A nunah entawn tur leh ei tlaka nun mawi a awm lem lo. Fak tlak a awm hek lova, chawimawi tlak pawh ni hek suh. Mahse, a thianpa ka nihna changchawiin ka ziak ve hrim hrim dawn.
Kan zawt lem lova, kan zawt peih hek lo. Ka hming chu a bul atanga a atawp thlengin, zep ruk leh zep then awm miah lovin James Bond a ti miau. Tun thlengin kan la pawm chiah lo nain, thianpa James Bond ti bakin kan ko ngam chai lo.
Naupang chumchiap kan nih atang tawh renga Val Senior kha a ni a. Nupui hi a hmu zo lo a ni bik lo. A duh aten an duh lova, amah duhtute a duh bawk si lo-an chhe ve em a nih kha kan la tihpui fan. Duh ngat se chuan, khawkhat V.C chhungkaw zinga Job Card spare nei pha chin ngat kha a ni ve tawh ngei ang. Nei ve tawh la an tih pawhin, ka nghei dawn chuang lo a ti khur mai leh nghal.
Kan naupan laia kan inkhelhnaa a lo tel tawh chuan, hattrick a siam ngei ngei ringawt a. A ni aia goal thun thei an awm chuang lo. Hattrick a siam loh chuan, kan ngal a rim tlauh tlauh khawp ang tih kan hre tlat alawm. Tih thinrim palh vaih chuan, ball kha a pet liam chhen ang a. “Chhar rawh u” a ti leh riap ang. Chhar hmasa ber nih loh hlau reng rengin kan khawsa ang a, chhar hmasa nih tum theuhvin kan invel tap leh ngei ngei zel.
Hmanhmawh takin kan han chhar a. Ball chu a thut ang he hu ang a, vawi sawm tak a hmaah kan la utawk sawh lauh lauh phawt ang. Chumi hnuah chal a ri fawk ang a, “Ka lawm e” ti rawh u a ti leh hlauh va. “Ka lawm e” kan tih zawh hnuah kan hawi hmak ang a, biangah mittui a luang leh sung sung mai dawn a ni.
Tih thinrim aichuan hattrick siam tir a, nuih tlawn hluah hluah kha a finthlak ber a. A pawla tang pha nih ngat phei kha chu, chawimawina sang tawpkhawk a ni. A ngal chang tak kan hlauh piah lamah, a thinrim kha a hlauhawm em a nih kha. Duh leh vawi 20 pawh hattrick siam rawh sek sek, kan chalin a tuar dawn lo a nih chuan a pawi reng reng lo.
Kan lo changkan ve tak hnua a thiantha kan ni pha ringawt pawh hi a mak a. Khawvel hi a mum chiang alawm. Nge zangkhua an kuai bungbu vu a, zawhte a ngiau miau zawk. Chuti ni lose zawng, thianpa Jb tia koh duat ngam kan awm hauh lovang le.
“Lo leng rawh u” a tih rum tulh avangin, leng lo ngam kan ni lo. An in kan thlen thlak meuh chuan, an kawmthlang nuthlawi inah dulkiar rang niai-in a lo thu dum leh chut tawh ang. Thawhchhuah nei lo tih hriat fahran si kha, a lo insawithei leh hlut ang a. A thiante bat sak cigarette kha a zu khu leh tual tual bawk dawn tih a hriat reng.
A lenglai tih buai leh biak buai kha chu thiltih chi loh tawp a ni a, serh leh sangah kan ngai hmiah. A lenglai tihbuai chu min seh rawh tihna ang lek a ni a, a feedback chu sawi lovah kan ti. A thiantha te mah ni ila, hlauh leh tlawnrawn a ngai tlat zel kha chu kan ngei lek lek zel a, ngei ngam a ni si lo.
A bula nilenga kan awm tawh chuan, tlai lamah chuan rawl a na thei khawp. A bula awm tur chuan hrisel that leh fit a ngai khawp a, a punching bag-ah min hmang nileng zak zel atin nih kha. Bruce Lee a ngaisang tawp hlei thei lova, a mi ngaihsan an a tum tlatna kha kan tan chuan tawrhna a ni. A phur hlut ang a, bengngawng ram ram khawpin min han hneksawk ang a, “Ka lawm e” tih a ngai leh tho ang.
Khami tlaia a burchhe kick chak tlat kha ania ka theihnghilh theih loh chu. Kawng kova burchhe awm kha kick chakna thlarauvin a man tlat ni chek ang chu, “Min en rawh u.” Kan en thap a. “Ki-dawm-bari-hus.” Kawng ko a ri thlawp a, min pui rawh u. A lo inha tight ve deuh bawk nên, a ke dinglam atang a. Pawhthlak pui a ngai ta.
Kan nui ngam chiah si lo. Rangtakin kan pawhthlak pui, ” One, two…Three.” A kekawr kap a ri tuar a. Kan tuar leh ngei dawn kan ti rilru hman a. Keini ‘Zawng’ tawrh ai a chhungte ‘Ngau’ in an tuar ta hlauh.
Nula rim hratkhawkheng a ni nain, nupui a nei duh hauh si lo. An chaw ei hma atangin min thutpui leh run tawh ang a. Duhlo eng ang mah ila, thianpa Jb a ni miau-hlauh leh tlawnrawn a ni tlat. Chaw an ei kham e, kham love a thlu hauh lovang “Dospati” ang a ti leh riap mai dawn a ni. Heng vangte pawh hi nita ve ang, a nupui nih an peihthlawt lo a ni ang kan ti tawp.
Zankhak kan nula rim tur thik ken sak ve a duh si. A nei daih lo a ni chek ang chu.”Ka pi Wai Wai hi eng zat nge?” Cheng sawm. “Cheng nga-in min tlawm la.” Aw, ka zak lutuk kha dawr bulah khan ral daih ka châk. A mawl chu kan ti ve tho, mawl tih tawngkam chhakchhuak ngam kan awm si lo.
Pitar chuan, “Kal mai teh.” A thinrim zawk mah a. Hetiang taka thianpa dangdai leh maksak kan nei hi a hreawm lek lek thin. Samak ai pawhin a mak ta ve ang le. Chuvang alawm khawvel chhuahsan a, Burma rama pem san daihte ka châk thin.
A insawithei rem rem khawp a, Savawm a hmuh thu a sawi a. “Luite tui ka in laiin, mi rawn bawh thut a. Ka lo kiansan hman a, a tukhumah ka silai kawmin ka chhut sak a. Mi rawn zuan leh dawn chiah silai ngulin a ringah ka nawr bet a. Mi rawn tibuai tawh suh ka ti a. A thaw a uih lutuk” a ti.
Engpawh nise, thiantha a nihna a bo chuang lova. Min er tlattu leh min haw tlattu aichuan a la thlanawm fo tho ve. Thiantha chu thiantha nge nge. A nun kha a huau huau zawngin kan thlir sak tawp mai.
Chi thlah a tum lo tlat erawh a tha teh chiam lo. Huna liam zel angin kumte pawh a liam ve zel ang a, ” I bawrhsawm pawhin…Tiam tlat e” a tih hun a la awm ngaite a nih chuan, an khum tur nghet tlet tlawt tak, a ke pawh Thlado banril ngatin ka la siam sak ve ang chu.
Chumi hma zawng, “Ka lawm e” kan la ti reng dawn a ang. Nupui nghet tlet tlawt, chawn duhawm lam deuh, sa nghet leh ban bul vuah tha deuh erawh kan melh bâng love.
No comments:
Post a Comment