A nei nung nung, a feng chhing chhing an nalh a. A nei lo lo, a feng fual fualin nuih an ti za thung. A neiten an neih belh tun tun a, a nei loten an tuar zel a. A neinung leh thiltithei ten tlawn an hlawh a, thei ve lem lote kan rap bet zel e.
Hlawh a pung a, mistiri hlawh chenin a pung a, thil man a pung bawk a. Pawisa hlutna a tlem thung a, a lei theih a tlem ta. Lak aiin pekin lukhawng a nei tih kan hria a, pek aiin laksak nun kan up hmin a. Thuneihna leh chakna in ram kal kan siam a, thuneihna kan chên a, chakna in kan thiat mek a ni.
Thuneih leh hruaitu nih inchuh reng rengin kan hun kan hmang a, college-a Student’s Union thlengin eitur leh eitheih zawngin kan meng hru ta. Duhamna leh itsikna in kan khat a, kan ngaihtuahna tenawm hmangin tual kan that a, kan uire tawh a nih hi. Hmingthatna hi sum in a lei theih loh tih hre reng chung siin, a sexy leh herh thei ang bera thla la kualin, video hial hmuh tur a tam. Damchhan hre hlek lovin damrei kan thlahlel a, tap ru chungin kan nui der niin alang.
A tak kan tlem a, a sûak kan tam a, zai kan uar a, music tel lova zaithiam kan tam lem lo(?). Intihlar a awl a, intih kohhran mi a awl a, kan lar leh lar loh, kan kohhran mi leh mi loh erawh mite min tehna a ni. Inlarna leh Vantirhkoh hmu kan tam ta a, khawvel hi a tawp tep tawh a ni mai thei.
Damna damdawi tam tak damna atana hmang lem lovin, thalaite Virus-ah an chang zo ta. Nun letling kan zahpui lova, damna damdawi kha tûr ah, lansarhna kha hminghliau na ah leh sakhuana hmaikawrah kan chan tir a. Sum hlutna in ro a rel a, damna, hmelthatna, lehkhathiamna leh changkanna sum in kan lei lo thei lova, sum ngah apiang an thi hla.
Thian neih a awl a, hmelhriat neih a awl a, thian tak takte erawh an tam lem lo. Kan thian nia kan ngaihte kan hmelma min rawktu ah an chang fo.
Camping a zing a, team an pung a, kan piangthar zing a, piantharna leh chhandamna kan hmu dal zo niin alang. Kan duhdan leh rilrem zawngin Pathian kar kal kan tum a. Biak In sak tha leh insak tha in, kan nun tha lem lo a vawng mek a ni. Tawngthei tawh phawt chuan cell phone kan ak fer fur a, tangkai taka hmang erawh tlemte kan ni.
Kawlawm dawthei leh dawt thu in kan nun ram kan puntir a, dikna leh thatna kanpaih a, hlemhletna leh chapona kan nun ah kan belh a. Nekchepna leh hnehchhuh nun kan sem hlauh thung.
Eiruk tur, mi chesual leh thil tisual chang ranin kan mit kan meng a, kan chunga leng leh kan ngam lohte kan arpui mitmen der san a. Piangsual, riangvai, kutdawh leh ruihhlongai tanpui ngaite kan mit kan chhin san leh lawi thin. Kan ngaihsan kross hian kan nun a tikawkalh a nih ngai chuan hremna kan tawk ngei ang le.
Kan neih ve tura kan rinloh leh kan zinga awm ve tura kan rinloh MOBILE leh AIDS ten min rûn a, kan rui a, kan tuar mek zel a ni. Kohhran leh NGO chenin kan buai zova, condom hmang turin kan inzirtir chung chung hi kan tlai tep tawh nge kan tlai tawh tihna zawk le? Aids vanga thi kan awm ta nual hi kan tlai tihna a ni mai ang em?
Suangtuahna uire ching leh bawlhhlawh tak tak nên tuallai kan leng a, kan inpel suau suau a nih hi. Midang thlir lek lovin, mi nek rân in kawtthler kan mawi a, kan hnunah miten min nuih tih kan hre si lo.
Kan politics thlir dan a tenawm zo tak avangin, mifel, mithiam leh tha kan ram tana mi tangkai tak tak leh hlawkpui turte kan up bo mek a ni.
Sunday zingah biak in a khah laiin, zan lamah a ruak huau va. Thusawi sei kan ngaithla peih tawh mang lova, thusawi tawi thiam apiang thusawi thiam leh fak an hlawh mek a ni.
A titu leh chhan tak hre lovin kan ar te thih ta fova, ram ralmuang hi a ralmuang lo tan a ni mai lo maw? Mahni inah ngei min luhchilh a, min rawk a, kut kan tuar a, kan nun kan chân ta. Kawi kâwm tha pawh a rah a nget tan a, sunhlu kungah thei dangten rah an tum a, hmeichhe finin tuikhur ral a kai ta.
Heti zela kan awm a nih ngai chuan, pitar te hi kan tuikhur hnarah a e pherh diai ang a, eng nge achhan tiin kan in zawt kual ang a. Kan hmasialna tura chempui kan tahna ruam a kan eng emaw khawihtu, kan ngam zawngte kan puhthla rawk ang a. Keimahni kan in dahtha daih thung ang tih a hlauhawm ta e.
In enfiahna hun kan nei tawh lo, kan tlai tan a ni. Kir zai rel tawh zawk ang u. Chatuan hawlh lem lo kan pu Chhura ko thlak ngam ila, kan pu Nahaia ko i vuan tawh zawk ang u. Khua kan tlai chuan, sial a bo tawh hnuah a kawngka kan khar chiam ang a, a sawt tawh awm si lova…
No comments:
Post a Comment