9 February 2012

Bike lei ka ngen ve a

 Chhungte’n min hauh vaih chuan, chaw ngheiin fanghmir kawng bo nilenga thlir peih; luhlul tawpkhawk kha ka ni ve a. Bike lei ka’n ngen tak tak mai chu, pui niap niap tak a ni.



Newton’s 3rd law of motion kha ka vawng ve tlat a, “To every action, there is an equal and opposite re-action” tih te hi. Min tih dan equal leh opposite zelin ka’n che tak tak mai chu, an buai teh a sin. Science min laktir kher a nih kha, ka thil thiamte ka nitin nunah ka apply mai loh nakah.
Pa khirh, Nu khirh-
Min tihhlawhtlin sak hma loh chuan, Newton’s law ka apply zel dawn tih an hai mawlh lo. Min uksak pui lohna pawh, sual rawng bawl nân leh lentam phah nân i hmang ang a. Lehkha zir theih loh phah nân i hmang ang min ti tlat a.
Chubakah, chetsual nân ka hman an hlau a ni. A dik lutuk tlat. Mahse, tleirawl hawklak ka ni ve alawm. Thih loh huna thih pawh thil awm thei a ni a, accident vangin ka thi thei tlat, robot ka ni si lova. An sawi dik, keipawh ka ngen dik.
Nakinah hlawhte i neih hunah, i la nei êm êm ang an ti tlat. Tuna duh ve lém, nakin nghah te chu a. Nakinah ka neih avangin, ka accident dawn lo tihna a ni hauh lo. Neih theih hmaa neih te hi a nuam a, a hlu zual thin a lo ni mah zawk.
Hero Honda, dhak dhak go-
Ngen tak meuhva ka ngen hnu chuan, min phalsak ta. Ka va lawm teh reng em!! Eng Law mah ka hmang tawh lovang tiin ka intiam hial.
Mahse, ka buai tak ber chu eng ang nge ka lei ang tih a ni. A sum lamah chuan eng zat pawh nise, ka ngen tawh hrim hrim a. Eng bike nge ka lei ang tih zawk a ni. Ka body milpui tur ka thlan thiam a ngai alawm.
Khawpui chep lutukah hian Karizma han hawl chhuak ve ngawt ila, Traffic Jam vaih teh se; mi Taxi tlawh lo chuan ka inrapkhalh pha kher lo ang. Scooty lei dawn ila, a ho. Kei ang tlangval pa lutuk hian, a tuai ka tihzawng tak a ni ve khanglang.
Khán hniam lamte hi-
E…e, ka hria. Enticer hi a khán a hniam a, ka tih chi tak a ni ang em? That chu a tha, mahse… Eng nge mahse? “Mahse, a steering i vuan pha kher lovang a, a break i rap pha kher lovang” min ti tlat a nih kha. Apache RTR 180 hi a pick up a tha a, a tih chi tak ang a. Hei pawh “mahse” ah bawk a thamral, hei ha.
Ka kezungpuiin lei rim a hre pha, chho ulh deuh ah din ngai thut se; nula ka phur ngei dawn a. Duhthusam chu a ni chiah lo deuh. Lo khalh thiam hle pawh ni ila, chet chhiat palh pawh thil awm thei a ni.
Chi hrang hrang ka chaih kual a, ka body mil tur an siam duh tlat lo. “Mahse” ah a tawp zel. Ka hre ta…
R-15 hi a mawi hrim hrim a, a steering chu ka vuan pha var var. A head a nalh piah lamah, ka inhmeh chi tak. A sang lutuk lem lo, a tih theih mai ang.
A mawsala lam hi-
Bike nei ve tur si, a mawsala tello chuan a dikhlel deuh. Chei vak a ngai lo, a alloy ka kap sen hlarh ang a. A seat ah Arsenal logo chuang ngei ka hmang ang a, a dang chu ka mamawh tawh lo hrim hrim a ni tawp. Petrol man dil a ngai, chu zawng chu.
Mamawh dang a la awm nual leh lawi si. Nula lam te pawh le, a tello chuan Bike hlutna a bo thak. Thalai ka ni tlat alawm, mamawh êm êm vanga lei pawh va ni suh. Sam sei hnáp, ngo veng vung, 120 km/h a ka tlan pawh a; a hnunga Wai Wai leh Kur Kure chawhpawlh zet zet thei a ni tur a ni.
Jacket dum kher ka ha ang a, Supra lawk tha tak ka bun ang. Helmet-ah ka buai lo, full face nge ka khum ang Khumbeu (nui suh). “Polo” sunglass nge, “ess pee” nge, “Ray Ban” ngat ka duh ang? Ka hria e, a pathumin ka lei thawt ang. Pakhat ka vuah ang a, pakhat ka chal záwnah ka thiat ang a; pakhat ka T-shirt nghawngah ka khai va ang.
A botlle nge funte?-
A la kim thei tlat lo nia. Ka nula phurh tur khan, MAN lo min ti dawn em mai. A funte nge ka lam ang a, a capsule nge, a zawlaidi zawk in? Ngawiteh, hei hi chu ka nula thu thu, a duh duh a thlang thei.
A thlan zawhah, ka duhzawng ka thlang ve chauh ang. Russia siam Vodka nge, India siam Bagpiper nge, veng mawng siam Local le? Eheu, eheu…va nuam dawn riap riap ve. A ho e, a changkan kher a ngai lo; a ruihtheih lek luk chuan a pawi lo.
Ka mamawh zualpui chu ka nei a lawm, a dang chu a tul dan a zira chet tur. Buai suh, ka awm a lawm ka ti sap ang a. A bak zawng chu Reiek tlanga anthurium nena inthawi chiah. Famkim lohna khawvelah a famkim thei tlat lo zel.
Duh danin kan ride-
Khawpui chep takah hian, tih tur nei lem si lovin ka tlankual chhen ang. Mi tana hnawksak tur leh hlauhawm ka dâwn a tul lo, motor karah ka inzep phei zet zet mai dawn a ni. Bike khalh te chu hnehsawh tak ka ni, ka ngaihtuah awm lem lo ang…
Khawlaia hriau tla pawh tlan pahin, ka seh kawh nelh nelh thei. Mizoramah phei chuan, Valentino Rosi hian race-ah min cho ther te lo. “Mizo ho chu bike inthiam em mai, khawpui chep zetah pawh in race thiam” a ti tawp. Kha kha a ni mai, “Mizo kan ni kan hmel a tha, kan tum a sang bawk si” (Lengzem a ziah chi tak).
Zan reiah race pui tur ka cho chhuak lui ang a, bengchheng leh thih hlau lo niawm fahranin, ka tlan fia fia mai dawn a ni. Vanduai chin a thleng ang a. Ngûm sawh dawt a, ka lu ka sawh keh nuaih hunah ka sim chauh ang.
Ban zai ka rel mahna-
Zan rei tak tak thleng ka leng fo ang a, eng emaw rim nam ther therin ka haw fo ang. Chhung ten a chhan min zawt a nih pawhin, ka lo ngaihtuah lawk vek tawh ang. Ka in sawi kaw awm em mai. Mi ka bum dawn chuang hlei law, ka chhungte a lawm ka bum dawn.
Heng hi ka chhun leh zan routine a ni ang a. A awm ang lo em mai i ti maw? Thalai zawng zawng an ni vek kher lo i ti maw? Sawi suh, i sawi tum ka hre vek, “Teuh lo”. Ka hrilh ang che “Teuh”. A chhan i hre duh em? ” Keini thalai rual, lungkham nei lo, nu leh pa te ring a inchhek arbawm; thihna luikawr ruam pan kan ni tlat a tin ni”
Heng zawng zawng hi nei vek i la, thleng kim vek bawk se. Ka duhthusam piah lam thlëng pawn thleng se, he khawvel leh a chhunga thil awm zawng zawng pawh hi ka ta nise. Kei val to lo, Modern Saichawnkhûpa tia an hriat “KA U LIANA” hian, ka NUNNA chán si ila- KA TAN ENG NGE SAWT ANG?
Bike chu i lei ta em?
Lei nang…
Ngati nge a?
Heti hrim chuan, min lei duh kher suh u ka ti.

10 comments:

  1. Replies
    1. Kei paw'n ka hawn zau belh ve hlek e.

      Delete
  2. Bike hian nula a keng tel an ti thin sia tiin kei paw'n ka hna ka thawh tirh khan ka lei ve ngawt a, a lo ni reng reng lo. Nula ho pawh hian bike nei zingah rau rau, duh bik an lo nei ve tho alawm le. Ka bike-a chuang tur awm ve hek lo le, nula chhelo tak tak ka tlan pel khu rum rum ringawt zel.

    Neih theih hmaa neih te hi a nuam a, a hlu zual thin a lo ni mah zawk.

    He thu dik lutuk hi i rawn phawrh chhuak nalh kher mai.

    ReplyDelete
  3. Sir, nupui nei tawh leh tawh lo chu dang deuh a nia aw. Nula ho hi an fing riau zel hahaha.

    ReplyDelete
    Replies
    1. Ka bike neih thar lai vel kha ka tlangval lai a nia, tin ka bike neih thar lai khan Pulsar vel ho hi a la chhuak lo bawk a. A hunlaia bike manto leh changkang neih kha, keini ang tan chuan eng a ni ve chuang loooooo.... Tluk khut khut nan bak kan hmang ve tlat lova.

      Delete
  4. Ngen chhuak hram maw hehehe.

    Ka ngen ve tawh, tun hnu thleng hian kala inchhir. Kapa pawisa neih zat ka ngaihtuahin kalo ngen ngam te kha ka zak.

    Rajoot Yamaha (Yamadoot) 350 kha ka neive thin (ngen chhuah nilo haha). Aizawl kawngpui a la thawl bawk a, Zemabawk kawng lah an siamzo ta bawk. Tuna Redrose phei vel te saw in engmah awm heklo, kan va tlanchak thin tak em. Tumkhat chu Dawrpui biakin chhukthlaah ka rui ka kual zolova truck ding mai mai ke kan zuk su bur, kan thlawk thui hle. :D Biang a belkang duh viau a ni.

    ReplyDelete
  5. Pu H. V, hahaha...Chanchin nuihzatthlak i ngah ang reng ngawt mai. In sum miah lovin han ziak pawp pawp mai la, a ngaihnawm ngawt ang.

    ReplyDelete
  6. Kan thianpa bike lei ngen te pawh ka hrechhuak rum rum mai. A nu te room ah inlarna a va nei alawm, hmunphiah a keng a, kawrkhar ah a uai kang bawk a, a lu ah torch light hmeh en sa a tawn bet bawk a. "Zikpui, Zikpui, I fapa bike lei rawh" a va ti thum dut dut a, a nu in a hmunphiah ken lai chuan a vaw thla ta a. :-)

    ReplyDelete