25 February 2012

Ka fawp ve ngam ta

Ngaihzawng la nei ve ngai lo na na na chu rin aiin zei a har phian. Ka zei loh a hlei ah he thu hi ka ziah phah thei ta zawk a ni. Mahse, a pawi chai lo. Tunge piantirh ah zaithiam a zai nghal a, recording nei tawh i hre chuang em ni? Piantirh a corrupt nghal an awm chuang em ni? tiin bul tan phawt ang.

Nia, khatia han bum thluk tak ah kha chuan a nuam ve ang reng khawp. Han rim ve changa sawi tur a vang thei khawp tih loh kha chu. A bula inti neitu taka han thut chawt pawh ka chak ve tho. Mahse, min kawm tlangnel tumin min ti ti pui liam ang a, sawi tur ka hre awm si lova. Min ngaider takin ka kutah min rawn vuan chut ang a, inleng dangte leh an chhungkaw hma ah ka te tuar ang tih ka hlau bawk si. Kei misuala hi ka lo va nep tak….

Zanin chu len rei lamah ka chak dawn tho tho. Inleng dangte leh a chhungte an mut hma chu ka thu ngawi ve char char dawn hrim hrim. Vur a tlak hma chuan ka haw dawn lo a ni ringawt. Kei misuala hi khawnge ni….A heh sen hlar leh biangtai hlar mai chu ka huaisenna zawng zawng sawmkhawm a, han hmuam chut ka chak lutuk tlat. Mahse, kan ni ve tan chauh si a, lo duh lo ta se tiin ka inngaihtuah a. Chubakah ka zei dawn loh em avang khan, lo rak tuar mai se a chhungte an lo tho vek dawn tih ka hre ve tlat. Inpawngsual a lar si a, min ringhlel dawn chiang. Kei misuala hi jail bang ka zut ngei dawn e….

Zan dar sawm a ri mai dawn si a, thlasik zan dar sawm chu tlai tak a ni tawh. An sofa ke ka tlawh bet sauh sauh va, ka han kuah chut mai chu(h). Kan ” Awih- Ah” dun thawt lo kha tun thleng hian mak ka la ti reng. Khatiang kha thleng palh sela chuan aw- Kei misuala hi ka va chan ropui dawn em….

Mi rawn melh chiang, ka melh duh miah lova. Zawi muangin ka ke nghahna atang chuan ka ke chu ka la kiang a, duhthusama level ka lak vek hnu in, rul chuk ang maia ranga a hmui sen tar mai chu han seh vak ka tum a. Mahse, ka ngam chuang si lo. Kei misuala hi ka han dawih êm êm chu aw….

Ka zei thlawt bawk si lo, fawh i duh em? tia zawh bawl mai ka nap a. A awm ang lo em mai, a ho zo vek ang tih ka hlau si. Hei ha, tun tum chu tum nawn sek ang. Ka rilru in khai le ka ti a, ka kut pahnih phar kang vaw in a hmui ah tak(aw a hmui ah) ka han chuks chawt mai chu. Kei misuala hi mumang ramah ka cheng mek a ni….

Ka che na deuh a ni ang e, pa ber chuan a aw a han thian karh karh a. A hritlang tur a inmung tan mek a nih ka ring thla rawk a. “Mami, tun ang thlasika vur han fawh te chu a, zanrei ah leh nghal” a ti mai ang tih ka hlau khawp. Ka kut phar vu chu ka la thlarap a, eng em chu a thleng a thleng ta lo a ni ang. Kei misuala hi ka him hram….

Ka tum ber ka zo chu ka thaw huai. Chutia ka awm takah chuan ka danglam ta vek hian ka inhria a, ka eng emaw hu in ka in hria a. Kan inmelh a, kan nui leh ringawt zel a. Sawi tur hre lem lovin kan in sik nawk nawk a. Min haw tak tak lo tih hriat fahran hian zan reiah min chum dawt dawt a. I sual lutuk, ka ngei che a ti leh ringawt a-min ngei lo tih ka chiang. Kei misuala hmui(LIPS= Love is poison for student) hi a virgin ta lo….

Ka thianpa hrilh hlan mawlh ka nghakhlel a. A ruka pa in tihna riau leh hlawhtling intih nain ka khat a, ka nui ru tet tet a. Ka hmui ka han khawih leh a, a la pangngai reng…aw i va han nihlawh tak em ka ti rilru vawng vawng a. Kei misuala hi hlawkna hlirin ka lo khat ta a ni….

Haw zai ka rel ve ta a. Mi rawn melh a, min melh rum riau mai a. A nui ta daih a, i lo va zei ve a a ti ringawt a. “Ka tum reng vang pawh a ni lo, TITANIC hmuhnawm ka ti” ka ti thlarawk a. A zawhna tak ka chhang em tih ka hre lo, a nui sen sen a. Arpa in a ruka buhpho duh tawka a chuk tawh hnu a a khuang ta al al thin ang hian, intithei takin ka mutchhuak chu ka ham haw ta bai bai a.

1 comment:

  1. Ha ha ha, nula fawp tur han inurlawk tak tak mai chu. Vawikhat fawh tawh chuan next chu a harsa vak tawh lo. Zozial fawh zat zetin a remchan chuan a fawh sek theih tawh mai.

    ReplyDelete