5 February 2012

Ka lo ruih em vang a lo ni


Mizo hla hlui tha tak tak heng- Lalrintluanga Varte-Ka nghei dawn chuang lo, Lalbiakzauva-Zuapa a rui e, Lalkima Zote-Ka lo ruih em vang a lo ni, leh a dangte hi up bo mai atan chuan a pamhmai ka ti deuh.

Ngaihtuahna tam tak min neih tir a, a hla thu thlir pahin; ka rilrua thil awmte han pawt khawm dawn teh ang. Lei em ka chawi em lovang chu maw.


Ka nghei dawn chuang lo-

Zet-u-zu sawi apianga chil put tlat thin hian a do chu sawi loh, a tihrem dan kawng dapa MLTP Act thlenga nghawngkawl an han bat rup kha chu; saruh helh takin ka helh hial a.“A duh chuan in se, a duh lo chuan in lo mai rawh se; in sawi a ngai lo” tia, Ui â ang maia bauh bauh thin ka la ni ta dah. Zalen takin zuar se kan changkang tawh lutuk, kan in thiam em em ang tiin; inthlan campaign taka campaign ching kha ka la ni zui.

A chhan i hre duh em?
Ka tuihalin zu ka in a, ka riltamin zu bawk ka in a, ka tuihalin zu tho ka in thin. Chuti chung chuan, in thiam ka inti êm êm a, pawr tak ka la ni. Zu ngawl veiah ka inngai ngai lova, zu in min vei zawk a ni ka ti thin. No ka keng khur dar dar a, ” Ka la rui lo reng reng” Hei hi ka mizia a ni.

Zu in thiam inti êm êm kha, ka pindan dawhkana mi khan daihloh chin ka nei ta zauh zauh. Veng mawng ka thleng thla ta fo. No khatin, no ruk a hring tan a. Ka rui ngai reng reng lo thung, ka kal thei lova; ka lu a hai mai mai alawm. Kei aia zu in thiam an awm chuang lo hrim hrim. “…a pa lo em mai, tihtauh nân hmang mah la..” Nu berin chhip samah min kek thawk a, zawi sapin “ka nghei dawn chuang lo” a ni tho tho.

Eheu..Eheu-

Kei Zu-in-thiama hian artui theuh theuh pawh, kan tur chhum a; chhum tur rawt thak ah nu ber ka puh ta fo. Ka rui lo, ka lu a hai tlat a. Mahse, ka khum bula no khat khan; veng mawnga no ruk zu ko tlat pek a.

Ka kal pai chhat chhat a. Mi kawngkal mai mai pawh, min cho riauva hriat chin a thleng a. An mit mengah, min melh rum riau tlat thin. Sawi tur ka hre êm êm a, ka sawi peih tawh loh chinah “Tu nge min cho?” in a zui châwk.

Engmah ni chuang si lovin ka chapo ár a. Het shala…tiin min pen keuh se, ka thu sawp niai ang tih reng ka dâwn ngai lo. Min chhang ngamtu awm se, ka pawr sauh ang a. Min chhanloh poh leh, ka pawr zual sauh ang. Zu ka in thiam em alawm, chhungte chu…bleh.

Zu avangin damdawi in ka hmu ta zeuh zeuh. Ka thi lek lek fo ta. A chang phei chuan, chhungten min lo tah laih laih a. Dam takin ka chhuak ang a, ZU tih nan ka hmui a zum zo leh ang.

Ka pi khawi maw um khat chu-

Pa ber a rukru berah ka tang chho tan a. Gas cylinder hi chuan, kar khat chu min daih ang maw le tih leh pawh chhuah ka’n rual a. Nu berin min lo hmu kiau si, “Tang rawh, tang rawh” a lo tih chuan; ka hul tihna. A kaw tawpa tan meuh chuan, fate period hun ka hre ta êm êm a. Stay free lei sak ka chak thar thut a, cheng 50 dil a ni mai. Va lei tak tak chuang suh i.

Fiamthua “Ka zu in chauh in sawi a, ka bawnghnute in; in sawi duh si lo” tih chu ka tawngkam hman duh pawl a ni tawh a. Kum khatah vawikhat bak a in bual lovang a ti khawpin, ka pawr tawh a. A tel lo chuan ka khur tan a, ka sen tul tul a. Zu ka duh ve tawh hle ah ka inngai ve ta chauh.

“Ka pi khawimaw um khat chu, La, la, la, la….la” hei hi ka la sa mai mai. He hla hi ka phuah nise, a hunlai kha chuan; “Whiskey Lullaby” nen inthlengah min dil se, ka phal ka ring lo.

Ka puam tulh a, zu vangin i Thin a chhe tep tawh a. I la in a nih chuan, i thih phah ang min ti ta heu mai. A ngawl veiah ka inngai ta a, ZU in thiam inti êm êm thin kha; in thiam loh chin a lo thleng ta a ni ang e.

“Rui saa ka lo piang lo chu a pawi mang e” ka tih thin laite kha, a lo Satel lu ta deuh a ni.

Zuapa a rui e-

Nupui fanau dáwn lo lekin suihlung a mawl zo ta. Zu in tura ka chhuah dawn apiangin, naupang hovin “A pa zu in suh aw” an tih tawk tawk thin laite kha; min hmangaihzia ka hre thar chauh va. Ka zahawmna leh ka chhungkua ka in chhe zo vek (a tlai zo ta).

Zu no dawm chungin, ka fa ten “A pa zu in suh aw” min ti asin ti chungin, mittui a tla pur a. Min hmangaih zia ka hria, Zu-in-thiama hian a nghei ta meuh lo chu a ni si a.

Rui takin ka haw ang a, kan chiar leh hluai ang. Nu ber rilruhah takin a lo thu ngui bur ang. Min lo biak that loh deuh chuan, ka che leh ang a. Inchhungah thlengthlawk thei leh bel thlawkthei chenin, ka siam leh ang. Naupang an tap niai niai ang a, nu ber in mittui a hru fap fap bawk ang.

Ka lo ruih em vang a lo ni-

Thih chhan “Tluk leh ding áwn” ka thih ni ah an la ti ang a. Mitthi chanchin an sawi ve ngei ang a, a dam that phawt hi chuan; “Tluk leh ding awn hi a ni ve a” tih bak sawi tur an hre kher lovang. Pastor in min vui ve ngei dawn a, “Biak in a kal pel ve thin” tih bak sawi tur a neih ring suh.

Zu avangin inthen chang a awm nawk a. ” Ka nun ka sim tawh ang” tiin, a ngaite bawk ka ni a. Zu a thlum belh sawt emaw a ni ang. Ui â pawhin hawn nachang a hria a, patling meuh hawn nachang ka hriatloh chang lah a tam. Ka tlai leng ka hawn meuh chuan, “Ti ti ik ik” a ni fo.

Inthenna leh fahrah siamtu, nuihza bur leh zahawmna thai bo tu mihring thilsiam tenawm chu a va ni êm!! Thleng thlawkthei leh bel thlawkthei ka siam laite,mi nun khei rana ka rák vel te, mawi lo tak taka ka tawng te, ka chapo ár lai leh; “Rolenga a tap e, Chhingmiti a tap e” te an tih lai khan-KA LO RUIH EM VANG A LO NI.

Lalkima Zote sak-

Hringmi doral lian ningzu,
Engan ka lo tawn che,
Ka thai duhlai min then tir tu,
Chun nu, zua leh chinlai unau,
Sam ang min then tir tu,
Lanu, val rual nun her sual tir tu,
LU-TI-HAI mai a lo ni e…

tiin a tlang ka’n tlip hram teh ang. Haleluiah pek thuai thuai a va chakawm ve.

14 comments:

  1. Zu bawk maw helamah pawh...:)

    ReplyDelete
  2. Mobile atanga ka comment kha a lut miah lo anih hi.... Zu hi a lo tha viau anih ka ring, a in thin te'n an fak mawi thiam mai bakah MLTP Act hi an ngaithei lo buruhseh bawk si, a thatna lai tlemte te thur chhuah tur an hre thei bawk si.

    Zu ah hian huaisenna, tawng huaina, insual chakna, buai cho em emna leh chawei huaina a awm mai bakah, zu hi zahna kawna tlangnel taka min kal tir theitu a ni a, tin, zu ah hian Saptawng tlem an bilh tel bawk.

    ReplyDelete
  3. Sir, heng zawng zawng hi mi â ang maia min siamtu zu hnathawh vek a ni a.
    Mi â engmah ngaìhtuah leh zahpah pawh nei lova min siamtu a ni zawk mah.

    ReplyDelete
  4. Zu hi a tha lo, thil tha lo zawng zawng hi anmahni maiin a tha lo vek lo :) , thil hmansual awl tak hi chu hlat a tha ber zel. I ziak chhuak thiam hle mai.

    ReplyDelete
  5. Lr, ka rawn lut ve mai mai..haha. I ziak thiam chu ka ti lutuk a, mahse Zet-u-zu chungchang hi ka ning tawp tawh. Kan hruaitute lah hian an ngaisang lutuk a, an han khap vel a, zu hlutna an ti sang mai mai a, ka ning khawp ani. Zu hi zalen rawh se, a induh lo chuan an in dawn chuang lo. Kan changkang tawh, kan nundan leh kan duhzawngte kan kut zal a dinpui turin Mizo hi kan rintlak in ka hria.

    ReplyDelete
  6. @Er.Beethugs, i thusawi khi a ril riau. Sawi thui lo mai ang.
    @sheldon, a dikna lai chin a awm. Mahse, kan khap kherna chhan hi chu; kan la hmanthiam loh vang a nih ka ring thla ngawt a.

    ReplyDelete
  7. Zu lampang chu ka tui chiah lova, mahse, nangma puala Blog i neih lawmpui nan ka rawn tlawh che

    ReplyDelete
  8. Dr Hamlet, ka lawm e. I rawn leng lut fo dawn nia.

    ReplyDelete
  9. Zet-u-zu.. Ziak thiam hle mai, nang nge nge. (Y)

    Tar nih thlenga in ka tum avangin tlem te te chauhin a khat tawkin ka in thin. :D :P

    tren tren.

    ReplyDelete
  10. A chunga ka comment-ah chuan ka hming a lan miah loh chu le.

    tren tren.

    ReplyDelete
  11. Ka comment pawh chu a lo awm leh tawh lo.

    Zet-u-zu.. Ziak thiam khawp mai. Ngaihdan a tam pawmdan a tam tih kha a nih ber hi. :)

    tren tren

    ReplyDelete
  12. Ziak thiam hle mai. Ngaihdan a tam pawmdan a tam tih kha a nih ber mai hi.

    tren tren

    ReplyDelete
  13. Aromatic compound hi maw.....

    Ziak ngaihnawm hle mai ka chhiar tawh hnu ni mah se a ngaihnawm zel e.

    ReplyDelete