25 February 2012

Kan rûm e

Lal lungawi kum leh a lo kal nghâka nung si, nun kawkalh hringnun mawlh hi ka hua. Fak tlak chauh fakin, a awlsam chinchiah ah kan nung a. Lansarh a harna kan hnuchhawn leh si - nun kawkalh chu a ni chiang a ni.

I sunday incheina man to, i pheikhawk, puan, perfume, kawr leh adt. nêna i nun lem thup bo tuma Biak In ropui i pan lai khân, min hmu lo der a, min nuihsawh a ni lawm ni? Kan rilru a nâin hrehawm kan ti a, kan rûm a ni. I mi nuihsawh ai mahin kan nuihsawh che tih hre rawh. Keini chuan tuilai rapa nun hman ai chuan kan lum law law zawk a ni. I duhthlannain kan hliamte tuam dam turin kan lamah vawikhat pawh i lo pén ngai em ni? Fanghmir hliam tuam dam tur chuan mihring chu kan lian lutuk a, fanghmir bawk an tha. Keini ruihhlo ngaia tah hla rem a rumte hian, van Angel-te tanpuina leh puihna kan dawng dawn lova, nangmah kha i tha ber. Biak In chhûnga i thut lai khân nang leh i chhungte tân i dila, kan tân i ka i ang ve ngai si lo.Mi tute emaw thil a bo in, hming i lam hmasak ber chu keini kan ni a.Induhsak leh enkawl kan ngaihin min kân leh lawi si. I kawmkara kan thu ringawt pawh min hnar a ni lawm ni? I inlengah phei chuan engtan mah min ti lova, i ui vulh pawn min seh se pawi i ti lo tih kan chiang asin.

I thawmhnaw man to min hak tir ve la, i pheikhawk min bun tirin, i perfume leh powder ten min chulhin min enkawl la chuan, inchhira Biak In thleng phak pakhat tal chu kan awm ang maw le. I computer hmaa thu a uluk êm êm a i thlir leh i duat ang khân, min thlirin min tuaihnûm la chuan-i khabe hmula luang zawih zawihin Van malsawmna an thih che kan ring tlat a ni.

I suangtuahna uire thup bo tuma Biak In a i kal angin, kan nun tuihalna thup bo ve tumin heng thil hi kan ti ve mai a ni. Kan sual vang leh kan duh vang reng a ni bik vek lo, kan tuihal vang a ni zawk. I ngaihtuahna tenawm leh bawlhhlawh hlip thlain kan tân Kross-ah tuar ngam rawh. Keini ruihhlo nghawngkawla tâng mêk te leh nun tuihalna hrang hrang nei ten, i nâk atanga thisen luangin min tihdam ngei kan ring tlat asin.


TKP,KTP…adt.-President leh hruaitu chauh ni lovin, ruihhlo ngaite hruaitu pawh lo ni ve ta che. Kan nun hrehawm chhâwk turin kan Committee zantin dawn lawm ni? Khawmpui lian a lo awm leh ang a, hlim taka hla i sak lai khân Pandal phênah kan thle mai mai awm si a.

Ruihhlo ngâia ramsa ang maia tal muat muat hi kan kham ve tawh e. Nun pangngai hmanga hma lam pan kan tum a, kan sual rit tak phurhin min hnuk lêt leh thin. Dik tak chuan e, nupui pasal ka neih hma chuan mipat hmeichhiatna ka hmang lovang tia intiam, silver ring bun ngam rai te pawh kan hre ve asin. Kan sual a chhah bik lutuk love. Mahni mai chuan kir ngaihna kan hre lova, a harsa a ni. Kir leh pawh ni ila e, kohhran leh mi zingah inkiltawih reng rengin kan nun kan hmang tho vang. Nunhlui avânga mite rin loh leh endawng kan hlawh dawn tih kan hre ve asin.

Chuvâng chûan kan nun hrethiam phak kan mamawh a, min puitu au in kan rûm mek e.

Tanpuitu kan au ve, min chhâwktu leh khaichhuaktu an awm lawm ni? Beidawnna leh inchhirnain kan khat a, kir leh ngaihna kan hre si lo. Hmangaihna nêna min tuam damtu tur kan zawng mek a ni. A tlai hma hian min chhan rawh u.

7 comments:

  1. Ka hun a tight lutuk. Zanah ka chhiar tha ang.

    ReplyDelete
  2. Ekhai aw.... mahni leh mahni chiang taka ka inhmuh theih nan ka hmaah darthlalang lian i rawn hung chhuak a ni maw.

    Sual thuah chuan ruihtheihthil ti thin te, kawhmawh bawl thin te, zuruih buai hmangte nen, kan sualna te hi, Pa, Pathian hmaah chuan a inang vek asin. Khawvel mithmuhah kan danglam mai mai zawk a ni.

    Ruihthteihthil avanga buai te, zu bawiha tangte hian anmahni vatu aiin anmahni hmangaihtu an mamawh zawk. Mahse, khawvel hi khawvel a ni miau si a, a kaldan phung a thlak dawn si lo.

    I ziak thain chhiar a manhla khawp mai.

    ReplyDelete
  3. Sir, ka post min la kawmen sak zel a, ka lawm e.
    Nia, a chang chuan ruih hlo ngaite kan en dan hi a mak ka ti thin. Khawngaih leh hmangaihtu an mamawh ve em em thin si a.

    ReplyDelete
  4. Ruihhlo ngaite enkawlna tur training leh seminarah hian vawi engemaw zat chu ka kal ve ta a,tin a hmingin Home-ah ka lo thawk ve dawn dawn hman a (Voluntary-in) hre ve rei ruaiah chuan ka inngai a, harsa bera ka hriat tak chu anmahni lam hian duat ngai, khawngaih ngai, dam lo an nih an inhre lutuk hi a ni fo. 'Sual nei lo chuan min deng rawh se' tihte kha an sa tui em em mai a, an chapo ru tlat thin hi a ni.

    Khing ka sawite khi a enkawltu lam hian hria ila a tawk khawp mai, anmahni zawkin 'relapse is a process to recovery' an tih talh talh chuan a buaithlak zo chuan ka hria, a enkawltute thuruk vawn tur a nih zawk laiin.

    I post tha e, anmahni sawi ang ni lo, a hmangaihtu sawi ang zawngin (2nd person)a tha zualin ka ring. Enkawltu tura an beiseite an dem vak hian a fuh mawh khawp mai tih hi ka hriatchhuah niin ka hria.

    ReplyDelete
  5. Rp pachuau, a ni khawp mai thei. Experience engmah ka la nei chuang lem lo, an mahni anga inchana; ka han phuahchhuah mai mai a ni e.
    Kawng tam taka hmangaih leh enkawl an ngai ve a ka hriat avang mai a ni e.

    ReplyDelete
  6. I post chuan rilru a va khawih tak em. Ka nau pakhat zu in ve thin hian "Zu in hi ka ning lutuk, nangmahni'n ka zu in in nin ai daih khan keimah hian ka ning zawk" a ti a, ka khawngaih lutuk ka tap tawp ani. Pathian hnenah nasa takin kan tawngtai puia, Pathianin a tidam ta, kan va lawm tak em..

    Ruihhlo ngaite hi hmangaih an ngai tak meuh tih min hriat thar tir leh. Tawngtaina tal in i pui zel ang u..

    ReplyDelete
  7. Ma-i, i nau chu ka lawmpui tak zet e.

    ReplyDelete