Lunglengte lunglenna lunglen

Lunglen atchilh mi ka ni hi ka indem love. Hla phuahtu leh ziakfung chawitute suangtuahna leh hmanraw tangkai chu lunglenna hi a ni. Thu leh hla tha tak tak ruhrel dinchhuaktu pawh lunglenna tho a ni.

Zing ni chhuak engmawi êm ém ti engmawi zualtu leh lunghnur taka vanrang chhumte an kal mawp mawp lai pawha, hlu chungchuang pawh lunglenna tho a ni. Hmangaihte inkawp rem lai leh hmangaih avana inthen tawhte tana hlu chuang leh mihring min ti famkimtu pawh a lo ni e.

Chhun pachang ni sat vawl vawl lai leh zankhaw tairek chena min kalsan ngai hauh lotu a ni reng fova. An sawi Berhva leh Rengchal te ti tap a, ti kiu tu pawh lunglenna bawk a ni. Thal romei zamchiai ten tlang leh mual mawia, an bawh pawt chek timawi zualtu leh ti romei tu a la ni cheu va, mual hla kar dana kan di pawmlaite hlimthla min hmuhtirtu chu lunglenna chauh hi a ni.

Mi lunglengte lunglenna luahtu pawh lunglenna tho a ni. Rethei leh hausa ber thlenga thliar hauh lova chenchilh rengtu thiantha chu a lo ni a. Famngaite famngaihna pawh a ni a, famngaite hnemtu chenin a lo ni.

Lunglenna leh hmangaihna hi a inkawp tlat a. Hmangaihna hi mipa nise, lunglenna hi hmeichhia a ni ang. Lunglenna a lungleng ten hmangaihna an ngah a, hmangaihna ngah apiang an lungleng mai a lo ni. Hmangaihna tel lovin a lunglen theih lova, lunglenna tel lovin a hmangaih thei hek lo. Chuvangin, lal ram meuh pawh a lungleng ral thei a, hmangaihna avangin lallukhum hial a chán thei a ni.

Misual buru ber leh buru lem lote, fel leh sual, hmeltha leh chhia pawh thliar leh iai miah lova, amah lo kawmtu apiang lo dawl thin tu leh phatsan ngailo tu thilsiam ropui chu a va ni êm. Misual ber tan in thim chena zui luttu leh kalsan ngai reng reng lotu chu lunglenna a ni.

Patling leh nutling meuh pawh velh lova ti tap thei tu chu lunglenna a ni a. Nausen, naupang, thalai leh tar chena mittui thlemchhuaktu chu a lo ni. Thu leh hla thiamte lungleng lose, thu leh hla tam tak nawh reh an ni ang a, hringnuna a zar pakhat sahthlak ang a ni ang.

Sawichhiatna ho ber leh tualthahna rapthlak ber duanchhuahna hmun ber thinlung tenawm ber pawh ten hauh lova, rinawm taka riak tlat tur rohlu chu lunglenna chauh a ni. Tawrhpui ngai a tawrhpui hreh lova, hnem ngai a hnem hreh lova, tahpui ngai a tahpui hreh hek lo.

Mi hratkhawkheng Adolf Hitler ti hratkhawkhengtu chu, ram leh hnam tana a lunglenna a ni a. Thu leh hla lama mi ropui William Shakespeare, William Wordsworth, John Milton, John Keats leh Thomas Hardy adt. ti mihringtu pawh lunglenna mai a ni. “Father of the nation” Mahatma Gandhi ti huaisena, tipaukhauh tu pawh a ram tana a lung a len tlat vang chauh a ni.

Lunglenna a hmang thiam lo tan erawh Tûr a ni. Lunglenna avanga mi ropui an awm laiin, lunglenna avanga Pathian chauhvin a pek theih NUNNA mahnia la mai kan awm fova. Kan la awm zel bawk ang. Damdawi damna a nih laiin, a hmangthiam lo tan thihna a ni a. Chutiang bawkin, lunglenna hmangthiam lo te tan thihna bawk ah a chang thin.

Lunglenna midangte tana inpuanchhuahna ngaihnawma nih laiin, mi dangte tan erawh pindan meuh pawh chhuahsan tir thei lova min siamtu a ni. Ka nu chhul chhuahsan tu hi, khawvelin min lo hmuak a. Khawvel chhuahsan tu tura duan hian, khawvel chhuahsanin Pathian siam “Lunglenna Khawpui” in min lo nghak a lo ni e. Lungleng lo a awm theih ang em le?