thlum leh zo chhang kan bak a hen lo an ti tlat a nih kha, a hang ka dil mai loh nákah. Ka thiante ka melh ru a, a tui tui an ei nghawng nghawng. Ka bula tui bottle khan ka vawm bur chak hlawm zia kha.

An rawn dah thlap. Thingpui ka lem khawlh khawlh a, zo chhang khan ka vawi hnih peh bak a daih lo. Ka kut mawm hlep leh an rawn chhawpna plate-a mawm nên lam ka zut fai leng a, ka lu-ah ka thih mawm hmar. Pa min ti hlawm rem rem khawp ang. Nge mawl min ti, min en hrek hrek hlawm.

Ka thinrim deuh thut a. Ka cheng nga thir tlang chuan, an chala ’5′ lang thawt thawt khawpa ben ka chák zek zek. A thente phei chu ‘Bharat’ tia Hindi-a inziak lang kawlh khawp a ben ka chák.

“Unaupa, i pek ai ka pek sak ang che.” Ka duh therte lo. I thawhchhuah pawh nilo, i nu leh pa hlep ruk khan min peksak ang maw? Engtikah nge i unaupa ka nìh a, ka nu hnute ringa i insawizawi ve? tia hauh deuh tur an awm lem lova. Mit pawng zawr zawr khawpin ka en a, ka pe. Ka chhuak hmak a, ka hmel an hmu khat leh khawp ang.

Chumai a ni lo, bike nên an rawn ri phei leh piat piat ang. R-15, Karizma an ti, ka hre seng nek love. Petrol a hek em mai, keizawng thenawmpa thing Thela nên ka rawn innawr phei tek tek mai ang. Cigarette inti leh maw? Silk cut, Navy cut inti a, Mizo cut a tui fe zawk. Van lampang hawiin ka tan khu tual ang a, lei lampang enin ka phuh khu luih ang.

Perfume an ti leh ta. Green Tea chu a hmeichhe hman chi, Oasis a rim a rei lo- an hming pawh ka hriat vawikhatna. Dangpuithu hman kuma ka dah that kha a la awm alawm, ka chawhmeh khawp ang. Ka ha ka rawn náwt hauh lovang, a rimtui khawp ang le. Retheihna zawng kil tin kil tang a fan zo a ni e.

Ha pui leh ha pui intauh ri bawp bawp khawp a damloh kha nia, hreawm zual chu. Mutna bulah tui thianghlim leh damdawi mum chauhvin min han nghak a, patling meuh pawh a patling lo lek lek fova. “Ka tum nge ruh saruh?” an ti maw? Saruh chu a ruh sa alawm tih mai a awl thin.

Thlasikah nise, vawt ti reng rengin thlasik ka thlah liam zak ang a. Ke-ar-tuiin mawngkaw hup chutin ka mu thlep hnuk ang a, damloh vang ni miah lovin ka khur ka khur ringawt ang.

Mahse e, retheihna hian mihringah min siam a, mi pangngaiah min din zawk a lo ni. Mite angin hausa ve ila, ka sual viau mai thei a. Mi fate neih ang nei ve ila, ka chapo mai thei. Ka neih chák leh duh ang ang ka nei thei lo hi, ka tan malsawmna an ni zawk.

Bike ka awh êm êm ka nei lo kha damna a ni a, bike-ah chuan ka thi dawn lo tih a chiang alawm. Pi leh pu ten, “Tui thiam tuiah an thi a, thing thiam thingah an thi thin.” an ti a ni lawm ni?

Chutiang a nih si chuan, Bike thiam bike-ah, motor thiam motorah, nula thiam nula-ah an thi dawn tihna a lo ni. Heng zawng zawng hi awlsam tein ka kal pel tihna an ni reng mai.

Retheihna khán min ti beidawng se, ka hlawhchham kumkhua tihna a ni ang a. Ka hlawhchham chuan, ka beidawng fo dawn si a. Retheihna khán hei hi min zirtir a, “Mi beidawng an hlawhchham a, mi hlawhchham an beidawng thin” tih hi.

Mite ka tluk pha ka ti hauh lo, mite angin ka finga ka ropui ka ti hek love. Mahse, vawiina mihring hi hmana mihring rethei beidawng duh hauh lo kha a ni.

Retheihna hian chhelna min pe a, taihmakna leh inngaihtlawmna chenin min zirtir a. Sual kawng zawh lo tur leh mi tumruh ni turin kaihruai hlauh a. Retheihna hi nelawm lo mah se, malsawmna tam tak a lo pai ru reng hi a lo ni.

It’s okay to cry as hard ang as long as you want to. Just make sure that when you stop crying, you won’t cry for the same reason anymore…..