14 February 2012

Zinkawng Rapthlak


Introduction to Zinkawng Tuboh-
Fam ta lo na na na chu, ka la dam tek tek a nih hi maw. Monu thlaha kan zin chanchin hi, ka’n hrilh mai mai teh ang che. Kan monu thlah ka thihpui thelh nia le, ka thihni a thleng lo chauh kha a ni si a.
Remchanna avang zawkin, hmeichhe khaw lamah “Tiam dun e” an ti ta mai kha a ni a. Mipa zawk khawlamah an hawng lo thei si lo, kan thlah ta poh a nih kha. Keia pui roh, engmah ka nih loh teh vei nen; i lo kal ve ngei tur a ni an ti tlat si a.
Hei le Mini Bus-
Bungrua leh mamawh neuh neuh an ngah vei roh em atin nih kha, mini bus (city ride) ang chi kan hmang tawp a. Fanghmir Sai dawlh ang tan, kan tawtin a mar tha khawp. A chungah pawh kan rem ve nual a. A chhung lamah erawh gas cylinder, dunlop, suitcase leh maipawl nên lam kan inhnawh.
Kan han lut khawm a, rin aiin kan tawt. Han inhnawh inhnawh takah chuan, kan leng ve mai. Nu leh pa, nula leh tlangval, naupang nen lam kan kim tha. Tuai kan awm lo. Theih ang anga kan inhnawh hnuah, kan chhuak ta.
Lamtluang chhuiin-
Phur takin kan chhuak, min bye bye liam lauh lauh hlawm. Kan sàwt chho zel a, min sawhthawl sáwt ang reng. Metal chin a zota, kan pen a tul a. Tunah chuan, bawngchaw phur speed-in kan tlan tawh ang.
Gear lian hlirin a phih tan ta. A chang phei chuan, kan thil phurhte an ri nawk nawk a, kan ri nawk nawk bawk a. A phur zual an zai chho zel bawk a-
“Chhei raw, a láwi dawn e
Z…a runah a lawi dawn e
An khum pawh chim se
A pa’n a do zel ang”
Tluangtaka thleng mai turah ka inngai a, ka tisual chhia va. Mel tam a awm tawh lo, kan bus chuan kawngthlang nem nem lai dai ta tlat mai.
Nau ang nuar e-
Dai lo thei hek lo le, a áwn ta vu mai. Tumah kan che ngam tawh lo, hmeichhia an rak tuar tuar. Driver ka en a, tûm vuau tawh mai si. Chhei raw, kan liam ngei dawn e.
Bus kawngkapui bul seat a thu ka ni a. Ka bula gas bur chu, lumthlak a tum ruh khawp tih ka hai lo. Ka ke dinglamin ka tlawh bet, ka kut veilam-in ka invuan a. Ka kut dinglamin chi-ai lo turin ka zaizir bawk a.
Ka indaih thlawt lo a ni ber e, bula mi a rak chul mai leh nghal. Bus chu a che leh hrut. Indaih loh nak alaiin, suitcase pakhatin min delh a tum ruh êm êm mai bawk a. Suitcase in min rawn bitum hnuah, maipawl-in a rawn zawm zat dawn tih ka hmu kiau bawk.
Maipawl pú la, i bengvar ang-
Ka gas bur tlawhte, ka invawnna te thlah mai chi ka ni bik si lo. Heti hian ka ngaihtuah ta a. Min rawn delh an tum rau rau a nih chuan, saw laia Dunlop saw ka va la ang a. Ka let leh ang a, ka indelh tir chauh ang. A va han atthlak tak….
Maipawl chu a pawi lo. Maipawl pu la, i bengvar ang an tia lawm. Bus a la awn vu, kan che ngam hauh si lo. Suitcase chuan min rawn delh ta tak tak, nâ pawh ka sawi hman lo. Sakuh ser nghahin, Maipawl lo tla tur ka nghak leh phawt. Ka beng a var ngei dawn.
Min bitum ranin a rawn lum ta tak tak. A lum kawi ta hlauh, delh tum loh zawk a delh ta chut mai. “Eih-Ah.” A na em? tia inzawt hman kan ni lo. Ring takin ka au “Po…si…tion” Aw, khatiang khan min delh dawn tih hre lawk ila chuan, Dunlop kha ka khum lawk daih tawh ang.
Tah a tul leh thin-
Tla tur zawng zawng an tla fel tawh em ka hre lo. Kan in eih-ah chhawk a ni hawt. Ngawiteh, suitcase pakhat khian min la rawn tinzawn khawp mai. Ka ning tawh tia chhuah daih ka chak zia kha, a theih therte si lo. Suitcase a rawn che hrut a, “Lo man ru..” Aw, lumuma hi tah a tul leh thin.
Kha thil kha minute khat pawh tling lova thil thleng a ni. Mahse, a takah chuan a rei duh lutuk. Chi-ai lo turin kan infuih a. Engtin tin emaw, muangchangin kan chhuak pheuh pheuh va. Bungrua ngaihsak hman leh ngaihsak chi pawh va ni suh. Kan chhuak fel thei hram “Hui ha”
Chhanchhuahna ropui chu-
Mau kan sat ta. A chunga Carrier ah chuan, mau hnang hmangin kan phuar bet a. Mau thenkhat a seat ah kan tawn tel bawk a. Bus pawh a liam mai bik hauh chuang lo. Mau bul lamah kan vuan theuh va.
Zamna rilru nên, ka thlan chhuak vek. Driver a zuk lut a, a start ta. “1…2…3″ A tlan phut a, kan lo pawt bawk a. A him chinah kan pawt chhuak nawlh mai. A va lawmawm em!
Thenkhat chu an chuang ngam tawh mang lo. Lungmuang lo zetin kan lut leh hna hna a, zai ngam pawh an awm tawh lo. “Chhei raw, a lawi dawn e” tih aichuan “Chhei raw, a liam dawn e” tih kha a lar zawk daih tawh.
Ban zai ka rel mahna-
Thi lo a ruangin kan thleng. Ka mitthla kir a, ka khur dar darin ka hria. Tum vuau in kan chhuak, hawn leh lam huphurawm tawh tak a ni. Eng em ti lovin, kan haw leh ta a nih kha.
Tun thleng hian Mini Bus ka hmuh hian, ka thinrim tawp zel.
Nupui ka neih ve hun chuan, khawchhungah pawh motor ka hmang lo aih aih khawp ang. A pawmin ka pawm thleng zak mai ang. Ka pawm thleng zo ngang lo a nih pawhin, ka paw thleng zak awm em mai.

12 comments:

  1. Khai a... tlema tlemah kawngthlang lamah in in liam tep anih khi. Motor accident hi chu, a accident chhung hi a rei lo na a, a khawih pawi eerawh a nasa thin asin. In vannei hle mai. Khawi khua emawni bus service pawh kha, kawng chhovah busin a zo lova, a breakin zo bawk hek suh, a back thla ta zur zur mai. A huna driver-in a sawi dan chuan, "Hnung lam ka han hawi phei a, passengers ho chuan an hlauh hmelin an huphurh hmel ngei mai," a tia lawm. Motor accident hi chu a huphurhawm bawk aniang e.

    In kalna kawng chu a chhiat vak loh khi, Mini bus tal a la tlan thei alawm....

    ReplyDelete
  2. Sir a hlauhawm mai mai asin aw, ka fiamthu deuh tak naa; ka suangtuah let leh chang hian ka la khur deuh fo mai.

    ReplyDelete
  3. A hunlaiin hlauhawm viau mahse, hetiang hiansawi tur a titam a thatna lai tak a awm asin... titawh mai ang.

    ReplyDelete
  4. Hahaha, ni ngawt tak mai. Mi experience neih tlemna kan experience ve a ni mai.

    ReplyDelete
  5. Post 'den' hle mai! I sawi ang hian, i han fiamthu pah tak na a, a hun lai chuan a hlimawm loh ngawt ang chu.

    ReplyDelete
  6. @Pu Zaia, A hlimawm lama thlir har tak a ni, a ner hmelchhiat theih khawp mai.

    ReplyDelete
  7. Chhiar ringawt pawn ka lo hah ve tawp!. I sawi ngaihnawm thiam chung pawhin a mangangthlak tur zia min ngaihtuah tir nasa..

    Dam taka in thleng leh thei a lawmawm a, chuan nang chuan i nupui chu i pawm thleng zak dawn nia! A him ber ang.

    ReplyDelete
  8. @Ma-i, hahaha. Nia a him thei ang bera in hawn a tha ka ti ta riau tlat.

    ReplyDelete
  9. Film vela a changtupa i ang awm hle mai.
    Gas bur tlawh bet chung leh suitcase mel ran chunga chiai lo tura i han zaizir vel lai chu hmuh i chakawm ang reng hel mai...hehe

    ReplyDelete
  10. @puibawiha, vai film chu nise; hralh a tla phian mai thei hahaha

    ReplyDelete
    Replies
    1. Haha...in zin kawng chu a va pui tak ve. Gas bur lum tur rah beh, suitcase lo tla nen, i va buai ve aw!!

      Delete
  11. Nia U sheldie, patling thluak a per chhak lo chauh maw le.

    ReplyDelete