25 January 2012

Hei le foreign!


Keia kara Chepahakhata, khawilai foreign Airport vela kan tum thu ka ziah ring suh. “Rih dil tlawh thu” tia dah ka tum zet a, Mizoram dil lian leh hmingthang man chawia Burma rama en a ngaih tlat si avang zawka, “Hei le foreign” tia dah mai ka ni.
Mahni sum seng miah lova “Ram fan thu” ka ziak a nih lem loh chuan, a pawi lo; la na vak duh suh. Chubakah, foreign a ni ve tho alawm, MLTP Act an hre ve tlat lova. Ka zawt chuang lo nain, a nih ka ring thla ngawt.
Kan Bus a len deuh leh kawng a chhiat deuh avangin, kawng hnai zawk lamah kan kal thei lova. Seling lam atangin Champhai kan pan thla a, kan bul tanna atang chuan; km 400 vel a ni ang. Tlungvel Quary vel kan tlan lai ka hre reng, kan motor kha Bus nge, Truck nge ni a; mau rap in tih hriat hran har khawpin vaivut in min bawh. Khu tiap tiap tak a ni.

Vanduai a siamin, ka thiannu thutpui a rui hlauh pek a. Ka kekawrah a bun ta mai bawk nen, a dang ka keng si lo; buaithlak tak a ni. Zan hnih chauh riak tur kan nih avangin, hak lai bak ka keng lova; kawr erawh ka keng lawi a. Ka kekawr ka phelh a, ka tleuh thuak thuak a. Hak nawn leh theih pawh va ni suh, underpant nen ka thu ta tau mai. Underpant nen chauhva Champhai thleng hmasa ber ka ni mahna.

Jacket ka ha a, underpant ka ha bawk a; converse ka bun thung a. Hmel in hmeh vak loh nak a laiin, inhmeh a har ngiang mai. Zan dar 8:30 ah Champhai Tourist Lodge kan thleng thla a, chaw kan ei nghal a. Chaw ei laiin, Towel ka veng lawp lawp a; rin aiin zei a har.
A tuk chaw ei khamah Rih dil lam panin kan tlan leh ta a. Zokhawtharah Bus kan dah a, an lal lo kal lai a nih avangin; motor dang luh an phal tlat lova. Gate pahnihah Burma sipai ten min dang a, mi pakhat zelah Rs. 10 kan chawi a. Naupang ho hruai kan nih avangin, kan chawi nual.
Ke ngatin Rih dil lam kan pan ta a. Rihkhawdar thleng chho ngawt a ni a, a hahthlak ang reng e. Rihkhawdar atang chuan Rih dil a lang ut tawh a, minute sawm vel kan kal a; kan thleng chu a ni mai. Tlawhtu an tam, an lo ri hlut hlawm a.

Rih pal an ti mai a, thing sang lo te hian a lo hual chhuak vek a.

Thing te chu thi ro vek angin an lang a, an nung vek tho si a. Rih dil hi lan dan chi thum in a lang tak tak a, love sign, pariat ang leh sâwl putin. Rih dil tui lak hran hian, dil tui a nut chang chuan a lo nu ve vek thin an tih erawh; a dik chiah lo niawm tak a ni.
A kal tawhte tan chuan, a ho inti mai thei a. Kal lo tan erawh, kal ve ngei chi a ni. A mawiin, a lian tha khawp mai a. Thla ka la char char a, ka thlalakna ken kha Handycam mai mai a nih avangin, mita hmuh anga mawíin a lak theih chiah lem lova. Mahse, a mawi hranpa ve hrim hrim piah lamah, a hlu ve tho e.
Kan tlawh ve ni ber kher kha chuan, kan tam khawp mai a. Kan thleng sup sup a ni ber. Zu dawr pakhat a awm a, an inchhawp fer fur a. Nu ho te lam, an whisky hlawm a. An lam suau suau, chakawm ve tak a ni. Keini leh naupang ho erawh kan fihlim a, a lawmawm khawp e.
Boat te reuhte pakhat a awm a, mi pakhat tan Rs. 40 zel a ni a. Kan naupangte nen chuan kan chawi nual a, mahse, a hlimawmin Rih dil kan kal chhan a ni tho bawk.
Tlai lamah erawh Bus kan la lut thei ta hlauhva, ke ngata let leh a huphurhawm si a, vanneihthlak khawp mai. An motor number chu, ka sawi thiam dan chuan; Nihawi chi a inziak ang chiah a ni. An signboard chhiar thiam kan awm lo kha, a mak hranpa love. Nihawi chi an tihna ah kan ngai hmin hmak mai.
Rihkhawdar paltlangin, Rih dil kan pan a. Rihlipui Hotelah chawlin, Rihthlipui chanchinbu Champhaiah kan chhiar a. A nuam ve mai mai e. I la kal lo a nih chuan, kal ve ngei tum rawh.

23 comments:

  1. "Jacket ka ha a, underpant ka ha bawk a; converse ka bun thung a. Hmel in hmeh vak loh nak a laiin, inhmeh a har ngiang mai." haha ka hmuchak hle mai che...


    "Rihkhawdar paltlangin, Rih dil kan pan a. Rihlipui Hotelah chawlin, Rihthlipui chanchinbu Champhaiah kan chhiar a." amawi dangdai riau a thu hi...kalve ka va chak vele. I thlalak ho te cgu i bel kai lo nih hi mawle...

    ReplyDelete
  2. Marvinic, nia ka la rawn bel hlawm ang.

    ReplyDelete
  3. kei chu Rihdil ka la hmu reng reng hlei nem, hmuh ve hun a la awm em ang chu. I ziak ngaihnawm e.

    ReplyDelete
  4. Rp, a nuam ve teh asin. Khawvel pian ken nisi khuan, mihring design te pawh a ang mah zawk.

    ReplyDelete
  5. Mizopa thinlunga dil lian ber leh hmingthang ber, a tak ram erawh International Boarder piah lam daiha awm ni lawi si khi, Mizopa tan chuan a hlu hle a, a la hlu dawn chauh niin a lang. Rihdil ah khian ka la kal ve lova, kal ve pawh a chakawm khawp mai. Thlalak chu lo tarlang teh, hmuh ve a chakawm alawm le.

    ReplyDelete
  6. Ziak ngaihnawm leh viau mai a. Thu chheh vel hi i lo hnehsawh hle mai. Kan thang lian zel a rin loh deuh deuhnaah hian kan special a nih hi....

    Ngaihnawm lutuk...

    ReplyDelete
  7. Dil kama nula nena Burma beer 'skol' ngei mai kan dawm dun lai ka hrechhuak.ha hai

    ReplyDelete
  8. Sir, lo la tarlan ka tum ang. Exam a hnai a, hun ka la nei lo em a ni.

    ReplyDelete
  9. U Kris, ka lawm e.
    Special tihlamah chuan, special love a. Thuziah hi a nuam ve hrim hrim ka ti a.

    ReplyDelete
  10. Lamea, chu nang chu i changsang bik hle mai hahaha.

    ReplyDelete
  11. 'Mizorama dil lian ber chu Rihdil a ni a, mahse Burma ramah a awm' kan tih thin laite min tihrechhuak e. Rih dil hi ka la kal lova, Tiau lui erawh khi chu ka kan ve tawh.

    I ziak thiam bawka kal ve pawh min tichak a lawm mawle

    ReplyDelete
  12. Triplestar, la kal ve ngei rawh. Khawvel pianken thilsiam mak dangdai tak chu a ni ve ngei mai.

    ReplyDelete
  13. A ngaihnawm khawp mai. Hetiang lampang ziah i thiam ka ti, nangmaha 'ziah' a lan lai khan ziak chur chur rawh!

    ReplyDelete
  14. A ngaihnawm...thlalak han dah tel bawkla chuan chuti hlauh tur. :)

    ReplyDelete
  15. Pu H.V nia, hun ka neih chuan ka la rawn dah ang e.

    ReplyDelete
  16. Kha aw:
    http://i43.tinypic.com/2k1x10.jpg

    ReplyDelete
  17. ngaihnawm ve zel e...la kal tur ani..nikum nipui lai khan kan thianho colg chawlh lo ho khan kal kan tum a,,kan insawi hlawhtling thei ta lo anih kha. Pawi khawp mai.

    ReplyDelete
  18. Misual a i post khan ka chhiar tawh a, a la ngaihnawm reng mai. (Y)

    Tiau lei, burma ram lam a intar REPUBLIC OF THE UNION OF MYANMAR tih an tar kha i hmu em aw, dangdai riau. Ram hmingah OF tih pahnih ram an awm ve ang em le.. :O

    tren tren.

    ReplyDelete
  19. @chhuaklinga, nia vawi hnih OF awm tut kha maw le :D
    @hermit, nia kal ve ngei rawh, a hlawkthlak teh a nia.

    ReplyDelete
  20. I ziak ngaihnawm thiam hle mai. Ka dam zel chuan ka la kal ve ngat ang maw le..

    ReplyDelete
  21. Haha...La kal ve ngei rawh.
    Nuam deuh mai a nia.

    ReplyDelete
  22. Misual a i post kha ka chhiar tawh na in ka chhiarchhuak leh vek e. I ziak ngaihnawm thiam khawp mai. Foreign te i tlawh tawh bik a....haha

    ReplyDelete
  23. U Sheldie, a ropui lem lo e tiraw? :D

    ReplyDelete