12 March 2012

Lunglengte lunglenna lunglen

Lunglen atchilh mi ka ni hi ka indem love. Hla phuahtu leh ziakfung chawitute suangtuahna leh hmanraw tangkai chu lunglenna hi a ni. Thu leh hla tha tak tak ruhrel dinchhuaktu pawh lunglenna tho a ni.
Zing ni chhuak engmawi êm ém ti engmawi zualtu leh lunghnur taka vanrang chhumte an kal mawp mawp lai pawha, hlu chungchuang pawh lunglenna tho a ni. Hmangaihte inkawp rem lai leh hmangaih avana inthen tawhte tana hlu chuang leh mihring min ti famkimtu pawh a lo ni e.
Chhun pachang ni sat vawl vawl lai leh zankhaw tairek chena min kalsan ngai hauh lotu a ni reng fova. An sawi Berhva leh Rengchal te ti tap a, ti kiu tu pawh lunglenna bawk a ni. Thal romei zamchiai ten tlang leh mual mawia, an bawh pawt chek timawi zualtu leh ti romei tu a la ni cheu va, mual hla kar dana kan di pawmlaite hlimthla min hmuhtirtu chu lunglenna chauh hi a ni.
Mi lunglengte lunglenna luahtu pawh lunglenna tho a ni. Rethei leh hausa ber thlenga thliar hauh lova chenchilh rengtu thiantha chu a lo ni a. Famngaite famngaihna pawh a ni a, famngaite hnemtu chenin a lo ni.
Lunglenna leh hmangaihna hi a inkawp tlat a. Hmangaihna hi mipa nise, lunglenna hi hmeichhia a ni ang. Lunglenna a lungleng ten hmangaihna an ngah a, hmangaihna ngah apiang an lungleng mai a lo ni. Hmangaihna tel lovin a lunglen theih lova, lunglenna tel lovin a hmangaih thei hek lo. Chuvangin, lal ram meuh pawh a lungleng ral thei a, hmangaihna avangin lallukhum hial a chán thei a ni.
Misual buru ber leh buru lem lote, fel leh sual, hmeltha leh chhia pawh thliar leh iai miah lova, amah lo kawmtu apiang lo dawl thin tu leh phatsan ngailo tu thilsiam ropui chu a va ni êm. Misual ber tan in thim chena zui luttu leh kalsan ngai reng reng lotu chu lunglenna a ni.
Patling leh nutling meuh pawh velh lova ti tap thei tu chu lunglenna a ni a. Nausen, naupang, thalai leh tar chena mittui thlemchhuaktu chu a lo ni. Thu leh hla thiamte lungleng lose, thu leh hla tam tak nawh reh an ni ang a, hringnuna a zar pakhat sahthlak ang a ni ang.
Sawichhiatna ho ber leh tualthahna rapthlak ber duanchhuahna hmun ber thinlung tenawm ber pawh ten hauh lova, rinawm taka riak tlat tur rohlu chu lunglenna chauh a ni. Tawrhpui ngai a tawrhpui hreh lova, hnem ngai a hnem hreh lova, tahpui ngai a tahpui hreh hek lo.
Mi hratkhawkheng Adolf Hitler ti hratkhawkhengtu chu, ram leh hnam tana a lunglenna a ni a. Thu leh hla lama mi ropui William Shakespeare, William Wordsworth, John Milton, John Keats leh Thomas Hardy adt. ti mihringtu pawh lunglenna mai a ni. “Father of the nation” Mahatma Gandhi ti huaisena, tipaukhauh tu pawh a ram tana a lung a len tlat vang chauh a ni.
Lunglenna a hmang thiam lo tan erawh Tûr a ni. Lunglenna avanga mi ropui an awm laiin, lunglenna avanga Pathian chauhvin a pek theih NUNNA mahnia la mai kan awm fova. Kan la awm zel bawk ang. Damdawi damna a nih laiin, a hmangthiam lo tan thihna a ni a. Chutiang bawkin, lunglenna hmangthiam lo te tan thihna bawk ah a chang thin.
Lunglenna midangte tana inpuanchhuahna ngaihnawma nih laiin, mi dangte tan erawh pindan meuh pawh chhuahsan tir thei lova min siamtu a ni. Ka nu chhul chhuahsan tu hi, khawvelin min lo hmuak a. Khawvel chhuahsan tu tura duan hian, khawvel chhuahsanin Pathian siam “Lunglenna Khawpui” in min lo nghak a lo ni e. Lungleng lo a awm theih ang em le?

19 comments:

  1. Lunglen pawh hi a hunlaite hi a lo awm ve emaw ni chu aw ka ti thin. Hmel ena lungleng ve ngai lo niawm tak te pawh hian a chang chuan lungleng takin an hun an hman ve chang a awm fo thin. Lungleng tak leh khawhar taka awm hi a nuam lo na a, lunglenna hian kan ngaihtuahna ril ber ber min phawrh chhuahtir thei lawi thin si. Lungleng avanga thu tha tak tak te, hla tha tak tak te, thu lungkuai tak tak te kan phuah chhuak thei anih chuan a tha, chutihlaiin tlangval Thangzawra anga lunglen avanga engmah tih zai rel thei lova kan awm anih erawh chuan a thalo ve thung ngei ang le.

    I naupanna tuman ngainep suh se, i kum a la naupang na a, thu leh hla lamah erawh kei aiin i u zawk e. A dang pawh lo ziak zel teh.

    ReplyDelete
  2. Sir, mi i fak thiam thin e. Ka lawm e. Ka exam zo ta a, a thar update ka'n tum tan ang e.

    ReplyDelete
  3. Ka chhiar pahin eng eng emaw min mitthla tir riuh reuh reuh a, chhiar a tinuam zual hle mai.

    ReplyDelete
  4. Pu H.V, ka thuziak ho te te pawh; min lo comment sak thin a, ka lawm e.

    ReplyDelete
  5. Lunglen loh hian thu hi a ziah theih mang der loh! Lungleng hman lova awm hi chuan thuziak hi a hul hak mai a ni :) I ziak tha leh ta. Nang nge nge.

    ReplyDelete
  6. Pu Zaia, i ti lawmawm thin mang e.
    Ka blog-ah i lo leng fova, ka lawm khawp mai. Lo leng zel teh khai.

    ReplyDelete
  7. A thupui chu ka hrethiam pha chiah lo a, mahse ka chhiarchhuak a, i ngaihtuah kual thiam ka ti em em.. Ka lung a leng kual vek in ka hre mai..

    Mi zawng zawng kan in an na...Lunglen!.

    ReplyDelete
  8. Ma-i, a thupui awm zia chu hei hi a ni.
    Lunglengte han lunglenna ber chu lunglenna a ni ka tihna a ni. A fiah em aw ka hre lo.
    Ka blog i rawn tlawh fova, ka lawm e. Rawn leng zel teh khai.

    ReplyDelete
  9. A tha hle mai a. Chhiar a man hla ngei e. Lungleng avang hian a nia thu ropui leh ril kan ngaihtuah chhuah thin. Newton te kha..

    ReplyDelete
  10. I thuziak hi a ngaihnawm thei khawp mai. Keini ang chuan ziak dawn ila a harsa kan ti khawp ang.

    ReplyDelete
  11. Ltchhakchhuak and Sangpuiipa ka lawm e. In lo leng fo thin dawn nia.

    ReplyDelete
    Replies
    1. A ngaihnawm dap dap hle mai..Lunglenna hi chuan mi t tilungleng thei em a ni.

      Delete
  12. Ni e, lunglen hi na in hrehawm thin mahse malsawmna inphumru a lo ni ang. I phuhchhak thiam kher mai.

    ReplyDelete
  13. A ngaihnawm dap dap ngei mai.

    ReplyDelete
  14. E, blog. tha tak a ni. Chhiar a man hla. A dang pawh ka la chhiar zel ang. Vawiin hian i Blog. hi ka hmuchhuak ve chiah a ni. Thu tha tak tak han ziak zel teh khai!

    ReplyDelete
  15. E, blog. tha tak a ni. Chhiar a man hla. A dang pawh ka la chhiar zel ang. Vawiin hian i Blog. hi ka hmuchhuak ve chiah a ni. Thu tha tak tak han ziak zel teh khai!

    ReplyDelete
  16. A ngaihnawm ka tiin rilru a fan takzet a ni.

    ReplyDelete